古怪飛行器造型緊要過識飛

2016/11/21 10:11:10 網誌分類: 生活

21 Nov

        搵成個公仔頭做飛行器，Kelly第一次見！飛唔飛得起，好快就知，因為呢部古怪嘅飛行器將於下周日參加「RedBullFlugtag飛行日2016」，將會喺啟德跑道公園跑道起飛，向海飛行，鬥飛得最遠。小妹昨日趁住飛機工場開放日，率先去睇吓四十一隊參賽隊伍趕製飛行器嘅進度，其中一隊今年係第三次參賽，今年佢哋製造懷舊小丑公仔頭造型嘅飛行器，完全唔似識飛喎，笑咗。

        參賽經驗豐富嘅一隊參加隊伍，繼上次製造「孖寶打爆紅白機」，今次再仿照「歡樂天地射牙仔」遊戲，製造充滿香港人集體回憶嘅小丑飛機。隊長Mokit話，今次係佢哋第三度參賽，更是首次由他負責駕駛飛行器起飛！雖然暫時未完成整部飛行器，但佢哋已完成小丑公仔嘅頭部、機翼，以及起飛前嘅表演服裝及道具，以熒光粉紅色為主色，夠晒搶眼！

        最受注目嘅飛行器，就喺由鬼才導演添布頓（TimBurton）設計嘅飛行器「Romeo」，意念來自其創作嘅「RomeoandJulietCollection」，並由一班曾與添布頓喺港及上海展覽合作過嘅香港人負責製造，隊長Sion同Kelly講，覺得好榮幸可以參與製作，現時只完成飛行器嘅前半部份，包括已完成「Romeo」頭頂上嘅三棟香港地標，中銀大廈、太空館及香港文化中心。

        KellyChu