19/10 暴瀉後翌日必彈

2017/10/19 19:07:14 網誌分類: 經濟

19 Oct

港股先高後低.穿頭破腳.單日轉向收大陰燭.恒指結束5連升.暴跌翌日例升

港股創新高28798/11694後倒插收場.小股災式暴瀉失10天線

19/10 周四恒指收報28159, 暴跌552點(最多下跌617點, 一度上升87點)

國指收報11357, 暴跌264點(最多下跌270點, 一度上升72點), 國指大幅跑輸恒指

10月19日為87股災30周年，30年前的10月19日為「黑色星期一」

上周五港股收28476/11519, 本周好友主場, 點跌落黎就點上番去

大鱷屠牛熊追數真係乜都做得出, 俾阿爺維穩盤阻頭阻勢, 過去8日大鱷只係在16/10(本周一)食過一餐肥熊, 開餐日數少得不尋常, 餓到發癲, 大鱷見向上阻力大, 但又想開大餐, 所以推倒重來, 夾硬插水617點連28100都隊穿埋, 今日分明係蓄意謀殺, 低見28094大舉屠牛趙完鬆, 彈番上20天線, 尾市反彈相信係有淡友食糊補空倉及短炒盤進場, 北水大媽亦乘機掃貨, 大鱷根本唔想在低位出貨, 每逢暴瀉翌日例彈,

大鱷操控港股如入無人之境, 急升暴跌, 升跌都唔好信到十足, 雖然我估阿爺在十九大開幕後會縮手, 俾港股自由行, 但大鱷也不能癲得太過份, 斷估十九大期間(18~24/10)港股會有阿爺睇場, 會守住28000, 回顧過去幾個月都試過多次出現大陰燭, 往後總能收復失地, 不過當是未上到大時代水平, 如今升到去28588魔咒位人人都走鬼, 如果確認28798已見頂的話, 十九大之後就有可能落去回補27737的上升裂口及屠牛, 希望撐埋結算, 拖到11月才插穿28000

尾市插穿28400我認為係跌過籠(28798-400點周波幅=28398), 今日根本不應碌落去28094, 見28400才合理, 大插目的係屠牛, 因為殺到去28400只吃到620張相對期指對沖張數牛證, 但插到落28094就殺到3061張, 真係睇住黎食, 幸好大媽尾市大手掃貨護盤, 港股有期指結算及大媽做後盾, 大牛市對壞消息有好高的消化能力, 急跌就會急彈, 但經過今日一插, 港股技術指標已轉弱

~~~~~~~~~~~~~~~~~~~~~~~~~~~~~~~~~~~~~~

跌過籠.急跌就會急彈

今個星期一港股大升, 代表本周係由好友主導大市, 今日俾淡友偷襲, 相信好友不會輕易放手, 明日要畫周線, 好友必定會反擊, 如果大鱷隊港股落山是為了擴大周波幅.屠牛追數以及回補上升裂口, 今日一步到位, 任務已完成, 明日亦冇必要再插, 點跌落黎就點彈上番去, 否則再碌落山就會嚇走散戶, 冇人接火棒點得呢? 要跌下彈下才能吸引股民進場

上周五港股收28476/11519, 明日要上企呢個水平, 本周才能收升, 估計好友明日會殺番上去, 10天線亦不會一去冇回頭, 點都會有吻別, 跌過籠的優質股及大媽愛股會有買盤吸貨, 大媽亦會掃貨護盤, 不過友邦及中移明日公布業績, 會不會見光死呢?

港股升跌都好假, 試想想, 如果今日爆上28800屠熊, 要花好多子彈才能撐住高位到下周部署結算位, 但今日插水落去屠牛, 只要急跌急彈, 畫番支陽燭就可抗衡今日的大陰燭, 圖表派就會話未破壞升勢, 牛牛亦會進場, 剛好拖到月尾結算, 如此一來大鱷就可以慳番好多托市子彈, 樓下有重倉牛, 具吸引力, 就成為今日下殺誘因, 而家大鱷已經食飽牛扒, 熊熊已下移, 又可以彈番上去屠熊喇! 月尾要好淡通殺來追數, 貼價牛熊命危

~~~~~~~~~~~~~~~~~~~~~~~~~~~~~~~~~~~~~~

向上動力不足.大市見頂回落

昨晚道指爆升160點, 大鱷理應順勢大裂口高開一二百點秒殺肥熊啦! 連ADR都上左28800, 但今早競價恒指竟然只係高開72點, 國指仲衰, 只係高開34點, 極為反常, 現貨創新高28798但期指亦冇創新高, 已經覺得唔妥, 反映港股向上動力已轉弱

大鱷餓左幾日, 冇理由唔趁美股急升裂口殺28800熊, 所以一開市在9:31恒指見頂28798(開市首10分鐘係做頂或底的時間窗口), 我就話沖頂打回頭就要落山, 因為今早向上擴大周波幅高見28798, 既然向上受阻就要向下擴大周波幅啦! 28798-400點周波幅=28398, 要飛天遁地兩邊爆才夠周波幅, 不過都估唔到跌得這麼急勁, 大鱷玩得好離譜

昨午工建行沽壓大得不尋常, 昨晚見夜期跟唔上美股升勢我已提高警覺, 所以今早睇見唔對路就拿拿臨叫閃, 今個月有太多上升裂口一直令我有戒心, 結果今日一插, 就全數回補了兩個裂口28492~28620及28194~28311, 出得黎行, 遲早要還, 都話左定向降準只係值千點, 升去到28800就剛好夠數, 要有新的利好催化劑才能上企28800, 否則沖頂回落就要尋底, 港股慣性走勢係遇上大阻力及食飽肥熊就掉頭向下, 當食夠肥牛見支持就會急彈,

財經界分析師都湧晒去搵港股暴跌的原因: 西班牙加泰羅尼亞獨立事件.本港拆息上升.股災記念日陰影.全城單邊看好的相反效應.內地加強金融監管......呢D暴跌理據好鬼牽強, 跌300點就講得通, 但不應一棍插617點, 講乜都係假, 我就話大鱷隊港股目的係為了屠牛及殺好倉, 如果28000~28500冇三千張肥牛, 你估會唔會大插插丫? 呢班水果+水果大鱷, 真係超級賤格陰毒, 咪俾我睇死, 急跌就會急彈, 明日會有大彈高吃

~~~~~~~~~~~~~~~~~~~~~~~~~~~~~~~~~~~~~~

波動市陸續有來

大牛市基金經理普遍看好後市, 本來唔會走鬼, 但港股一破位而下, 就觸發程式沽盤, 基金/股民到止蝕或止賺位亦不得不走貨, 才會出現人踩人爭相沽貨的場面, 通常呢種情況會係跌過籠, 翌日會急彈, 大鱷想開餐屠牛熊不難, 既然向上受阻就向下隊, 目的係屠牛追數, 食飽就彈得, 相信呢種急升急跌的波動市陸續有來, 要有兩手準備

今日恒指低見28094, 殺左3061張相對期指對沖張數牛證, 全靠今日呢棍, 今個月合共已殺了10815張, 飽到上心口, 真係睇住黎食咖! 牛牛一直大幅多過熊熊, 早已引起大鱷的殺機, 結果本周好淡通殺, 周一大舉屠殺肥熊, 今日就輪到肥牛歸西, 下一餐會唔會係28500樓上的熊掌呢? 好淡通殺噢! 不過28000牛仍未脫險咖!

嗱嗱嗱，上周都話左當人人向上望就要小心, 大鱷正在溫水煮蛙派緊貨, 散戶指標好準, 過去兩周多左親友問我某某股入唔入得, 想學炒股, 我就知唔係幾妥, 我話港股創10年新高才入市? 大鱷正在一路推升一路派貨啵! 我話想入市博上29000亦要有心理準備會插穿28000, 接受得到大跌的風險才好入市, 而家有可能係牛尾, 第四季港股係急跌急彈大幅波動, 風高浪急

~~~~~~~~~~~~~~~~~~~~~~~~~~~~~~~~~~~~~~

匯市波動利淡港股

月尾因素加上新股集資令短期資金抽緊, 金管局亦可能繼續增發外匯基金票據令結餘減少, 港元拆息顯著上升

港美息差收窄, 港匯突然轉強, 中午時港匯已升穿每美元兌7.8港元關口, 下午1:30報7.7988, 為今年6月底以來最強水平

內地第三季經濟增長放緩的消息公布後, 離岸人民幣匯價明顯轉弱, 帶動在岸價下跌, 人民幣收市報6.6277元兌1美元，跌72點子

上証綜指低開低走, 反覆下跌, 有阿爺睇場, 尾市見即市低位後例牌反彈, 收復一半跌幅, 收3370, 跌11點(-0.34%), 創逾半個月新低, 下跌股份比例極高, 只係靠內銀內險石化雙雄A股做好托市, 今早公布的內地第3季經濟增長放緩至6.8%, 影響投資情緒

道期雖然一度跌近百點, 但亞太區股市升跌幅度不大, 台股高收0.37%, 再創27年新高, 日股升0.4%, 連升13個交易日, 曾升至21年高位, 你話港股做乜自隊丫?

中銀監主席郭樹清表示, 會進一步加大不良貸款處置力度, 遏制隱性債務增加, 要堅決抵禦跨市場金融風險, 深入整治市場亂象, 守住銀行業風險的底線, 同時亦要加大力度去產能, 他又提到，過去5年供給側結構性改革收效，銀行業監管良好，但仍需要加大監管力度，防範房地產業不良貸款，守住信貸風險底線

美股大牛市升勢停不了, 稅改成爆頂催化劑, 自從10月開局一上企22500關鍵大位就一去冇回頭, 500點一級於兩個幾星期後連23000都攻陷, 飆左出外太空, 向23500進發, 白宮表示特朗普未來數天將公布下任聯儲局主席提名人選

~~~~~~~~~~~~~~~~~~~~~~~~~~~~~~~~~~~~~~

北水趁低吸納

大媽大手趁低吸納, 港股尾市暴跌時大媽加碼掃貨執屎雞, 只要明日繼續掃貨, 有助推動港股向上

港股通（滬）2017-10-19

賣出　融創中國.吉利汽車.中國恒大
買入中國平安.中國建材.中國太保.中信銀行.中芯國際.騰訊控股.中國銀行

港股通（滬）

2017/10/19     流入¥18.08億    買入¥49.11億     賣出¥31.77億     總成交額¥80.88億
2017/10/18     流入¥14.64億    買入¥41.77億     賣出¥29.42億     總成交額¥71.19億
2017/10/17     流入¥8.67億     買入¥37.10億     賣出¥32.18億     總成交額¥69.27億
2017/10/16     流入¥15.18億    買入¥46.67億     賣出¥33.82億     總成交額¥80.49億

2017/10/13           流入¥21.69億     買入¥51.11億     賣出¥31.34億     總成交額¥82.45億
2017/10/12             流入¥13.99億     買入¥42.34億     賣出¥30.51億     總成交額¥72.85億
2017/10/11             流入¥17.74億     買入¥58.32億     賣出¥42.98億     總成交額¥101.31億
2017/10/10             流入¥15.18億     買入¥41.41億     賣出¥30.25億     總成交額 ¥71.66億
2017/10/09             流入¥12.39億     買入¥62.51億     賣出¥54.65億     總成交額¥117.15億

2017/09/27 流入¥ 9.03億買入¥43.16億賣出¥39.63億總成交額 ¥82.79億

${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$