鮑威爾大熱
聯儲局開完會，對美股影響輕微，杜指收高0.3%，升57點，收報23435點；標普500指數升0.2%，收報2579點；納指逆市跌0.2%至6717點。能源股領漲標普500指數11個板塊，升1.1%。
聯儲局昨日結束為期兩日的議息會議，一如市場預期，決定維持現有利率不變，另外，聯儲局在議息聲明中表示，美國經濟成長穩健，就業市場不斷增強，而ADP/穆迪昨日公佈的10月份美國私人部門職位增長23.5萬個，高過市場預期的20萬；另外，10月份ISM製造業指數為58.7，而製造業支出較九月上升0.3%。聯儲局對美國經濟表現有很高的評價，也在提醒市場對12月加息作好心理準備。
事實上，據聯邦利率期貨交易數據顯示，交易員認為聯儲局12月加息的概率高達100%，如果週五公佈的10月美國非農就業職位增長不會出現嚇人事件，加息已無懸念。
講開加息，當然要講講下任聯儲局主席誰屬的問題。《華爾街日報》等美國媒體報道，總統特朗普將於今日公布聯儲局主席耶倫的接班人是誰，真命天子好有可能是現任的聯儲局理事鮑威爾 (Jerome Powell) 。
鮑威爾係律師出身，曾做過投資銀行家同美國財政部金融部門的副部長，於 2012 年加入聯儲局。鮑威爾被華爾街形容為「悶悶地」（boring），但分析普遍認為他是聯儲局主席的穩健人選。
對股票市場而言，更係特朗普眾多人選中最好的選擇。主要原因係他在貨幣及利息政策方面，十分貼近耶倫的風格。他在聯儲局工作，從未反對過伯南克或耶倫的政策，因而在華爾街以鴿派著名。野村證券分析師亞歷山大說：「如果特朗普提名鮑威爾取代耶倫，將代表聯儲局的利率與資產負債表的政策將會持續，至少一段時期如此，較長期而言，不確定性將會增加，目前不清楚鮑威爾對貨幣政策的個人喜好度如何，也不清楚他的喜好度會如何演變。」
鮑威爾另一個深受投資者歡迎，甚至好過耶倫連任的原因，是他比耶倫更傾向放鬆金融方面的監管。他這方面也與特朗普更合嘴形。特朗普已經多次表示，Dodd-Frank法案中的銀行法規傷害了美國經濟。對此，鮑威爾較耶倫較能接受這個觀點。大家睇美股期貨臨近收市時明顯抽高，一定程度反映投資者認同鮑威爾可能成為耶倫接班人的預期。
陸羽仁
2017-11-02
Dow Jones Industrial Average (^DJI)
23,516.26 +81.25 (+0.35%)
宏橋夾到空軍出血
2017年11月03日
美國聯儲局議息，一如預期維持利率不變，但係市場預期下月加息機會率升到逾98%。更加受注目嘅係美國聯儲局換人在即，估計未來鴿派鮑威爾擔正機會較大，但隨住經濟升溫，相信鴿、鷹輪流出場次數會增加。
聯儲局制訂貨幣政策嘅公開市場委員會，結束一連兩日會議，聯邦基金利率目標範圍維持喺1至1.25厘。會後聲明提到，雖然有颶風嘅影響，但係經濟活動一直以穩定步伐上升。當局認為維持相對寬鬆措施，可以令勞工市場持續改善，同令通脹邁向2%目標，短期經濟風險大致平衡，當局會密切關注通脹走勢。
聲明又話，預計利率會喺現水平維持一段長時間，直至通脹接近目標水平。
但未來係咪加息，要視乎經濟數據同就業市場表現。交易員認為12月加息高唱入雲，而明年預料會加息一次，時間可能係六月。
長實沽中環中心大致消化
外圍冇乜重大變動，港股喺月頭大升一日之後，噚日基本上係消化，不過個別股份就有異動。恒指收報28518，下跌75點；國企指數收報11598，下滑38點，成交1102億元。長實(1113)
402億元出售中環中心大部份業權，股價升咗3.6%，收報67元。
由於消息傳咗一段時間，相信已經反映咗，如果要再炒呢個消息，可能要等公司決定會唔會派吓高息益股東。日前宣佈回購嘅ASM太平洋(522)
，大股東突然出招大手減持。據銷售文件話，控股股東ASM International以每股109元至112元，配售3700萬舊股，套現40億至41億元。
噚日嘅異動股之一係早前留過叫大家留意嘅中國宏橋(1378)
，呢隻因為俾人狙擊停賽嘅工業股復牌當日已大升，之後透露主席張士平喺復牌後持續增持，再喺11月1日從公開市場，以每股9.69元，購買合共583.1萬股股份。購買後，控股公司持股量增至約81.7%。喺消息推動下，股價大幅挾高23.4%，收報12.46元，同停牌前7.05元高咗77%，若然沽空咗佢，依家都幾大劑。
今年頭，從事鋁產品製造業務嘅宏橋俾沽空機構Emerson Analytics狙擊，指集團財務造假，包括虛報生產成本同利潤率，宏橋股價急挫後中途停牌。宏橋回應反對報告中指控，認為指控冇合理根據。
大股東唔怕高位增持
Emerson當時吹到好大，質疑宏橋真實利潤比依家公佈少50%，合理目標價係3.1元，較停牌前低56%(依家睇嚟呢個目標價有啲搞笑)。
當日宏橋受到狙擊時都幾頭痕，搞咗幾個月後，獲聯交所同意復牌條件，包括解決審計發現並澄清載列喺2016年負面報告，同2017年負面報告中指控；刊發所有尚未刊發嘅財務業績並解決任何審計保留意見；同埋通知市場屬重大所有資料，做咗一大輪功夫後終於喺上個月獲准復牌。
回想當日宏橋好快就停咗牌，估計沽空機構未有機會平倉。大股東部署咗咁耐先嚟復牌，搵埋中信集團入股，自然唔會咁易罷休，睇嚟呢舖係想夾到空軍出晒血啦。
陸羽仁
午安~
BoBo呢期点睇？
Good good good morning~ 馬仔, KFC
TC 呢? 大家呢? 大升愈升人愈少, 有經驗的老鼠在那兒 ?
在公司也聽不見同事講股了, 錢都去了買樓嗎 ?
Good morning.