騰訊翻生
美元續升，美國十年債息升上3.1厘，港元走弱，金管局在紐約交易時段買入近９５億港元，結餘將降至１１７４﹒３億，兩日合共買入110.7億港元。
不過資金外流的負面消息，難敵騰訊（0700）的好業績。昨日港股收市後，騰訊控股披露了一季度財報，股東應佔盈利232.9億元(人民幣)，按年增加60.89%，優於市場預期。
業績公布稱，主要受惠於智能手機遊戲、支付相關服務、數字內容訂購與銷售及社交廣告是整體收入增長，期內收入按年增長48.39%，至735.28億元，每股盈利2.47元。
騰訊今季總營收和純利超預期，主要受益於上季度環比下跌的遊戲業務恢復增長，另外微信合併用戶亦持續增長。
近期騰訊大幅回吐，跌穿400元，反覆試低位。今次業績表現靚仔，有利股價翻身，在美國上市的騰訊ADR，在盤初已漲超5%，到盤中漲幅一度擴大至8%；最終收漲6.83%，報53.80美元的五日最高，折合422.3港元。預計今日騰訊股價在香港一樣會沖高，也會帶動大市向上。
另外講講美股。美股週二唞一唞，昨日又升過，杜指收市升62點，收報24769點，升幅0.3%；標普500指數升0.4%，報2722點；納指升0.6%，收報7398點。而中小型股份指數羅素2000更創出歷史收市新高。
Johnson Research Group的行政總裁及研究部主管Chris Johnson表示，當羅素指數帶領大市走高，意味著這是真正的牛市，這也是投資者可以入市的市況。就算美股現正走入節股市淡季，相信仍然可以玩幾轉。
他提醒投資者，在這個夏天，即未來幾個月，可能繼續出現「見消息沽貨」（sell-the-news）的市況，他留意到有過半數的美企在公布了好過預期的盈利報告之後，股價在第二日就跌近2%，成為投資者趁低吸納的良機。
無獨有偶，瑞銀的高給投資組合經理Jim Lacamp亦睇好後市，不過，角度有點不同，他認為當市場連續多次觸及200天線，之後升離這條線，是一個很健康的信號，另外，大市也造了一個較前一個低位更高的低位。Jim Lacamp建議投資者吼金融股、非必需性消費品股、原材料股和科技股。
陸羽仁
2018-05-17
Dow Jones Industrial Average (^DJI)
24,713.98 -54.95 (-0.22%)
騰訊大媽鬥大行
2018年05月18日
股王騰訊(700)
周三收市後公佈業績，純利表現好過市場預期，股民預期會帶動大市向好，但好消息刺激維持唔到太耐，大市好快就偏軟。我覺得大市早幾日扯上近31600點已想回調，騰訊業績好是劇本以外故事，最後大市仍然要回歸回調劇本。
股王騰訊昨日出現外資審慎、大媽買進場景。騰訊公佈業績靚仔，股價大幅飆升，成為大市中流砥柱。好似佢呢啲萬億市值兼高估值股價，業績對股價影響唔可以憑第一眼感覺決定。騰訊業績比大行預測好，市場初步有驚喜，分析員睇過後，認為主要係收入主要來源的手遊有表現，其他業務都有出色表現，但就擔心強勢是否可以持續，從呢個角度睇，外資對騰訊態度轉向保守，有好消息都打折扣，呢點可能係大行對整體科網股睇法，唔單止係針對騰訊。大家唔好忘記，騰訊係一隻45倍市盈率大股，佢值幾多由大戶話事。
多間大行調低目標價
騰訊第一季純利增長61%咁勁，富瑞發表報告坦言季績穩固，毛利率上升有驚喜，廣告收入動力強勁，要關注係第二季手遊業務或會回落。該行指，騰訊首季手遊收入強勁反彈，PC遊戲一如預期相對疲弱，預期第二、三季仍然受壓。手遊方面，基於四月份數據及假設無新遊戲貢獻下，料亦出現回落。該行把騰訊今年手遊收入增長預測調低至約40%，至於《堡壘之夜》(Fortnite)內地PC版本正待政府部門審批，或潛在為PC遊戲帶來增長。該行將騰訊今明兩年收入增長分別上調1%及2%，non-GAAP純利預測，則分別調低4%及2%，以反映業務組合結構性變化，主要是廣告及金融服務收入貢獻將較高。由於對手遊前景唔係咁肯定，富瑞將目標價由530元，調低至515元，維持「買入」評級。另一間大行瑞信都指出，騰訊行銷成本持續增加，在公司可以從新產品獲得足夠收入之前，恐怕會侵蝕利潤，因此降低盈利預測和目標股價，對2018年和2019年盈利預測分別下調4%和3%，目標價由540元下調至523元，但維持跑贏大市評級。
騰訊手遊業務其實相當強勁，《堡壘之夜》都獲市場看好，大行分析畀人感覺有啲吹毛求疵，又或者可以話呢個只係佢哋批評騰訊表面原因，內裏包含咗佢哋覺得騰訊估值高，估值高自然要求高，甚至有點高到不能達致地步，所以連盈利增長60%都話唔夠好。再者，騰訊為咗不斷增長，動用好多資金入股其他公司，呢啲投資部份帳面有潛在損失，而且騰訊仲要大力燒錢去支持這些公司，慢慢形成壓力，所以騰訊要不斷搞分拆來籌集資金應付，咁樣等於會增加呢類科技股票供應，同時亦好依賴市況要保持興旺，如果資金成本繼續因為加息增加，慢慢就會對需要大量投入的科網股形成壓力。
大行係密底算盤，樣樣都計過數，但一般投資者反應就唔係咁，借住好消息，騰訊股價無懼大行吹淡風彈升，主要係內地散戶仍然保持舊記憶，對騰訊興趣十足。內地人對騰訊產品接觸多，你話估值貴佢哋未必識睇，亦未必感覺到，但騰訊產品好多人用，佢哋就實實在在感受到，所以佢哋覺得由高位跌近兩成好抵買，所以見到靚靚業績就即刻郁手。騰訊喺大股東減持前，股價基本上係大小戶齊齊睇好，現在就變成大小戶睇法有啲分歧，股價走勢相信都反映呢個變化，好難學似去年一口氣咁上升。
醫思診所未開市值先升20億
騰訊交出靚靚業績，市場本來估計大市會搶番高，但結果表現唔係咁，說明市場係有市場規律，騰訊業績有驚喜，資金就沽番其他股份出來獲利食吓胡。美國總統特朗普喺劉鶴同美國代表開會前，忽然發文話美國傳媒亂報貿易談判消息，聲稱美國會堅持立場，下午恒指借勢回落，騰訊升幅都稍為收斂。恒指跌穿31000點關，收報30942點，跌168點；國企指數收報12278點，跌161點或1.3%，成交1113億元。騰訊(700)
收市升3.7%，收報411元。藥業股炒完大股炒吓細股同概念股，阿里健康(241) 
逆市急漲26.13%，收報5.6元，成交仲超過10億元。
阿里健康啱啱公佈，截至三月底止全年業績，股東應佔虧損1.07億元人民幣，去年同期蝕2.08億元。期內收入24.43億元，按年上升4.14倍。集團主打係發展健康產品銷售和電商平台業務、提供產品追溯平台、探索智慧醫療和個人健康管理服務，同時係醫療健康大數據和人工智能領域積極佈局。阿里健康咁炒作，可能亦同本港綜合醫療集團醫思醫療(2138)
一話與騰訊旗下「企鵝醫生」簽訂戰略合作協議，計劃於香港開設全科醫療機構，股價昨日暴升62%有關。醫思預計今年下半年將在本港開設兩間診所，未來兩至三年計劃共開設20間；選址傾向於居民密集地段，而非商業區，將視乎地區居民人流等因素決定診所面積。消息公佈醫思股價升至六元收市，市值升咗22億元，開20間診所咁值錢，對於呢類股份，炒家說法係「不要問、只要信」。
陸羽仁
動物兄
2018啦…………SIGN
發展商算無遺策
2018年05月17日
美股終止多日連升，杜指收市回跌193點，主要係美國零售數據強勁，市場關注美國加息步伐會否加快，加上10年債息又升穿三厘心理關口，美股受壓回落。金管局又再入市買港元，亦加重市場心理負擔。
正如陸羽仁所講，美國經濟好就變成股市不明朗因素，因為大家怕央行加息減低通脹壓力。從美國勞工同設備使用率睇，呢個係無可避免趨勢，股市就會喺矛盾中波動漸進，直至經濟見頂。呢個過程中，股市會先炒上然後率先回落，10年期美債價格回落，有說法係中國停止或減少咗買美債，但唔講中國因素，美國利率向上，咁資金自然要求債券回報提高，以反映機會成本增加，即係要跌低啲價先至肯買債券，可以估計10年債息升穿三厘同時企穩在此之上係遲早之事，O依家只係等市場慢慢適應呢個水平而已。
美息向上，港匯自然受壓，金管局又要出來維穩。相比月前資金流走速度，O依家港元受壓未算太明顯。同樣資金流出，拆息向上都係可以預見，現時同樣係等市場去習慣。
覓地小組被人「兜篤將軍」
港元拆息向上，金管局總裁陳德霖話，預期超低息永遠維持係不切實際。就喺息口向上日子裏，本地最大發展商新地(016)
出價251億元買入啟德地王，都令市場幾震驚。
陸羽仁早前披露話，新地好想要海航啟德「癲價地」，埋門一腳被恒基(012)
截胡，有啲幾猛的財金界聽咗都半信半疑，但見到新地出手買地王，出價仲高過恒基當日買海航塊地一成八，都打來問發生乜事。新地有海航的臨海靚地唔去追價買，如今卻走去高價投呢塊官地。雖然話呢塊地亦近港鐵站，但論質素有行內人就覺得，都係海航塊海景地條件勝一籌。新地願意高價追貨，一來說明佢睇好後市，二來可能佢想買直接同政府買一手地，覺得咁好過買二手。
有人奇怪，O依家覓地小組提咗18個搵地方案，擺到明公私營合作係佢哋心儀的一杯茶。若然要同私人發展商合作，新地都走唔甩實受惠，咁仲點解要買貴地呢？提出呢個問題的人，好明顯唔夠地產商深謀遠慮。
O依家政府推出官地明顯少咗，大發展商擸埋佢，將來如果要公私營合作，其他無農地的發展商根本無得玩，咁無論官地同農地，所有供應都喺幾個財團手上，咁對佢哋有乜唔好先，呢個解釋咗點解手頭最多農地的新地同恒基呢排買地最多。從佢哋角度，覓地小組就算拆咗四分一個粉嶺高球場，都造唔到幾多短期供應，其他方案根本無心做，咁公私營合作傾得成固然好，傾唔成佢哋都贏晒，呢招叫做「兜篤將軍」。
覓地小組搞咗成年，大發展商又贏咗一年時間，小組未提方案，就先打開口牌話畀香港人聽，土地短缺原來比政府估計仲嚴重喎，咁發展商仲唔出手買地收乾供應？呢啲咪叫算無遺策囉。
騰訊首季賺232億勝預期
美債息上升，雖然有賣地消息刺激，但地產股多數走低，大市開市偏軟，但由於之前一日指數已經調整，所以到下午個市有啲跌唔到落去，尾段一度倒升。恒指收報31110點，跌41點；國企指數收報12440點，跌不足1點，成交1005億元。騰訊(700)
連跌兩日，收跌0.45%，收報396.2元。騰訊公佈首季淨利潤232.9億元人民幣，比市場預期174.2億元人民幣為佳；營收735.3億元人民幣，同樣比市場預期707.8億元人民幣佳。騰訊話智能手機遊戲、支付相關服務、數碼內容訂購與銷售以及社交廣告，係首季收入增長主要動力。
教育、醫藥板塊表現較好。四環醫藥(460)
收報2.14元，升8.6%；石四藥(2005) 
收報8.53元，升6%；同仁堂科技(1666) 
收報13.32元，升2.8%；麗珠醫藥(1513) 
收報64.3元，升2.39%；金斯瑞生物科技(1548) 
收報30.35元，升4.3%。醫藥板塊市盈率普遍偏高，主要係炒增長概念，O依家港交所(388) 
仲話研究准許無盈利的醫藥股上市，加上日前有報道話，上海復星醫藥集團是諾華制藥公司價值20億美元資產的入圍競標者之一，唔多唔少引起咗跟炒效應。當然，要跟炒都要留意住神經刀特朗普，因為佢啱啱先開口話藥費太貴，矛頭指向大藥廠，好難估佢會唔會出招嚇嚇啲醫藥公司。
陸羽仁
839 高高高 三年高
貪定唔貪，賺得到先好貪😂😂😂
我家新增短炒個股提示🙏🙏🙏
入279@0.15
新版好似無左‘陸sir最近10個留言’呢個制，admin可以加返嗎？謝謝
將軍，股鵝係咪已離開鵝頸危險區脫險？
早呀~