小心升級

2018/07/05 08:41:46 網誌分類: 經濟

05 Jul

昨日係美國國慶日，股市休市。

人民幣近期急貶，在過去75日內大貶了7%。週二朝早人民幣離岸價兌1美元最低近6.7，人行副行潘功勝說「中國有基礎、有能力、有信心保持人民幣匯率的基本穩定」，人民幣匯率略為回穩，但市場只給了潘功勝兩個小時面子，回一回又再下跌，一度跌至6.73的近一年低位。

人行行長易綱接著出場，表示中央正在密切關注情況，又解釋人民幣波動主要是「受美元走強和外部不確定性等因素影響」，屬週期問題，而「當前中國經濟基本面良好，金融風險總體可控。」人民幣匯價應聲反彈，回升至6.64水平。昨日略為下跌至6.67之後快速反彈，下午最低見過6.6136，回升超過530點子。觀察市場情況，人行是出口而沒有出手。

市場現時比較關心的是，易鋼出口術令到人民幣回升，究竟係人民幣這一浪貶值已經完結，轉勢回升，還只是一下子跌得太急，中途唞唞氣而已。

不過，人民幣匯率要反轉跌勢，由跌轉升，起碼要吞掉此前一浪跌幅的一半才會確立，現時似是反覆回調的過程而已。事實上，由於中國一年出口到美國的貨品總值超過5000億美元，而美國輸往中國的貨品只有1300億美元，中國在互徵關稅上根本不夠入口貨籌碼去回擊美國，只能夠使用貨幣貶值，讓中國貨品更加便宜去抵消因關稅令到價格上升的衝擊。

美國將於今週五（7月6日）開始對價值340億美元中國貨品加徵關稅，中國已表示會等到美國正式行動之後，才作出相應反擊。相信美國對中國的制裁將會陸續有來，估計阿爺會讓人民幣匯價逐步地相應下調。

當然，人民幣匯價也不能貶得太急，因為這會令到資金迅速流走。不過，如果人民幣貶值這一招仍不足以頂住美國對越來越多中國貨品加徵關稅的影響，中國還有另一招可以用。由於中國市場龐大，當中有不少美國巨企在搵食，中國可以給予這些美企一些壓力，包括加強對美企和美國產品的管制，像美國一樣禁止或暫停美國公司併購國內的公司，事實上，中國已經開始這樣做，例如中國商務部暫停批核在中國市場年營收60億美元的美國科技巨頭高通（Qaulcomm）收購恩智浦（NXP）；另一個例子是福建福州法院上日判了美光（Micron）涉及侵權案敗訴，禁止美光在中國出售和生產近30種產品。由於美光在中國生意佔了總營收的一半以上，搞到美光股價大插了5.5%。除此之外，中國亦可以對美國以外開放市場，引入更多其他國家的企業與美國企業競爭。

特朗普對於中美貿易戰充滿信心，誇誇其談，對美國人話一定可以從對手拿到更多好處，事實上，貿易戰對任何人（政客可能例外），只有壞處，沒有好處。

小心貿易戰在7月6日開打，在周末升級。

陸羽仁

回應 (39)

我要發表

陸羽仁 2018/07/06 08:44:49 回覆

大笨袋鼠:

其實我們分析特朗普最大的盲點，係唔會站在他自己位置去思考。如果佢照一個「正常人」咁做嘢，90%機會不可以連任，照如今的做事方式，不確定性大增，他連任的機會有50%、甚至更高。你話佢傻，佢話唔做就傻。

羅記 2018/07/05 22:01:44 回覆

我係羅記, 很久沒在這回應

@大笨袋鼠本人覺得其實陸sir 分析係特朗普想爭取選票是不爭事實, 只係可以去到幾盡... 好多人覺得佢傻...好老實...問心我覺得佢好醒, 生意人識計盡, 大不了打貿易戰打到選舉完, 又再搵個藉口話同d 國家傾好曬, 美國得益又可以取消曬所有限制.

民主社會...選票是一切, 選票好多時都係人民感覺. 人民感覺好,個總統好似為自己國家長期受外國攞着數, 而家總統出頭扲返個彩 (自我感覺良好), 加上好老實...國家GDP 話之升到上十...自己份糧無進漲, 關我乜事

反而無選票支持...做乜都綁手綁腳, 成七十歲出來做總統都無懚

2018/07/05 21:31:20 回覆

順帶一提，分析經濟大國，同分析向外型細少經濟體，係可以好唔同。

响經濟學之中嘅貿易理論（依據傳統模型分析，唔係以博奕論分析），無關稅自由貿易係對一般經濟體系最有利，但係對於超級經濟大國（『經濟大國』呢個字眼，都好睇你講緊整體經濟定係個別市場，係一個有彈性嘅用詞，例如沙地阿拉伯係石油經濟大國，或者新西蘭照計係羊毛經濟大國，講羊嘅笑話都大把…　不過呢段留言係睇生產總值），就有一樣嘢叫optimum tariff，即係酌量嘅關稅係對大國有利（當年袋鼠提議人哋篇論文加腳註，若果無記錯，應該係同term of trade有關）；不過全世界個『餅』點都係造細咗

當然，一旦用博奕去睇貿易，一旦脫離互惠關係，就係走去互殘、復仇格局（術語上叫 punishment / triggering strategy，而博奕模型係"重覆"玩prisoner dilemma)；此外，貿易亦會影響地緣政治，有別於商家眼光，國家之間唔會只係單單講錢，實際環境之中，貿易同外交係不可分割嘅考量。（硬要用經濟學術語嘅話，政經互相反射，就稱之為Externalities之一啦）

無論如何，唔話佢傻嘞，民調只係短線眼前利益，等今年年尾中期選舉，甚至乎，先至知特朗普係咪真係咁叻啦。不過咁講，金氏皇朝三父子就更加叻。做傳媒嘅，而家仲有機會嘅，最好唔好俾呢啲叻人叻到有一日去壟斷埋傳媒體系嘞（除非你已經放棄the fourth estate嘅本份）。