親審劇本喬裝「大嘥鬼」陳德霖鬼馬短片推「迎新鈔」封利是

2019/01/24 04:12:43 網誌分類: 生活

24 Jan

        　　農曆豬年快到，又係Kelly去逗利是嘅季節。近年講求環保，潮流興封「迎新鈔」（即係用過但仍然新淨嘅銀紙），唔再講究封全新鈔票。為咗進一步推廣呢種環保意識，金管局總裁陳德霖（Norman）親自上陣拍短片，教人善用「迎新鈔」封利是，佢仲玩埋變身術，可說係佢喺網上社交平台嘅「處女作」。

        　　金管局呢段短片，唔係齋宣傳咁簡單，而係有劇本㗎，聽講Norman睇過之後，好認真咁修繕一番，務求盡善盡美。拍攝場景喺金管局所在嘅國金中心二期天台，有一個叫「嘥錢男」嘅西裝友，攞住一篋錢真銀紙，準備拋落街，突然「大嘥鬼」現身阻止佢，問佢做乜嘢，「嘥錢男」回應話唔想用舊銀紙封利是喎，「大嘥鬼」就同佢講：「乜你咁out㗎！」

        　　「大嘥鬼」義正辭嚴，指o依家好多人改用「迎新鈔」封利是，因為「迎新鈔」仲好新淨，而銀行換鈔票畀市民封利是，亦有四成係「迎新鈔」。「嘥錢男」呢個時候好似明白，但佢突然質疑點解「大嘥鬼」會教人環保呢？懷疑「大嘥鬼」唔係真身，呢個時候短片去到高潮，「大嘥鬼」拉下面罩，原來佢係Norman扮嘅，佢放低平時講金融、樓市嘅嚴肅表情，笑一笑，演技好好噃，Kelly覺得佢可以去競爭金像獎最佳編劇同最佳男主角獎。

        Kelly Chu