「習特會」推遲
美股週四低開低走,杜指一度大跌389點,兩度下試25000點,午後跌幅收窄,收市跌220,報25169點,跌幅0.9%,結束連續五日的升勢,標普500指數昨日亦跌0.9%,納指較弱,跌1.2%。美股昨日一跌,抹去了此前三日的大部分升幅,但和香港假期前杜指24991點比較,仍升了178點。
美股下跌,主要係市場傳出美國總統特朗普話不會與中國國家主席習近平在中美貿易談判「死線」(3月1日)前會面。昨日較早的時候,白宮經濟顧問庫德洛接受霍士商業訪問時表示,中國與美國離達成貿易協議仍有一段很大的距離(pretty sizeable distance)。不過,他補充,特朗普對於能夠達成貿易協議,仍然十分樂觀。美股朝早已經軟軟哋。
中午CNBC引述消息人士指中美兩國領導人會在中美貿易談「死線」之後很短的時間內會面,主要係兩國面前仍有很多工作要完成,而美國在2月底有「特金會」。午後,特朗曾確認不會與習近平在會談的「死線」前會面,但股市逐步反彈。
中美雙方突然間表示不會如市場所預期的時間內會面,市場惟恐生變,首當其衝的自然係被視為中美貿易關係領頭羊的波音飛機、Caterpillar及農業機器製造商Deere,股價齊跌約1%。
中美能夠達成協議,貿易戰暫停甚至收工,對全球經濟都有利,而協議可能停擺,油價亦即時受到影響,紐約期油昨日亦下滑2.6%至52.61美元,令到能源股成為跌市大輸家,標普500指數能源板塊跌2.1%,成為拖累大市的主力。
而對經濟比較敏感的科技股亦遭殃,標普500指數科技板塊跌1.4%,係表現第二差的板塊,其中FAANG幾隻科技巨頭顯著下跌,蘋果、亞馬遜和Google母公司Alphabet跌超過1.5%;Facebook及Netflix跌超過2%。
市場擔心中美達不成協議,美國將重新對中國輸美貨品加徵巨額關稅,不過,很多老外分析師的看法又不是那麼悲觀,他們認為中美貿易談判最終仍會有成果,主要原因係認為特朗普很想達成協議,因為他希望股市上升。
美股在去年12月跌到阿媽都認唔得,標普500指數一度跌入熊市區域,主要受到兩大原因衝擊:持續加息和中美貿易戰,聯儲局的加息態度已經變得較為鴿派,而中美貿易糾紛在去年12月初的習特會後,變得比較緩和,令到美股近期有番轉機。
另一點惹人關注的是,美企公布的去年第四季財報,據FactSet的資料,雖然盈利按年增加14.1%,但對今年第一季的盈利預期卻頗為悲觀,市場預期美企今年Q1盈利增長會下跌超過1%,係超過兩年以來首次出現按年下跌。
摩根士丹利投資管理的董事總經理Andrew Slimmon表示,美股現價已反映了第一季下跌,但預計Q2和Q3會回復正數,而中美貿易談判是其中的關鍵。他指出,如果Q2盈利增長還是負數,連續兩個季度出現負增長,說明美企盈利出現衰退,美股肯定有難,這也是特朗普極欲與中國達成貿易協議的原因,要為股市沖喜也。
陸羽仁
豬年炒放水
2019年02月11日
港股上周五豬年春節假後開市,由於美國總統特朗普宣佈中美峰會將會推遲舉行,市場擔心貿易談判觸礁,港股低開282點後,隨即急跌456點,低見27534點,但開市無耐已經係全日低位,其後不斷反覆向上,半日已收復大部份失地,跌幅收窄至135點,午後更一度倒升18點,最後微跌43點收市,報27946點。
如果睇收市,港股豬年開唔到紅盤,但如果睇走勢,單日走勢可以話係相當硬淨。內地還放緊年假,只有香港開市,要抽高抑或插低,純粹由大戶話事,他們想買就升,想沽就跌。從消息嚟睇,中美貿易談判感覺唔係咁良好,至少顯示中美仲有好多實質問題未解決。中美貿易代表喺今日起喺中國再開一次會,屆時都未必能解決。
周五反彈 大市底強
另外,估計特朗普都唔想中美領導人見面撞正美朝峰會,所以就推遲中美峰會。總括而言,呢個唔係利好消息,雖然唔係太壞,但由於冇內地市頂住,港股處於一個自由飛行狀態,大戶要趁壞消息插低大市,要大市跌700至800點都唔出奇。但是大市走勢啱啱相反,低開之後逐步炒上,只能夠話大戶都唔想港股跌。
正如我早前所講嘅新曆年過後,大戶似乎做咗好倉,但散戶入市情緒未濃,大市雖然升咗3000點,仍然派唔到貨,因此暫時係一個「大戶湯底睇好」嘅狀況,港股每次回吐500點左右就會反彈,唔似舊年底隨時大跌一、兩千點嘅弱勢。以走勢論港股今年開局至今,大市底子仍然較強。
目前一般估計,中美上半年可以達成貿易協議,只係期間會有波折。與此同時,中國經濟仲處於下滑狀況,財新公佈嘅12月中國採購經理指數(PMI),顯示中國經濟特別係民企部份仍然下滑,相信中央嘅托市措施會陸續有嚟。
人仔轉強 方便減息
過年前同中環茶友團年,席間講到人民幣走勢。舊年11月美國中期選舉前夕,離岸人民幣喺11月13日跌至6.9697低位,距離七算只有一步之遙;到12月2日,中美峰會後傳出樂觀氣氛,人民幣出現第一波反彈,12月4日回升至6.8211,之後反覆上衝,喺1月30日升穿6.7水平,高見6.697。
中國副總理劉鶴喺1月28至31日訪美進行貿易談判,雙方未有達成任何協議,人民幣略為回軟,最新報6.78左右。人民幣走勢既與中美貿易談判掛鈎,亦都受中央調整人民幣中間價影響。中環茶友估計,中央目標主要係想托高人民幣到6.5至6.6水平,創造減息空間。如果人民幣能夠喺減息後回吐,跌至6.8而唔穿7算,依然係一個比較舒服嘅水位。所以佢相信,人民幣上升,除咗受中美貿易談判利好氣氛影響,亦有中央主觀因素使然。
對於中央會唔會快速減息,有兩派意見。巴克萊銀行經濟學家早前表示,中國經濟數據迅速惡化,將促使中國央行最快喺農曆假期前2月1日減息,但人行結果冇咁做。值得注意嘅係,巴克萊銀行喺2014年彭博調查中,唯一估中人行喺當年減息嘅機構。巴克萊銀行估計,人行今年會喺第一同第二季,分別兩次各減息0.25厘,原因係美國聯儲局已經採取更有「耐心」嘅加息立場,顯示美國加息周期快將停止,人民幣喺一月以來嘅強勁表現,已經消除中國全面減息,會令人民幣匯價急跌疑慮。
另外,花旗投資同樣認為,美國聯儲局態度轉鴿,人行即將減息。花旗認為,12月中國PMI跌破50,進入萎縮區域,中國第四季經濟增長放緩至6.4%,係2010年以來首次低過6.5%,中國通脹已開始放緩,好快就會出現通貨緊縮。雖然人行致力發明新嘅政策工具,確保寬鬆政策能夠有針對性實施,但目前效果有限。所以花旗認為,官方會直接減息,改變貸款同存款利率。由於人民幣匯率穩定同資本管制,可以減輕中國減息令資本外流嘅憂慮。再者,美國聯儲局嘅鴿派立場,好可能會消除人民銀行減息嘅最後疑慮,花旗因而認為中國央行將會減息。
美國轉鴿 創造空間
不過,內地都有一啲反對減息聲音,例如話中國目前一年期存款低過1.5厘,再減息的話,將會影響存款總額。同時,中國利率未轉向市場化,利用貸款同存款利率管理經濟,效果可能會適得其反。
總括而言,我覺得美國聯儲局態度轉鴿,中國喺第一季有相當機會減息,減息未必即時有好大作用,但係象徵意義就相當大,係一個明顯寬鬆政策,會觸發市場對減息預期,預計今年仍會再減息,令市場投資意欲增加。如果減息的話,對包括股市在內嘅投資市場會有較大刺激。若問上半年有咩可以炒,主題應該係炒中國放水。
講完大環境講吓個股。每年開局煤氣(003) 都會向好。有朋友係投資專家,佢媽媽雖然已屆93歲高齡,但仍然精神奕奕,炒股不絕,我同朋友媽媽拜年,老太太好自豪咁話,「阿仔經常叫我唔好買煤氣,但我照買,成為我最賺錢股票之一。」朋友喺旁邊聽住,為之吹脹,煤氣32倍市盈率,但散戶照買,股價照升,你叫人唔買,佢就同你作對啦。
煤氣股價 愈貴愈有
上周五煤氣創出8月以來新高,收報17.34元,逆市升1.5%。好多散戶經常問我買煤氣好唔好,我都會股神巴菲特上身,話煤氣市盈率達32.4倍,股息率僅1.8厘;如果買股長揸,點解唔買市盈率得16.3倍,股息率有3.2厘嘅中電(002) 呢?不過,扮股神係冇好下場的,煤氣年初走勢通常都好好。股民無懼32倍市盈率咁貴,繼續追入,令貴者更貴,愈升愈有。道理很簡單,煤氣除咗派息,每年仲會十送一紅股。送紅股這招本來係一種無中生有嘅手法,十股變成十一股,每股盈利、派息都會攤薄,股東實質上攤佔嘅權益冇變,但「橋唔怕舊,最緊要受」,股民對市盈率、股息率都冇咩感覺,只對股價有感覺。派送完之後,一年過去,股價又會上返嚟,甚至到更高水平。散戶嘅感覺係,送出嘅紅股係真實,平白賺咗10%,煤氣就是憑呢招長久跑贏中電,以市盈率計,仲跑贏中電成倍。我又唔明中電,點解唔照辦煮碗送紅股呢?
炒送紅股 還有恒地
我O依家學精咗,唔再唱衰煤氣,有人問我,我會話可以策略性購買。煤氣喺舊年3月20日公佈末期業績,6月8日除淨,喺6月22日派發。喺公佈業績後、除淨之前,煤氣繼續炒上。到除淨之後,股價回吐一兩個月左右,之後雖然再上,但到10月左右再度回落,到11月之後再向上。由此可見,煤氣嘅上升周期係每年10月至翌年5月左右,而回落周期在喺除淨後大約三至六個月。因此,玩煤氣方法係炒波幅,喺年底時買,到宣佈業績、派息送紅股後,見高位就沽,千祈唔好喺送紅股除淨前一兩日買入,因為除淨之後嘅一個月,都係股價嘅下跌期。
唔想買32倍市盈率呢類高危股票,其實可以考慮同系持有大量煤氣股份嘅恒地(012) ,雖然股份類型完全唔同,煤氣係公用股,恒地係地產股。恒地勝在市盈率正常,市盈率6.5倍,息率都有3.5厘,比較同類地產股新地(016) ,市盈率7.6倍、息率都係3.5厘,新地市盈率更高。新地舊年10月見低位99.5元後,現價131.2元,差唔多升至全年高位132.2元,但係恒地就冇升得咁多。恒地舊年10月見36.15元低位,現價44.75元,仍較一年高位48元為低。我之前喺恒地股價低迷時,曾經建議大家可以買入,主要係除咗炒地產股反彈,仲可以炒恒地繼續十送一。
恒地舊年3月21日公佈末期業績,繼續十送一紅股,喺6月5日除淨後,股價大幅下插。可以話,除淨之前仲係安全期,千祈唔好等除淨日前買入博送紅股,反而應該早幾個月買入,喺宣佈業績後,炒上之後炒波幅走人。睇走勢,港股可能仲有兩、三個月可以玩,利用業績期走一轉,豬年應該可以搵番餐「晏仔」。
陸羽仁
Kathleen,have a good weekend!
後生時學英文成日聽,只係注意話啲風在笑牛仔唔似燕子可以飛,無留意畫公仔畫到出腸嘅含意
而家資訊發達,上網除咗可以揾番首歌,多咗唔同版本之外,而家袋鼠先至知道首歌,有一段故係有番咁上下歷史,同埋之前香港有集會用過。如果佢嚟香港唱歌嘅話,唔知批唔批7日逗留?
買金不如買建行走波幅
2019年02月09日 (11:30 上午)
中原城市領先指數 CCL
(所有成份屋苑)
2028...
SIGH...
各位
將軍 今年有冇利是股
出入謹慎 .... 求財不遂
將軍,新年快落,島形頂?
各位豬年橫財就手,身體健康,萬事如意
各位早