期間限定打卡熱點超大型COMPANION公仔明日游到中環喇！

2019/03/21 04:12:16 網誌分類: 生活

21 Mar

        　　《KAWS:HOLIDAY》巨型充氣公仔COMPANION，選咗香港作為亞洲巡遊嘅第三站，好多粉絲熱切期待。呢個風靡台灣同韓國嘅戶外藝術大公仔，早幾日抵港，熟悉香港環境之後，昨日終於落海，慢慢游，明日就會游到中環海濱區啦，展示佢優美嘅睡姿，「瞓畀大家睇」！愛打卡嘅你，仲唔快啲去朝拜。

        　　主辦單位話，呢個美國藝術家KWAS代表作品COMPANION，高三十七米，連浮台重四十噸，係KAWS最大型嘅臥姿作品，以全新灰調、躺臥姿態登場。佢來港幾日，喺青衣船廠充氣變大之後，昨日喺青衣落水「測試水溫」，稍後會游去中環海濱區。

        　　如果大家想快啲見到佢，主辦單位話可以明日下午兩時十五分來中環海濱長廊海旁，一齊迎接佢施施然游來。如果到時唔得閒都唔緊要，佢會一直瞓喺該處海面十日，直至今個月三十一日，等大家慢慢取個靚角度，盡情地打卡。

        Kelly Chu