差小小

母親節, 黃SIR一家三口外出午飯, 處處爆到七彩, 連最熟個間POKKA COFFEE都話黃生: 今日恐怕要等半粒鐘以上了ｏ 冇計啦, 打退堂鼓ｏ

誰知轉一個彎, 有間嘢, 叫做什么牙妙手ｏ 嘩！冇乜人添！空了了, 大把位ｏ發達咯, 即刻有得食！心想易牙先生, 就係劏咗自已個仔, 煮D鮮味嘢俾齊桓公食嘢嘅奸臣, 人就奸D, 但煮嘢食就有一手！應該有料到啩？

入到去, 招呼都算唔錯, 原來賣台灣餸, 即刻叫碗台灣最出各的牛肉麵歎吓, 一杯珍珠奶茶ｏ

誰料牛肉麵一到, 全無熱騰騰感覺, 暖暖地, 好似D湯冇熱番就煮出嚟, 味道都OK, 只係差小小ｏ 珍珠奶茶又係, 茶味差小小, 奶味差小小, 連隻杯都細小小！唔怪得人客都得咁少啦！

唉！呢個世界有D人就唔知, 做乜都要全情投入至得格, 樣樣差小小, 就差好多啦！

最近去聽一個演唱會, 有位據稱係教曲的女師傅, 又係音準差小小, 腔口差小小,拍子差小小, 外形差小小, 總之樣樣都差小小, 整體睇落, 似乎演藝事業都唔係點啱佢嘞！而且誤人子弟也！

黃SIR好多時買三T, 買六合彩, 都係差小小, 一毫子都冇得收嫁！

唉！差小小！