經濟死局
上週五美股高開低走，杜指朝早升過370點之後一路下滑，以倒跌208點收場，收25871點，跌幅0.8%；標普500指數跌0.5%，收報3097點；納指靠穩，微升3點，收報9956點。上週美股表現不俗，杜指升1%，標普500指數升1.8%，納指表現最勁，累升3.7%。但要留意的是，納指跑贏大市，繼續由幾家科技龍頭股帶動，其中微軟上週升3.9%；Facebook升4.5%；亞馬遜升5.1%；Netflix大升8.5%。
美股上週五朝早大升，主要係彭博社報道，美國國務卿蓬佩奧和中共中央政治局委員楊潔篪在上週三在美國夏威夷會面之後，中國將按今年1月底達成的首階級貿易協議，加速制訂向美國購買農產品的訂單，報道緩和了市場對中美近日就新冠疫情駁火引起中美貿易關係變得緊張的憂慮。
不過，隨後傳來美國的疫情持續惡化的消息以及聯儲局官員們對美國經濟的悲觀言論，而上日公佈的最近一週首次申領失業人數未有隨著美國經濟重啟而大幅下降，加深了市場對經濟復甦遙遙無期的恐懼，令到美股見頂回落，收市由升轉跌。
美國上週四公佈最近一週的首次申請失業救濟人數為150萬，較前一週減少5.8萬，但下降速度少過市場預計將降至130萬人。Wrightson ICAP首席經濟學家Lou Crandall解釋，「隨著經濟重啟，工人被召回，6月的就業崗位可能會出現淨增長，但隨著企業根據新的疫情現實進行調整，仍有源源不斷的新裁員出現。」截至5月30日當周，通過所有計劃領取失業救濟的總人數為2920萬人，較金融海嘯時期的峰值高出超過一倍。有資料顯示，從製造業、零售業、資訊技術到石油和天然氣生產等行業，企業都宣佈了裁員。
而分析員警告，當政府補貼企業的薪資保障計畫(payroll Protection Program) 一旦結束，裁員將加速。Navy Federal Credit Union的企業分析師Robert Frick表示：「隨著未受新冠疫情導致的停擺直接影響的行業開始裁員，對第二波裁員的擔憂似乎已經開始出現。」由於疫情在全國爆發，令到州和地方政府的預算亦因抗疫而受到重創，政府各部門也在削減工作崗位。
令市場擔心的是，從聯儲局主席以至多個聯儲區域的話事人，對美國經濟的復甦，顯得不甚樂觀，鮑威爾上週五表示，「美國經濟從新型冠狀病毒疫情中復甦將面臨挑戰，不存在快速解決辦法。」至於如何加快經濟復甦的方法，除了繼續放水之外，就是加大放水力度去支撐市場和經濟。繼鮑威爾發話之後，包括副主席克拉里達等多位官員都表示，「美國經濟復甦可能比預期更慢，需要提供進一步財政和貨幣政策支持。」
波士頓聯儲銀行主席羅森葛蘭話，美國失業率今年內可能底仍會處於「兩位數水平」；明尼亞波利斯聯儲銀行主席卡什卡利則擔心，今年秋季可能出現第二波疫情，失業率將再次上升。又警告稱，如果經濟低迷持續下去，銀行可能會受到衝擊。因為「情況持續的時間越長，銀行面臨的損失就越大。」他認為大型銀行雖然擁有較2008年金融危機前更多的資本，但可能還不夠。」他呼籲銀行可以效法歐洲的銀行，停止支付股息去增加資本。
搞來搞去，美國仍是一個經濟死局，要靠聯儲局大放水支撐，似乎只有科技股，較少受疫情影響，所以在大放水下，盲炒科技股的原因很明顯。
陸羽仁
《國安法》炒股藍圖
2020年06月23日
仲有一個星期，上半年就會過去，中環茶友有個問題，就係半年結來臨應否沽貨。茶友呢個問題主要係因為港版《國安法》好大機會趕喺七‧一前出台，所以要諗諗是否應該趁機減磅。
《國安法》上星期提交人大常委審議，外界關注跟住會否公佈全部條文，最後官媒只係參考人大法工委嘅講解出咗新聞稿，交代咗法案重點，包括法例有凌駕性、特首會挑選法官、在港成立國安公署、特別案件可能交由內地審訊。茶友唔講政治立場，關注法例會唔會引起投資震盪。呢個問題嘅答案，唔係中央能夠解答，反而係要睇西方，特別係美國嘅反應。
細節出台 需防萬一
從方案至今披露出來嘅細節，人大立法好注重包底，即係唔怕一萬，最怕萬一，好似案件可能由內地審訊，就係防止一旦涉及重大國家機密等極嚴重事件，有權返回內地審訊。從呢種心態，估計出嚟嘅詳細草案軟極有限，中央雖然希望盡量減低西方對立法嘅抗拒，但可以退讓嘅空間有限。由人大議決立法至今，美英回應有啲雷聲大、雨點小，美國雖然話會考慮制裁，但一直未有具體詳情，上星期美國國務卿蓬佩奧同國務委員楊潔篪會面，大家傾咗6、7小時，雖然事後傳出雙方有齟齬，但就唔見總統特朗普真正出招，估計白宮好可能係等整體法案出台，先一次過回應。喺同一時間，中國就啟動向美國購買小麥，展露出降溫傾向。
有熟悉美國政治操作嘅猛人估計，人大為香港立法，美國唔可能無動作，如果美國提出制裁個別大陸官員，以至收緊香港高科技進口，呢樣屬於預計範圍內嘅結果，消息好大程度已經消化，真正敏感嘅係喺金融領域上出招，佢相信出招嘅機會仲係較細。
目前已發展國家對中國嘅態度係你眼望我眼，因為大家都唔想失去市場。美國係最殺聲震天嘅一個，其回應劃出咗反對措施嘅上限。大陸今次向香港落政治重藥，都明白會帶來難以預測嘅政治風險，所以立法之後，好大機會宣佈一啲利港措施，以防政治震盪帶來嘅衝擊太大，所以好可能條文出台同美國宣佈制裁，就係壞消息最猛嘅時間，然後視乎情況變化。
如果《國安法》真係七‧一前後出台，按照呢個立法如何去制訂炒股藍圖，就要睇本身嘅持貨能力，為萬一出現惡劣局面做準備。若然本身現時揸到成手股，當然就唔可以當立法嘅政治風險無到，因為正路個市都會插落嚟，手頭無資金可以低吸，處境就會好被動。正常而言，喺壞消息公佈前大市好難猛升，故此策略不宜太勇，反而如果形勢同估計發展相似，消息明朗時就有機會低吸博炒利港措施。
個別大股已見利好政策
受美國股市上周低收影響，港股偏軟，跌幅一度超過200點，隨美股期貨下午回升，恒指跌幅稍為收窄，報24511，跌132點；國企指數收報9879，跌95點，成交1199億元，個別大股已受內地利好政策消息刺激道逆市造好。藍籌表現最搶眼係港交所(388)
，急升3.7%，收造311.6元。中概股回流暫時稍歇，但仍不斷有醫療股上市，港交所短期不愁熱鬧外，仲傳出內地批准A股在港發行衍生工具，若然成事，在港炒衍生工具吸引力當然比較高，帶動該股成為最先挑戰新高嘅強勢股。除咗港交所，內地創業板註冊制首批企業將亮相，同時下月推出上證科創板50成份指數，市場預期有望吸納海外資金，變相利好內地券商股，光大證券(6178) 
急升5.4%，收報5.27元；招商證券(6099) 
抽高4.75%，收報8.59元；中國銀河(6881) 
飆4%，收報4.21元。另一隻逆市升嘅友邦(1299) 
亦因為上海分公司已改建為人身保險子公司嘅申請獲批，收升1.8%報73.1元。
另一突出板塊係金礦股，主要受惠於金價造好，紐約期金曾炒上1753美元。美國又話再推刺激方案之下，大行睇盎司金價可以挑戰2000美元，推動金礦股向上。山東黃金(1787)
急揚4%，收報21.85元；招金(1818) 
升3.4%，收報8.7元；紫金(2899) 
走高2%，收報3.42元；中國黃金國際(2099) 
走高2.2%，收報3.76元；SPDR金ETF(2840) 
漲0.87%，收報1272元。
陸羽仁