7月尾部署結算位

轉倉活躍, 明日結算前夕, 部署結算位

28/7 周二恒指收報24772, 升169點, 收復50天線, 國指連續3日跑贏恒指

恒指大幅高開即插, 已是連續3日收陰燭, 收市抹去一半升幅, 走勢雖然差, 不過結束兩日跌勢並收復50天線, 可能係好友部署後日結算, 所以力撐大市, 恒指由月初高位已回吐2256點, 唔少股份都跌到殘, 超賣作出反彈, 淡友亦夠水位回補空倉, 亦唔排除有趁低吸納買盤

大鱷及大媽咬住24800唔放, 代表仍想上25000(阻力10.20.30天線在25000~25400), 牛熊愈來愈貼價, 熊熊不斷下移至25000附近, 23500~24500牛牛亦引死大鱷, 不過由於今個月恒指波幅已達標, 冇必要今個月見24000, 肥牛留番8月才吃都得, 死貓彈完, 下個月才尋底, 尋底市底頂下移, 高位一瞬即逝, 博反彈係逆勢, 不可大貪, 一彈即走, 否則坐艇, 正路市弱彈沽造淡, 下周一(1/8)匯控公布業績, 驚驚, 不過月中輪到QQ公布業績, 或會有買盤炒QQ業績

我認為24500有特別意義, 回顧5月下旬阿爺放風推出港區國安法, 當時恒指由24500水平急瀉, 低見22519止跌回升, 兩個星期後又重上24500水平, 這就可解釋為何今個月由高位多次碌到落24500都死唔去, 呢個水平亦剛好是50及60天線所在, 所以早前估計好友點都要守住24500撐埋結算

今次跌浪恒指曾失守50天線, 但國指一直守得住, 國指力守10000大關, 恒指亦得以守住24500, 國指10000大關不容有失, 否則恒指就會深潛, 由於美國率領多國圍堵中國, 8月港股形勢不容樂觀, 24500/10000久守必失, 候高部署淡倉等8月深潛

按照慣性走勢, 收升日多數在下午創即市高位, 但今日卻在午後創低位, 代表買盤弱, 沽壓沉重, 一彈就散, 不過好友於尾市踢番大市上去, 恒指仍能高收, 相信係部署結算位, 成也QQ.敗也QQ, 留意QQ表現就能推測即市港股走勢, 下周公布業績的匯控破位而下, 走勢差劣, 幸好有大媽睇場, 要不是大媽狂掃QQ, 今日港股就收跌了

匯債方面利淡, 美元插穿94, 弱得過份, 避險貨幣日圓走強, 美國十年期債息再度失守0.6水平, 人民幣連跌3天, 恒指連續兩日在24800穿梭引牛熊入局, 24500~25000等爆邊來擴大周波幅

~~~~~~~~~~~~~~~~~~~~~~~~~~~~~~~~~~~

舊經濟股資金轉投新經濟股

7月下旬恒指多數係日升日跌, 市弱未見過兩連升, 今日升, 明日應跌, 如能收升, 即係連升兩天, 係利好訊號, 明日結算前夕照計好友應踢上去部署結算位, 按照慣性走勢, 未來3天不會全升或全跌, 通常係升1~2天, 無論本周收升或跌, 多數會在周三四五創本周高或低位,

近來港股走弱, 落到今個月波動區間底部, 主因係本港疫情惡化+中美交惡+黑暴禍港, 商鋪紛紛結業, 旺鋪大幅減租亦乏人問津, 經濟衰退, 百業蕭條, 資金撤出舊經濟股轉投新經濟股, 銀行地產股捱沽拖低指數, 由於美股納指牛氣沖天, 資金流入本港的新經濟股, 由於成份股當中舊經濟股佔比重高, 因而拉住港股後腿, 一彈就散

舊經濟股受冷待, 今日多隻權重成份股都逆市下跌, 走勢差劣, 要不是上証收升, 以及大媽狂掃QQ撐市(升$23.5收$543.5), 今日港股就收跌, 結算周變數多, 多數係急升急跌, 大幅波動, 後日(周四)聯儲局公布議息結果及期指結算, 禍幅難料, 因議息後匯債通常會有異動, 唔知大媽會否托市, 以及上証守住3200是否重拾升軌, 好友或會撐埋結算

~~~~~~~~~~~~~~~~~~~~~~~~~~~~~~~~~~~

中港股市7月高低位

港股於月初的資金市已確定結束, 目前呈反覆向下尋底格, 不過月尾有結算因素, 所以咬住24800唔放, 8月如果又係2200點月波幅的話, 就要繼續坐過山車, 向地獄區進發(有關政局及詳細利淡分析請重溫上一篇網誌~臨危托沽.後市不妙), 以大鱷操控大市的一貫手法, 7月初推高大市俾好友大賺, 跟住就要好友嘔突盈利, 十個股民九個輸, 炒股輸身家易過發達

恒指雖然於昨日(27/7)破底創7月新低24527(2/7低位24563), 但國指冇破底, 走勢明顯比恒指強, 皆因內地股市高企不下, 國指於24/7低見10033(7月底9789), 國指冇創新低, 代表港股今個月有望收陽收升, 後市方面, 只要國指走強, 恒指跌極有個譜

7月份大戶加權平均開倉水平分別為24352/9757, 如果7月是好倉底, 就不應跌穿呢個水平來結算, 加上內地股市7月大升, 兩地股市同步升跌, 港股理應跟隨收升, 即係31/7會收24427/9758(6月收市位)之上, 7月份有國安法大媽護盤, 收升機會大, 不過8月失去托市誘因, 係高危月

中港股市高低位

恒指

02/7低位24563
07/7高位26782 頂
27/7低位24527 底

國指

02/7低位9789   底
07/7高位10934 頂
24/7低位10033

上証

01/7低位2985  底
13/7高位3458  頂
27/7低位3174

~~~~~~~~~~~~~~~~~~~~~~~~~~~~~~~~~~~

成也上証/QQ.敗也上証/QQ

老外連續6日沽A股走鬼, 不過一直捱沽的內銀內險A股的沽壓已明顯放緩, 只要穩住A股, 有助穩住港股, 上証收升22點, 收3228, 力守3200大位, 由2月起, 上証連跌兩周例彈, 即係本周上証會收升

上周五內地股市急挫, 上証大跌128點, 收3196, 大媽要班資回朝救亡, 無暇護盤撐港股, 當天港股亦插水, 但上証大跌後連升兩天, 港股又見大媽護盤手影, 例牌掃QQ

上証及港股多數係同步見底, 上証今日冇跌穿昨日低位3174, 港股因此亦冇跌穿昨日低位24527, 係同步, 如果昨日低位24527是周底, 就要上25000來擴大周波幅, 本周可能做細波幅, 本周細波幅, 下周就會大波, 好友牛牛命危

雖然技術上失守25000會見23800~24000, 但到今日為止恒指月波幅2256點(24527~26782)已達標, 未來幾日冇必要深潛, 不過8月開新局, 冇左結算托市盤, 好友就要小心了

恒指今年上旬月波幅:

(跌) 一月 2879 (暴跌月)
(跌) 二月 2066
(跌) 三月 5666 (股災月)
(升) 四月 2099
(跌) 五月 2247
(升) 六月 1764
(收升機會大) 七月 2256點 (到27/7為止)

恒指每周收市位

05/6 24770 升
12/6 24301 跌
19/6 24643 升
26/6 24550 跌
03/7 25373 升
10/7 25727 升
17/7 25089 跌
24/7 24705 跌
31/7 ????   跌

29/7周三恒指收24883, 升110點, 連升兩天, 部署明日結算位

港股弱勢已成, 底頂下移尋底格, 上周五(24/7)10天線已跌穿20天線, 發出死亡交叉利淡訊號, 24500久守必失, 100天線約在24300亦危, 勢必向保歷加通道底24200進發, 以8月份的月波幅計, 由3月延伸的中期升軌約在23900水平亦未必守得住, 至於會否回補1/6上升裂口23089~23540就要看上証表現, 阿爺好.港股好, 如果連阿爺都反艇, 港股就危, 只要上証仍處牛市, 就會成為港股的後盾, 當國指連續3日收市失守10000關鍵大位, 就係恒指深潛的前奏

本來計劃造淡等8月食大茶飯, 但人民幣/港匯都走強, 上証守得住3200, 所以縮手, 等埋結算死貓彈才開淡, 入了正股博反彈超短炒, 仍然覺得大鱷會推上25000, 因為大位不會一去冇回頭, 點都會有吻別, 美國十年期債息再度失守0.6水平, 金融股首當其衝, 避險貨幣日圓走強, 金價屢創新高, 代表市場避險情緒升溫, 人民幣結束3日跌勢, 收升75點子報6.9997, 港匯再觸強方兌換保證, 金管局入市注資31億元,

恒指連續3日都係衝上24900後高位一瞬即逝, 淡友愈來愈心紅, 反而要慎防係個局, 引淡友熊熊進場, 然後挾淡, 淡勢太明顯不宜盡信, 以短線計, 假如我係大鱷, 本周推上25000殺熊就唔使破底都有得開餐, 好過創新低嚇到冇人入市接貨, 呢幾日都見大鱷低位收貨的手影, 不過買盤並不積極, 估計本周要伸多一腳上去25000屠熊, 然後拖到8月開新局才繼續尋底之旅

~~~~~~~~~~~~~~~~~~~~~~~~~~~~~~~~~

周四五係創本周高低位的時間窗口, 目的係擴大周波幅, 上証已連升3天, 升勢過急, 如回吐就會拖低港股, 明日期指結算, 主要在上午推高結算計價, 午後禍福難料, 按照慣性走勢, 未來兩天不會全升

過去3天恒指高低位24527~24972, 本周波幅只得446點遠遠未達標, 即係未來兩天要爆邊, 理應向上升穿24972來推高結算價, 不過向上阻力重重, 10.20.30天線聚集在25000~25400, 上証及港股多數係同步見底, 上証冇跌穿周一低位3174, 港股因此亦冇跌穿周一低位24527, 係同步

美國多間大型科網股亞馬遜，蘋果，Alphabet和Facebook科技股將會於未來兩日公佈季度業績, 美股勢必大幅波動, 本周五美國公布GDP, 唔慌好, 小心小心

港股高開低收, 單日轉向呈大陰燭, 秒殺小熊即回

30/7 周四恒指收報24710, 跌172點(最多下跌267點, 一度上升314點)

國指收報10097, 跌87點(最多下跌116點, 一度上升75點), 國指跑輸恒指

8月期指結算價24557
8月國指期貨結算價10043

由於7月的月波幅已達標, 明日冇必要深潛來擴大月波幅, 理應預留多些波動空間俾下個月, 所以好友一直守住24500關鍵位來吸引買盤進場, 大位不能有失, 否則斬倉盤湧現就會拖低大市, 按照慣性走勢, 上証穩守3200有助穩住國指, 只要上証企硬不插, 就可撐起港股, 明日周五是黑期.月結.畫周及月線的日子, 希望大媽.阿爺及好友生生性性撐埋佢, 下個月才落地獄

周五(31/7)月結關鍵位, 如收於其上, 好友勝, 港股升跌關鍵在QQ/上証:

恒指: 24427/24527/24563/24705

國指: 9758/9789/10033/10080

美國牽頭的五眼聯盟威逼利誘馬來西亞.印尼.越南等東盟成員國組成新八國聯軍圍堵中國, 指中國聲稱對南海水域擁有廣泛的歷史主權的說法無效, 南海局勢升溫, 港匯及人民幣雖然走強, 但資金流反映股市有隱憂, 避險的日圓金價愈升愈有, 美國十年債息失守0.6%後續瀉, 當美國十年期債息向上走, 股市好, 當美國十年期債息下行, 股市危

港股高開低收, 單日轉向呈陰燭, 連跌兩天, 繼續尋底之旅, 部署屠牛

31/7 周五恒指收報24595, 跌115點(最多下跌176點, 一度上升228點), 失守50及60天線

國指收報10040, 跌57點~收市U盤最低位, 一度上升120點, 失守50天線, 國指跑輸恒指

上証本周報復式反彈3.54%, 結束兩周跌勢, 18個中國主要指數全面急升2~6.4%, 升幅驚人, 人民幣今日亦急升270點子報6.9794, 創近5個月新高, 7月份累計升1.4%, 上証低開高收, 單日轉向呈陽燭, 收升23點報3310, 靚絕, 但港股竟然反常地唔跟升, 本周收陰收跌, 連跌3周, 一般來說, 上証走強港股不會深潛, 今日港股走勢十分奇怪, 應升不升需防跌, 國安法大媽7月守24500任務已完結, 下周就要插穿24500, 向24000進發

港股連續兩日都飛天遁地, 有洗倉走鬼味, 恒指近全日低位收, 失守所有平均線, 7月份托住24500任務已完成, 下個月要深潛了, 下一站100天線約在24300, 如果隊穿, 就要下試23800~24000, 由於7月份港股近全月低位收, 收得太低難以估計8月收升或跌, 如收跌, 有可能係8月初先推高尋頂, 如收升, 有可能係8月初先推落去尋底, 唔識估, 總之下周一開市造淡, 博港股碌落山屠牛