4~8/9 24500穿梭

2020/09/04 21:32:02 網誌分類: 經濟

04 Sep

港股低開低收, 大舉屠牛, 繼續尋底之旅

4/9 周五恒指收報24695, 跌312點(最多下跌519點), 100天線穿梭

標普500指數8月份大升7.6%, 為30年來表現最好的月份, 道指連升5個月, 8月份美股連日燒煙花, 踏入9月, 虛火派對終於結束了, 恒指連升3個月, 上升時間已超標, 即係升過龍, 世上沒有只升不跌的股市, 殺完淡友殺好友, 近來的網誌已多次提醒大家要小心港股反艇, 好友已撤退, 大鱷正在洗倉散水中, 老外也沽出A股散水, 本周北向資金流出222.62億元, 怪不得A股反艇, 老外走鬼反映資金流有變

有中美股市的托市盤, 以及大鱷愛好淡通殺的習性, 港股會係急跌急彈反覆向下尋底, 就好似今日由低位24488拗腰急彈上24814, 扮跌唔落來引好友入局, 按照大鱷操控大市的一貫作風, 不會插一棍就收工, 一不離二, 港股下殺危機未除

原先元帥的劇本係8~9月港股跟隨美股向上, 10月全球股市暴跌, 但如今港美股市都提早完成推升任務, 31/8恒指見頂, 美股2/9見頂後就急瀉, 隨即掀起跌浪序幕

為何港美股市都同步於今個星期見頂呢? 因為本周係非常特別的一周, 港美股市成份股齊齊大執位, 指數變天令股份買賣出現異動, 阿里等多隻新經濟科網股加入港股指數, 成為新貴成份股, 指數基金要掃入相關股份, 導致QQ要減比重(不利股價), 但近日由於港版科技指數新登場, 發行商需要大手掃入QQ阿里等多隻科網股來發行ETF, 買盤因此推高了股價, 大鱷/大媽/基金經理就趁混亂於高位派貨, QQ阿里等多隻科網股於周初急升後, 呢兩日就暴跌

美股方面, 例如蘋果公司股份1拆4及電動車生產商 Tesla(特斯拉)股份1拆5, 推動股價進一步急升, 摩通及美銀等大行表面唱好暗裡派貨, 頭腦發熱的傻瓜投資者以為股份大平賣

蘋果和特斯拉拆細, 拆細之後的股價低了只係假象, 其實買入價低係因為買到比以前更少的股份, 並非股份大減價, 不過拆細有助吸引本來買唔起大價股的小散戶入市, 正因如此, 股民蜂湧入市掃貨就將蘋果和特斯拉推左上天價, 拆細就成為壓在駱駝上的最後一根稻草, 煙花熄滅, 美股崩盤, 反映市場恐慌情緒的VIX指數急升26.5%，為6月底以來最高位

~~~~~~~~~~~~~~~~~~~~~~~~~~~~~~~~

科技板塊燒煙花見頂回落.QQ尋底.港股尋底

踏入9月份, 恒指底頂下移, 收市升跌幅度不大, 令股民有錯覺以為港股升浪未完, 其實大市已暗暗轉勢向下, 大鱷溫水煮蛙式派貨

周二三四恆指高低位小幅下移，係陰陰跌:
周二 24995~25254
周三 24931~25239
周四 24854~25216

周五 24488~24814 (今日淡友大鱷露出真面目, 港股爆邊, 不再是陰陰跌)

上星期預測本周恒指會收跌, 因為過去一個月大鱷玩梅花間竹, 一周升一周跌, 本周輪到收跌, 那麼下周會否輪到收升呢? 這就要看中美股市，因為三地股市多數係同步尋底，目前資金流利淡, 老外大舉沽A股走鬼, 淡友借勢反擊, 下周收跌機會大(收24695之下), 好友斬倉止蝕走鬼, 導致大市跌勢轉急, 勢將要下試24167/24000, 要有極利好消息才能收復多條平均線重上25000,

今日恒指季度檢討調動, 成份股大執位, 收市U盤成交由平日大約$50急增至$496億, QQ佔比由11.48%降至10%, 最低曾見$513, 創兩周低位, 全靠大媽狂掃QQ及美團, 將科技板塊推高, 帶動港股收窄跌幅, 而今日就係第二隻港板科技指數3032登場的日子, 相關買盤就令科技板塊成為本周唯一收升的類別, 科技指數全周埋單升0.09%(本周初收升4.33%, 2/9見頂7909), 急升急回, 差不多抹去所有升幅, 科技股煙花燒完了

今早科技指數大幅低開後跌幅略為擴大見7290後隨即一支箭急彈, 但當時恒指及國指仍反彈乏力, 到午後大媽繼續大手掃QQ及美團, 推動恒指及國指上沖, 一度收復大部份失地, 惟收市U盤受恒指季檢成份股調動QQ下挫所拖累, 港股跌幅再度擴大

大媽的掃貨盤令港股跌幅收窄, 亦誘使淡友食胡回補空倉, 推高大市, 而上証急挫低見3328, 創逾一周低位後反彈, 收3355, 跌29點, 連跌3天, 收市神奇地重上3350大關, 上証收窄跌幅, 港股當然跟住上, 港股大方向走勢向下, 不過大媽的買盤以及上証往往死唔去就窒礙了港股的下跌步伐,

炒一周期權的淡友今日食胡, 亦有淡友回補空倉, 今日我家唔少網友都入貨博反彈, 一眾買盤就推動港股由低位急彈, 收24695, 保力加通道底+100天線+3月以來上升軌三線匯聚在24550~24700, 落到呢個水平果然見好淡爭持, 不過以月波幅計, 不可能守得住24500, 要隊穿24000來擴大月波幅

~~~~~~~~~~~~~~~~~~~~~~~~~~~~~~~~

尋底市每周有新低

按照慣性走勢, 尋底市每周都會有新低, 24488不會是9月大底, 因為一隻腳站不穩, 要再試多一次才會反彈, 目前港股由淡友主導, 下周就會跌穿24488創即月新低

由於阿里.小米.美團等炒過龍的新貴加入國指, 反而會拖累國指, 因為科技板塊過去兩周燒煙花已散場, 回吐壓力大增, 拖低大市, 目前QQ及港股同步尋底, 要QQ及上証見底, 港股才會止跌回升

周一(7/9)美股假期休市, 周一二港股自由行, 按照慣性走勢通常係日升日跌

2020年1~8月恒指連跌統計:

三連跌 ~ 6次
四連跌 ~ 3次

恒指亦與上証一樣(周三四五)已連跌3天, 上証由6月中起連跌2~3天例彈, 如今(周三四五)已連跌3天, 回顧今年上証只係試過1次連跌4天, 1次連跌7天創今年低位2646, 連跌日數長, 代表撤資走鬼

按照恒指及上証連跌3~4天例彈的慣性走勢, 下周初中港股市會再探底, 然後就會作出反彈, 彈完再繼續尋底

新股農夫山泉~市場稱為水中茅台.大自然的印鈔機將於周二(8/9)新登場, 當天港股成交會急增

其實反映經濟的BDI波羅的海乾散貨指數於8月中已見頂, 當時港股及上証衝到上25588/10495/3456就反艇, 但由於有期指結算因素, 以及兩隻港版納指先後上市, 發行商要掃入相關股份, 好友就借勢咬住高位唔放, 於8月尾最後兩個交易日再伸多兩腳上去創8月新高, 8月尾結算後好友已鬆人, 當上証失守3400大關, 港股就碌落山, 仍未有見底跡象, 上証企唔穩3400, 港股亦企唔穩25000/10000, 按照BDI見頂回落的走勢, 進一步確認港股已於8月見頂25847/10495

~~~~~~~~~~~~~~~~~~~~~~~~~~~~~~~~

24500神奇大位

當熱錢湧入, 股市會升到你唔信, 阻力位都攔唔住, 頻頻破頂而上, 相反, 當出現撤資潮, 股市就會破位而下, 連支持位都撐唔住, 每當跌到落大位就會窒一窒, 目的係引牛震熊, 彈上去吻別大位後就會再落山，通常大底會在該月下旬出現,

今日恒指低見24488, 觸及神奇大位24500即彈(可重溫前網誌解說神奇大位), 即市一度收窄跌幅, 閃上去24814創即市高位, 吻別24800關鍵大位再跌過, 下周就會插穿今日低位24488，本周港股立立亂，部份原因是受恆指季檢以及兩隻新科技指數的買盤所影響，要看技術性跌過龍的股份下周一開市會否作出修正

於日前網誌已作出詳盡分析, 8月份由好友出導, 所以7/8立秋見底24167後就展開反彈浪, 8月縱有回吐, 好友都力守24500大位, 誓要撐埋結算, 不過踏入9月份, 元帥認為9月份由淡友主導, 過去幾日港股未插係因為淡友要等利淡催化劑才有藉口出手, 既然淡友當道, 24500神奇大位及8月低位24167就好難守得住, 不過24500已見淡友回補空倉, 再插落去的話, 相信會吸引買盤進場, 只要守住24167, 技術派就會看好, 買盤就會進場幫手撐市,

一直說過去幾周 soho blog 登上頭條人氣榜唔係好事, 近來更由人氣榜四.五位進升至第三位, 係利淡訊號, 代表8月份散戶入市意慾高漲, 又或者接到成手蟹貨, 試想想, 假如散戶亂炒都賺, 仲使乜周圍睇財經分析, 梗係散戶坐艇, 又或者想入市追貨, 所以才會追捧soho blog, 呢種現象代表大鱷於8月份派貨撤退, 9月初臨危托沽, 落到25000/24800/24500都窒窒步, 扮跌唔落係引好友散戶入局，亦可引股民買貼價熊，大鱷就可閃上去擴大周波幅順手屠熊，吻別大位再插落去屠牛, 好淡通殺

技術派高手燈神梁蛇星期一說他的測市水晶球釋出利好訊號, 建議要加倉, 結果當天上午9:37恒指見頂回落, 証明大鱷畫圖做假, 成功騙了技術派好友入局, 牛牛大幅多過熊熊亦同樣印証了好友中伏, 相信唔少散戶睇完其他財演的分析, 都在港股高位接到成手蟹, 不過呢幾日梁蛇走鬼, 已沽出加倉的貨, 他手上仍繼續持有四成貨, 連高手都炒到手忙腳亂, 高追後轉頭就走鬼, 可想而知大鱷的部署有多奸險, 連大報炒期權技術派分析師都中伏，9月風高浪急，散戶股海出入要萬分小心

${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$

7/9周一恒指收24589, 跌105點, 連跌4天, QQ港股同步尋底

利淡消息一浪接一浪, 侵侵惡搞中芯, 印度佬搞QQ, 拖累科技板塊急瀉, 拖低大市, 不過上周五美股雖然續跌, 道指失守28000大關, 低見27664後拗腰, 收窄跌幅企28133收, 有助紓緩股民的恐慌情緒

港股連日下跌, 超賣了, 大市正醞釀反彈, 因為由高位25847回吐至今日低位24475, 累計嘔1372點, 市弱嘔1000~1300點就會反彈, 不過如明日QQ跌穿今日低位$510就會拖低大市, 如QQ下試$500, 24500就危危乎, 今次港股跌浪係俾肥牛拉落山, 整體牛熊分布嚴重失衡, 有下殺誘因, 牛實在太多了, 要熊熊下移才能吸引港股反彈

樓下牛牛雖然超肥, 但就算港股反彈, 24500樓下的牛牛都未必會走晒, 所以大鱷可以踢上去派貨或殺貼價熊, 又或者在24600穿梭, 扮跌唔落俾時間新牛入場, 以及熊熊下移, 然後再落去食牛扒大餐, 淡友亦要等新的利淡催化劑才有藉口玩大插插, 通常美股休市, 港股自由行, 多數係一日升一日跌, 今日跌, 代表明日會收升,

受老外連日狂沽A股所拖累, 上証失守3300大位, 收3292, 急挫62點, 上証連跌4天, 成交急增, 按照連跌慣性走勢上証明日理應反彈, 如上証創新低, 港股就要跟隨破底, 按照慣性走勢, 本周不會好似上周只升1天這麼少

人民幣結束三連跌, 升91點子，報6.8302兌一美元, 美國十年期債息急升收0.721%, 匯債形勢好轉, 恒指已連跌4天, 而今年最長都係四連跌, 如有反彈, 向上阻力24650~24800, 如果彈唔起, 無法突破24814/24908, 就要插穿今日低位24475來擴大周及月波幅, 向前底24167進發

今日港股並非大插, 但下跌股份卻多得不尋常( 升528 VS 1139跌), 有洗倉走鬼味, 但港股沽空比率卻縮減至10.99%, 不過VHSI恒指恐慌指數收升, 代表市況不穩, 農夫山泉暗盤暴漲超過一倍腳頭好, 明日上市或會提振市場氣氛

~~~~~~~~~~~~~~~~~~~~~~~~~~~~~~~

正常市況大鱷會托住大位來派貨, 但過去幾日跌勢轉急, 幾個大位接連失守, 反映沽壓沉重, 但兩次落到24500神奇大位都冇繼續下瀉, 吸引牛牛入局, 保力加通道底+100天線+3月以來上升軌三線匯聚在現水平, 好淡角力中, 以消息面來看, 淡友佔優勢, 不過無形之手掃入跌到殘的內銀內險來抵消科技股的跌幅, 貪內銀內險下跌空間細, 而且係權重股, 大鱷利用金融股來穩住大市

過去幾日恒指高低位:
上周二 24995~25254
上周三 24931~25239
上周四 24854~25216
上周五 24488~24814

本周一 24475~24908 (底部下移尋底格)

今日恒指高低位 24475~24908, 繼續創即月新低, 周波幅遠遠未達標, 仍有下跌空間, 從過去一周恒指高位來推算, 向上阻力重重, 多條平均線壓頂, 理論上本周高位不應高過25254, 如果今日高位24908是周頂, 一係拖慢下跌步伐, 跟8月尾做約550點細波幅見24300就收工, 一係做足900~1300點周波幅見24000~24167, 本周不應插穿24000, 否則太快創9月大底, 就會好容易俾股民捉路博反彈

由於本周由淡友主導, 當跌穿大位, 斬倉盤會令跌勢加劇, 不過24000係超級大位, 要有強烈利淡催化劑才會插穿, 只要扮守得住24000/24167, 就會吸引散戶入市接貨, 如果插得太深, 就會嚇到散戶離場, 大鱷就好難派貨, 於24500穿梭愈磨得耐, 24167樓下的牛牛就愈肥, 當時辰一到, 就會插穿24000

反映經濟的BDI波羅的海乾散貨指數於8月中已見頂, 近日續挫, 與股市走勢不謀而合, 虛火上升的股市始終會受經濟衰退拖累, 換句話說, 後市或會作出技術性反彈, 不過彈完會再插,

想知道市況向好抑或向淡好容易, 當散戶一買即艇, 入貨博反彈好難獲利, 反映大市底頂下移, 代表大市正在尋底, 未有見底訊號前趁反彈要減磅, 博反彈只能快閃, 即市炒波幅, 倉底造淡等食大茶飯, 按照慣性走勢, 收跌周多數會在周三四五創該周低位

14/8 公布恒指季檢結果, 7/9 港股變天, 4/9 尾市大執位, 當天成交會急增, 四大板塊調動如下:

金融 49.86% --> 45.47%
公用 4.97% --> 4.00%
地產 10.63% --> 8.89%
工商 34.54% --> 41.64%

${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$ ${#icono_71}$

8/9周二恒指收24624, 升34點, 結束4連跌, QQ港股同步繼續尋底

大鱷推高內銀來托市, 震熊引牛, 24350樓下每百點都有肥牛, 要買定官才, 24500久守必失, 今日死貓彈完續尋底, 向前底24167進發, QQ能否守住$500非常關鍵, 如失守的話, 24000就危, 只要QQ守住$500代表大鱷暫時唔想插穿24000, 淡友等壞消息出現就有藉口殺跌, 今日港股收升只係假象, 其實唔少股份都破位而下, 跌到走樣

當一個二個淡友下望24000~24300肥牛區, 大鱷就特登唔食住, 落到24341吃一口牛就拗腰, 最肥兩串牛牛在24000及24100, 不過要跌穿8月低位24167才有得吃, 以往大鱷試過唔食超級肥牛, 打擦邊球食少少牛即彈, 大市超賣, 下試前底隨時會急彈, 因為已經夠水位俾淡友回補空倉, 上周恒指4跌1升, 按照慣性走勢不會連續兩周都係只升1天, 所以未來3天不會全跌, 再插多一棍就會有死貓彈, 彈完再插過

呢幾日大市在24500神奇大位穿梭, 溫水煮蛙式派貨, 一直守住前底24167來引好友入局, 大市呈底頂下移尋底格, 今日低位24341不會是本周低位, 等破底, 今日港股只係技術性反彈, 上証急彈以及內銀急升窒礙了下跌步伐, 但港股反彈乏力, 無法扭轉劣勢, 雖然港股超賣, 但要再插落去淡友肯食胡回補空倉, 又或者上証止跌回升, 港股才會有彈高吃, 只要大鱷咬住24500上落, 好友淡友都會進場, 牛熊都貼價, 如此一來, 大鱷就可以玩急升急跌, 好淡通殺,

科技板塊風光不再, 今日逆市下跌, 反映沽壓沉重, 會推港股落山, 本周一轉節氣白露, 預示有大變, 當天恒指創本周高位24908後就碌落山, 繼上周跌穿10.20.50.60天線後, 連100天線都失守, 敗象已呈, 要潛行空間了

美元反彈, 人民幣下跌, 美國十年期債息彈散, 再度失守0.7%大位, 匯債形勢全面利淡股市, 淡友即將發動攻勢, 明日港股即市表現要看上証, 上証今日低見3276(昨日低位3285), 險守上月低位3263, 如明日上証破底碌落山, 就會拉埋港股落地獄, 不過目前才是9月第二周, 希望不要太快插穿前底24167及24000, 否則會嚇到散戶唔敢入市, 如果9月係收跌月, 大底就會在9月下旬才出現

恒指由高位25847插到落今日低位24341, 累計大跌1506點, 以往跌1000~1200點就彈, 因為大市超賣, 但今日只得弱彈, 可能係大鱷仲想吃牛扒, 又或者嫌熊熊太高, 要等熊下移, 要吃飽牛才彈上去屠熊, 今日連24800都上唔到, 更遑論見25000, 上唔到就要落山, 由於周波幅未達標, 明日就要插穿今日低位24341來擴大周波幅

國指今日低見9701, 正在回補1/6上升裂口9578~9768, 非常疲弱, 恒指上升裂口在23089~23539, 如國指全數回補裂口, 恒指亦會跟隨碌落山補裂口

過去幾日恒指高低位, 底部向下移百多點陰陰落:

24341~24785
24475~24908
24488~24814

今日內銀爆升托市, 反映大鱷有能力操控港股升跌韻律及步伐, 每周高低位有晒劇本, 幾時破底都在大鱷的掌握之中, 牛肥熊瘦利下殺, 明日港股會插到哪個水平就要看上証, 今日大媽反骨, 竟然沽貨走鬼, 每次出現呢種情況就代表內地股市出事, 要等大媽掃貨護盤, 才能穩住港股