23/12 26300好淡角力大位

2020/12/23 21:21:03 網誌分類: 經濟

23 Dec

23/12 周三恒指收26343, 升223點, 結束三連跌, 力守26000

今個月港股騰上騰落, 主要在26500穿梭, 升穿跌破都拋離不遠, 反映好淡雙方仍爭持不下, 今日又係黑箱作業, 大鱷於收市U盤將恒指踢上去全日最高位收, 預示明日開市會惹來獲利沽壓, 受阿爺的反壟斷[九不得]政策拖累, QQ及阿里沽壓沉重, 逆市下跌, 如明日續跌, 就會拉住港股後腿, 今日港股主力靠科技宅經濟股推升, 內銀內險地產等舊經濟板塊跌勢持續, 跑輸大市, 大媽走工建行, 係內銀收跌的元兇

美元受制於91掉頭回落, 人民幣連升兩日, 升102點子收6.5378, 昨日暴跌的內銀內險A略為反彈, 推動上証升25點, 收3382, 加上納指續創新高, 好友借勢推高港股, 不過上証係日升日跌, 按照慣性走勢今日升, 明日就要跌

今日科指爆升, 創一個多月以來最大單日升幅, 表現亮麗, 連升兩天, 不過科指通常升2~3日就回吐, 今日升過龍, 亦會令明日沽壓加劇, 由10月起，科指每升兩周就會跌一周, 即係本周應收8254之下, 市場熱炒的新經濟股升過龍, 夾硬炒高來納入指數, 市盈率已升至不合理水平, 由於波幅大, 吸引股民炒作, 隨時接火棒

由10月起科指周線表現: 升升跌升升跌升升跌升升(本周跌?)

呢幾個月有一班港股大鱷玩超短炒波幅, 係高沽低吸快閃食胡, 同一方向1~2日就轉向, 呢班熱錢大鱷特別喜歡炒新經濟股及IPO和半新股, 抽升殺跌, 毫無徵兆下會突然變盤, 代表今日科技股爆升, 升勢過急, 明日就會散水, 長假期前通常買盤縮, 沽盤增

明日平安夜半日市, 會有長假期周末沽壓效應, 侵侵不斷出招打壓中企, 英國南非等多國新冠病毒變種, 英國封城立立亂, 傳聞變種病毒會令年輕人更易感染, 以及病情較嚴重, 疫苗對變種病毒是否有效成疑, 為股市帶來陰霾, 所以港股彈上去往往惹來沽壓, 歐美股市高企似係粉飾太平, 未能反映實體經濟及疫情惡化, 以及疫苗真正成效未必如預期理想, 央行態度係放水救市, 以及幫國民吊鹽水, 以免連股市都大插就會導致人心惶惶, 引發暴亂

明日關鍵阻力位, 如收於其下, 本周收跌, 代表淡友仍佔優勢

恒指 26422/26498
國指 10442/10483
上証 3395

${#icono_72}$ ${#icono_71}$ ${#icono_72}$ ${#icono_71}$ ${#icono_72}$ ${#icono_71}$ ${#icono_72}$ ${#icono_71}$ ${#icono_72}$ ${#icono_71}$ ${#icono_72}$ ${#icono_71}$ ${#icono_72}$ ${#icono_71}$ ${#icono_72}$