31/12 恒指強勢破頂而上

2020/12/31 21:27:40 網誌分類: 經濟
31 Dec

年結日粉飾櫥窗, 港股續升創月內新高, 上証破頂而上創年內新高

31/12 周四恒指收27231, 升84點, 假期前後例牌大龍鳳

上証權重A股急升, 推動上証創全年最高位3475, 收3473, 大升58點, 連升兩天, 向上突破, 有大成交配合強勢爆升, 午後上証升幅擴大, 港股大除夕半日市仍未反映內地股市下午急升, 老外連續3日掃A股, 大媽亦掃QQ美團中芯吉利, 按照慣性走勢, 中港股市下周仍會有新高, 因為中港股市通常係同步尋頂, 只要上証續升, 港股就有運行

又講下慣性走勢, 恒指已連升3天, 近來通常升3~4天就斷纜, 12月份尋底市周一例跌, 11月尋頂市周一例升, 基金經理口吻偏好, 資金牛市, 港股技術指標向好, 已收復所有平均線, 下周新年開局基金經理長假期後回歸以往都係掃貨買上, 會有一波升浪, 港股就算急跌亦會急彈, 縱有利淡消息, 震完都要上, 要擴大月波幅及屠熊, 貼價肥熊在27300~27500, 牛牛在老遠, 並不吸引, 要下周一26600附近才會有新BB牛上市, 今次港股向上突破, 好友會咬住27000, 唔會輕易放手

12月份港股消化沽壓, 以窄幅橫行來代替深度調整, 月波幅只得1342點(一般月波幅有1700~2300點), 靜極思動, 要有心理準備1月會係飛天遁地大波幅, 參考下列財經日誌, 下周消息多多立立亂, 禍福難料, 20/1拜登才上任, 所以侵侵未來兩周會盡地一煲搞中企, 以及埋下地雷俾拜登, 必定會引起市場震盪, 亦係國指跑輸恒指的原因之一, 本周好友大反擊, 已奪回主導權, 突破阻力大位後引來大量買盤以及逼淡友回補空倉, 可能係用來抗衡沽壓, 推高大市來預留回調水位

歐美疫情惡化, 多國封城, 但美股牛氣沖天, 已升至不合理水平, 與經濟脫節, 高位勢必惹來沽壓, 港股既似資金市, 亦似牛市, 過去幾個月累積龐大升幅仍高企不下, 新年新氣象, 市場看好新一年中港股市, 普遍預期短線會上28000, 大方向會見29000, 甚至30000之上, 年初大行通常係唱好, 營造利好氣氛, 引股民入局

早前講過道指及恒指約有三千多點的差距, 港股大幅跑輸道指, 美股近來仍高企不下, 所以港股插穿26000/10300即彈, 保持不會多過四千點的差距, 以今日來說, 仍有高達約3200點差距, 有條件繼續追落後, 韓股全年升約三成, 美股台股屢創歷史新高, 港股大幅跑輸外圍股市, 港股急彈3天收復平均線, 資金湧入可能係追落後, 因為一月市況通常係向好, 只要守住26800~27000, 就會上28000, 如熱錢流走, 就要再下試26500

~~~~~~~~~~~~~~~~~~~~~~~~~~~~~~~

成也科指.敗也科指

美元弱雞, 人民幣強勢, 中國經濟復蘇形勢冠絕全球, 目前資金流仍利好港股, 唔少分析都嫌美股貴, 高處不勝寒, 中港股市反而具吸引力, 只要基金經理看好, 佢地逢跌就會吸貨買上, 港股可能又係炒股不炒市, 不會全面上升, 受阿爺監管利淡阿里的消息繼續發酵, 阿里逆市下跌, 但其他科企卻見資金追入, 表現亮麗, 比亞迪強得不尋常, 可能係受TESLA帶動, 亦有可能係配股先兆, 近來大媽沽內銀, 內銀走勢疲弱, 只係臨收市才踢高

科指同恒指一樣連升3天, 自從科指於11月初見頂後, 通常升2~3天就斷纜收跌, 如能連升4天, 就打破了慣性走勢, 確認尋頂勢頭, 恒指強勢破頂, 但國指及科指仍未破頂, 反映恒指走勢較強, 科指沽壓未除, 昨日期指結算後港股尾市升幅擴大, 反映本周的升勢並非單純為了結算及粉飾櫥窗, 可能係為了明年開新局的升浪, 而股份急升亦有可能是為了股東減持及配股鋪路

利淡科企的消息逐步消化, 繼中國與東盟簽署RCEP後, 日前亦簽定中歐協定, 進一步提振市場入市炒復蘇的信心, 恒指已連升3天累計反彈逾1300點, 上企27000暫時解除了插穿26000的危機, 新年彈高提早偷步出現, 因為好友都擔心侵侵搞事, 紐交所將美國制裁的三隻電訊中資股於ADR除牌, 幸好不是權重股, 影響不大, 不過有分析指三桶油 ADR 有被紐交所除牌的風險, 下周變數多, 暗藏殺機

中美關係緊張下令更多中資企業回港作第二上市, 港交所破頂創新高, 與樓按相關的1個月 HIBOR 連續第四日下跌, 本港疫情回穩, 地產股見買盤,

最新回應

美味雞煲
美味雞煲 2021/01/28
@soho*...

元帥,一開市好彩 5 大貪高位食糊,恆指好快急彈400點跌幅收窄,剛好係29,100點左右,見補番個上升裂口,梗係入場炒多轉啦定左止蝕位就唔怕。結算日開波跌咁多,下晝都冇眼睇,等下晝食糊,報仇成功之前輸咗1000點今日搞掂 🤩😅

門徒
門徒 2021/01/28

元帥如這只是A浪開始未來還有個C浪可到240,小門不建議太早持倉

soho*
soho* 2021/01/28

我係網誌寫擔心乜乜物物, 多數都會發生, 例如小心聯儲局議息會引發匯市波動, 小心阿爺出手為股市降溫, 小心基金贖回, 小心大媽提早收爐....

soho*
soho* 2021/01/28

水滴兄, 你真係好犀利, 竟然搵得到, 謝謝!

就係星期五(22/1)公布呢個監管措施, 令內地股市於星期一(25/1)大成交沖高見頂回落, 跟住星期二三四滬深股市成交急降, 阿爺嚇到內地基金走鬼散水, 怪不得恒指星期一與上証同步見頂回落, 係好友夾硬踢上去食胡鬆人

今日北水流入港股係本周最少, 係連鎖反應

炒股真係好難, 太多資訊, 好難兼顧