25~26/1 港股風高浪急.好淡通殺

2021/01/25 20:52:46 網誌分類: 經濟
25 Jan

30000大關高處不勝寒, 獲利沽壓大增

25/1 周一恒指收30159, 升711點, 結束兩連跌

恒指爆升創新高30191(21/1頂30135), 但國指今日高見11990, 未能突破21/1頂12005, 港股升勢過急, 升幅過大, 特別是科企已超買, 港股技術指標跟唔上升勢, 現水平獲利誘因大, 如果大升唔止賺, 到頭來可能係空歡喜, 有基金經理表示今日趁大反彈已減磅

港股升得唔健康, 大升市但跌股過多, 持有舊經濟股的股民今日係輸錢咖! 大鱷利用新經濟股來掩護, 狂沽舊經濟股, 有股民由舊經濟股換馬高風險的新經濟股, 離棄穩健的防守股唔係好事, 會令大市波動性加劇, 有乜風吹草動, 高風險股走鬼就會出現人踩人慘劇

以往港股創新高不會一頂就玩完, 會在高位反覆以及再挑戰前頂, 或者做圓頂派發, 溫水煮蛙式派貨, 然後才大插深潛尋底, 上周四港股做了第一個頂30135, 上周五回吐低見29413, 今日再上去做了第二個頂30191, 按照慣性走勢, 試完底再沖頂, 如沖頂打回頭就會破底, 近日低位在29673/29413, 高位在30135/30191, 如雙頂回落, 跌勢就會加劇, 要插穿29673/29413來向下擴大周波幅, 展開尋底之旅

上周五(22/1)港股大跌, 係今個月大升浪出現第一次插水, 發出第一個警號, 理應下試29100, 不過今日北水突然湧港, 打斷了調整勢頭, 但下殺危機未除, 本周港股風高浪急, 不會單邊向上, 向上30200阻力非輕, 貼價BB牛今日剛出世, 已上移至29650附近, 以往港股處於大升浪, 當貼價牛登場, 就係港股轉勢向下之時,

見北水來勢洶洶, QQ單日升11%, 一向理智以價值及技術走勢來分析股市的淡友肥青服了,轉口風說不宜造淡, 認為港股仲有得上,就算急跌亦會急彈,會炒到三月兩會,因為北水已奪得港股主導權,淡友投降唱好,  係見頂訊號, 燈神梁蛇重倉(代表大市升到水尾), 都係利淡訊號

未知是否因為銀保監發布內地險企償付能力管理規定3月起施行, 以及有利淡內房政策, 近來內地股市內銀內險AH股都弱得不尋常, 往往一彈就散,

今日內地股市表面上造好, 但滬深升跌股份比例唔靚, 1071升 VS 3685跌, 跌股多到嚇屎人, 代表有暗湧, 今日上証創新高3637(只係略為突破前頂3636代表動力不足), 恒指亦同步創新高30191, 但國指未能破頂, 係利淡訊號, 如上証見頂回落, 港股亦會同步向下,

北水狂掃港股, 新經濟股升過龍, 可能係推高派貨, 挾淡味濃, 空軍回補空倉進一步推高大市, 由於升勢過急, 現水平的科企如出現獲利潮會跌得好甘, 要做好風險管理, 美資於本周初仍要繼續沽出制裁股, 港股沽壓未除

牛市亦不要凈係向上望, 由於今個月恒指跌市日數未達標, 上周恒指跌兩天, 本周會跌幾多日呢? 港股今日爆升, 但亦不應太樂觀, 恒指恐慌指數VHSI上星期周線大升近17%, 今日進一步急升5.93% 收23.06, 創今個月新高, 係強烈利淡訊號, 預示本周港股會飛天遁地大波幅,

早前曾估計恒指頂部會在25/1~5/2出現(今日剛好係25/1創高位30191), 一直擔心本周會先高後低, 19/1上升裂口28864~29100未回補是後患, 如回補裂口後低收, 就確認大市見頂, 利淡

~~~~~~~~~~~~~~~~~~~~~~~~~~~~~~~~~~~~~~

慎防阿爺為股市降溫或北水撤退

今日高見30191, 日前曾估計就算突破阻力位30200都不應上破30500, 因為道指及上証已見頂, 恒指月波幅已達標, 雖然大媽狂掃貨, 不過我估大鱷都唔想太快殺上30500做全年大頂, 如今才是今年第一個月, 炒大型上落市, 跌下彈下大鱷才能殺得更多牛熊及好友淡友, 突破30000淡友部署反擊, 沽空大幅增加至14.09%, 上周做第一個頂30135沽空亦急增至15.9%, 淡友等緊利淡消息幫手推大市落地獄,

短短一個月恒指累計上升逾四千點, 今個月升得太多唔係好事(可重溫前網誌分析農曆年前兩三周係港股高危時期, 即係由25/1起就要小心), 港股有可能提早於今個月見大頂, 全城向上望, 人人重倉港股, 獲利沽壓唔講得笑

QQ港交所狂飆就係大媽出手, 今日港股通凈流入資金近似上周一二三, 可能內地又發行了新公募基金, 水到渠成, 北水湧港何時收斂就要睇阿爺會否出手為股市降溫, 假如內地融資融券大增或者阿爺推政策監管個別行業, 就會觸發中港股市調整, 現階段要擔心的是當湧港北水一縮, 又或者大媽食胡(唔掃貨都係利淡), 熱錢撤退, 港股就會反艇,

上周一二三港股通凈流入資金急增, 港股升升升

上周四五港股通凈流入資金縮減, 港股跌跌

今日(周一)港股通凈流入資金急增, 港股升 (不過北水流入少過上周一二)

公用及地產板塊逆市下跌, 屋仔股受本港疫情惡化拖累只係藉口, 可能係持貨的股民/基金嫌佢地行得慢, 沽貨換馬QQ美團等科企, 上午換馬下午就有胡食, 好過持有悶股呆下呆下, 不過手腳慢高追科企接火棒唔識落車就大鑊, 港股已進入聚頂階段, 時辰一到就會大插插

~~~~~~~~~~~~~~~~~~~~~~~~~~~~~~~~

QQ燒煙花.淡友伺機而動

港股A股化, 急升暴跌是常態, QQ收市急升約11%, 曾創歷史新高見$767.5, 真係嚇屎人, 日前說衍生工具淡友重倉QQ, 話口未完今日就陣亡, 不過有賭未為輸, 今日QQ仍企沽空榜首, 淡友今個月捱打輸鑊甘, 為了輸少一蚊得一蚊, 淡友不會坐以待斃, 上周五淡友就借A權重股急挫, 以及港府封鎖油麻地佐敦來推低港股,

本周期指結算, 周初係美資沽出制裁股的死線, 淡友或會乘機再出手, 上周五港股大插, 已有淡友逃命, 由於累積空倉大, 本周淡友或會再伺機而動, 以往當內地股市反艇, 大媽顧住A股, 就會任由港股大跌

恒指通常見短頂就會嘔600~800點, 然後重拾升軌, 見大頂就要嘔逾千點, 甚至更多, 由高位30135跌至上周五低位29413, 累計回吐722點, 已到達調整目標範圍, 今日反彈高見30191做埋雙頂, 如果今日已見1月大頂就會比上次跌得更多, 閒閒地嘔一二千點, 尋頂市不估頂, 尋底市不估底, 有分析師說, 根據歷史統計, 當大市升穿50天線就會強勢上攻, 當大市見頂回落, 就會再下試50天線, 真係好神奇

我一直擔心30/1~20/2水星逆行, 10/2六星連珠, 預言家說20/12/2020~31/3/2021會有災, 以及農曆年前幾個星期(25/1起)係大媽沽貨撤退收爐期, 係淡友反擊的良機, 道指已於21/1見頂31272, 上証於25/1見頂3637, 中港美三地股市同步的話, 港股有可能已做了雙頂, 尋頂市逢跌買上策略已改變, 轉為炒尋底市, 因為上周五(22/1)港股大跌, 已打破了一鼓作氣單邊向上殺淡友的勢頭, 會轉勢向下殺好友

回顧過去幾年頂部, 今日高見30191, 剛好受制於2019年及2017年兩個頂30280/30199, 阻力非輕

2020年頂 29175 (20/1/2020)
2019年頂 30280
2018年頂 33484
2017年頂 30199

{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}

港股轉勢向下, 底頂下移, 繼續尋底屠牛之旅

26/1 周二恒指收29391, 大跌767點

牛市初期一買即賺的美好日子已成過去, 上周做了第一個頂已經係水尾, 跌下彈下扮跌唔落來派貨, 以及引好友入局, 昨日做埋雙頂, 煙花燒完就散場, 今日港股大插, 創20/1以來新低, 技術指標明顯轉弱, 強勢的QQ及港交所洗倉式下挫, 係強烈利淡訊號, 今日係展開大升浪以來最緊貼10天線收, 走勢差劣, 反映淡友成功反擊, 虛火上升的新經濟股有走鬼味, 沽壓沉重, 跌勢未完, 尋底中

上移中的10天線危危乎, 市弱想守住殊不容易, 如失守走勢就會進一步惡化, 斬倉盤出龍就會拖低大市, 結算前好友必需要守住29100, 因為明日結算前夕要部署後日結算位, 大方向要落去回補28864~29100上升裂口, 如果補完裂口收於其下, 不妙

今日收市U盤成交急增, 因為MSCI剔走中海油等制裁股, 大媽今日大手狂掃QQ, 不過就走其他股份, 我最擔心的情況果然出現, 連大媽都食胡, 怪不得港股腳軟, 大媽減磅, 北水流入減少, 可能係農曆年效應, 港股正處於跌下彈下的派貨期, 目的係吸引股民入市接火棒, 尋底市博反彈係高危行動, 順勢應造淡

早前估計25/1~5/2係恒指見頂的時間窗口, 可能踏入2月才見頂回落, 但QQ升過龍, 恒指兩度上破30000大關, 似係提早於1月見頂, 今日急挫, 進一步確認2月初不會再創新高, 港股現正處於尋底階段

手腳慢的話, 牛市做好友都會輸屎人, 港股已轉勢向下, 點升上來就點落番去, 好友今個月賺到開巷, 按照大鱷的習性, 係唔會俾錢股民落袋, 必定會想辦法要好友嘔番盈利出來,

以為升浪未完,今日唔少散戶見大跌入貨博反彈,牛牛繼續飛撲入市, 29300向下每百點都有牛, 向上老遠只得瘦熊, 月尾大鱷要追數梗係屠牛, 早前港股未見頂, 淡友就急不及待去造淡, 輸到投降唔敢再造淡, 今日港股確認見雙頂, 淡友竟然走去做好友博反彈, 呢種操盤手法輸屎未天光

~~~~~~~~~~~~~~~~~~~~~~~~~~~~~~

大媽減磅.港股沽壓增

今日大媽沽出中移.中芯.美團.吉利.微盟食胡, 好耐冇見滬大媽走這麼多貨, 怪不得港股反艇, 農曆新年倒數中, 真係有套現壓力咖! 不單是中港股市下挫, 連台韓股市都反艇, 分析師都解讀為農曆新年前沽貨獲利效應, 滬大媽狂掃愛股QQ, 買入金額係今個月最多, 大媽力撐QQ, 但QQ仍急瀉, 可想而知沽壓有多沉重, 印度打壓中國軟件的消息係跌市元兇, 市強係唔會理壞消息, 市弱就會俾反應, 今日QQ急挫, 反映港股走勢已轉弱, 買盤縮, 沽盤增加, 後市不妙

一如所料, 阿爺真係出招, 內地滬深等一線樓市升溫引起監管層關注, 近日住建部副部長赴上海、深圳等地調研督導房地產市場情況, 強調要採取針對性措施, 堅決遏制投機炒房, 內銀加按息以及限購, 都對內房股構成壓力

測市指標出現多個利淡訊號, 真係擔心好友撐唔到結算, 可能好友於兩次沖上30000時已食胡, 所以淡友輕易奪回主導權

~ 今個月跌市日數未達標, 月尾要補跌

~ 如果大市處於升浪,是不會出現兩次暴跌,大鱷點會俾股民執平貨然後再爆升,插兩棍代表大市正在尋底

~ 恒指周線四連升, 本周應斷纜收跌, 收29447之下, 如淡友當道, 大市就會深潛

~ 仲有兩個多星期就到新年, 小心內地基金贖回, 提早收爐, 港股沽壓會愈來愈大, 下周三(3/2)轉節氣立春

~ 昨晚道指創1月下旬新低30564, 雖然收市收復大部份失地, 但曾跌穿大位30600, 形勢不妙, 道指如失守30200就會瀉, 所以港股亦跟住道指創近日新低, 道指與恒指差距已大幅收窄, 所以道指回吐, 港股就同步向下, 當道指再挫, 港股亦要跟

~ 道指.上証見頂, 港股亦見頂, 雙頂回落會急跌,

~ 比特幣已爆煲, 看來股市泡沫亦快將破滅

~ 月中曾提及反映經濟的BDI波羅的海乾散貨指數釋出利淡訊號, BDI已見雙頂回落, 就算港股夾硬升, 到頭來都會跟住BDI碌落山, 兩者不會各行各路

~ 近來盲毛新丁散戶扮股神, 愈炒愈心紅, 炒股好過返工, 點會有咁大隻蛤乸隨街跳, 有冇咁著數? 人人有錢賺, 誰來埋單? 小心空歡喜, 嘔突盈利

~ 全城分析都唱好, 人人向上望, 重倉買上,熱炒氣氛嚇到淡友輸到怕,唔敢再造淡, 就係港股反艇之時

~ 上証低開後急瀉, 失守熔斷3600水平, 昨日高位3637確認見頂, 中港股市同步, 代表港股亦已見頂

~ 本港疫情不斷惡化, 農曆新年市道不景, 經濟進一步轉差, 股市虛火亦快將熄滅

~ 一向表現亮麗的越南及印度股市上星期突然急挫, 上星期五(22/1)港股亦創反彈浪以來最大單日跌幅, 收市跌480點, 反映全球資金流有變, 全球股市見頂, 好友撤退中

~ 周三(3/2)立春, 去年港股係立春前兩個星期反艇, 潛行凶間, 根據往績, 立春前兩個星期係轉勢期, 全球股市度過了拜登當選的蜜月期, 都係時候轉勢向下, joy完就災, 25/1起就要做好防風措施

昨日(周一25/1)港股急彈711點, 似係好友大鱷食胡鬆人, 大市已轉勢向下尋底, 因為所有指標股已見頂回落向下走, 尋頂市對利淡消息冇反應, 尋底市就對壞消息非常敏感, 近日我見利淡消息拖累股份表現, 代表大市向上趨勢已逆轉, 展開尋底之旅

=================

25~27/1(周初)期指轉倉

26/1(周二)MSCI 指數調動(剔除制裁股)

27/1(周三)富時剔除制裁股+聯儲局議息(小心匯債波動拖累股市)

28/1(周四)期指結算

29/1(周五)月結+黑期結算

港股企業已進入業績期前的禁止買賣期,少了一條水喉撐市

一月中美企業績期, 公布業績後禁止買賣期就結束, 企業可以回購股份, 小心業績見光死

第1次水逆日期:1月30日至2月20日

第2次水逆日期:5月29日至6月22日

第3次水逆日期:9月27日至10月18日

2021年1月27日 聯儲局議息

中芯獲允在美國OTCQX市場交易至2月1日

標普道瓊指數因應美國制裁,將在指數中剔除中國海洋石油美國預託證券ADR和中海油 H 股證券, 2月1日起或者之前生效,《彭博》報道, 隨著美國政府先後將中國公司列入禁止投資黑名單,標普道瓊指數公司會把更多中資股由指數中剔除,包括小米、中國商用飛機公司(COMAC)、上交所上市的中微。

特朗普加碼制裁, 涉解放軍投資禁令, 要求美資在11/11/2021前清貨

預言家指 20/12/2020~31/3/2021 會有災難, 暫時出現了新冠病毒變種(巴西、愛爾蘭、南非及英國出現不同新變種新冠病毒), .侵侵搞事,美國國會被暴民攻佔, 撒哈拉沙漠落雪, 美國總統就職典禮華盛頓仿似空城, 二萬五千軍人守城, 仲有冇罕見的事情發生呢?

2021年1月19日 07:32 <匯港通訊> 高盛、摩根大通及摩根士丹利因應美國制裁,周一再宣布合共73隻窩輪或牛熊證要提早於2月2日或5日終止交易。相關輪證涉及中芯國際及中海油, 以及納入中芯的恒生科技指數的輪證。

最新回應

門徒
門徒 2021/04/20

C妹揾我牙? {#iconb_64}

c6
c6 2021/04/20

今日究竟

升定係跌

大🐊🐊無益人

QQ都呆呆呆咗

c6
c6 2021/04/20

大元帥我❤️你

soho* 2021/04/20 12:51:25 回覆

雞煲, 睇韓劇學韓語, 我想知韓語 [柯篤茄] 係乜野意思, 你知唔知?

c6
c6 2021/04/20

大元帥日日夜夜

愛煲劇但都睇住大🐊🐊

遇到大元帥大🐊🐊無運行