29/1 反彈在望

2021/01/29 21:38:09 網誌分類: 經濟
29 Jan

月結日港股續挫, 大舉屠牛, 連跌4天, 反彈在望

29/1 周五恒指收28283, 跌267點

按照慣性走勢今日港股理應收升, 下午中港股市突然由升轉跌係俾外圍拖累, 亞太區股市見美期急挫所以反艇, 由於今日股市偷步下挫已釋放部份沽壓, 下周只要外圍回穩, 港股就會彈高, 不過, 深陷數千億債務危機的海航集團宣布破產, 不利內銀內險股, 而新股快手下周五登場, 就係炒QQ的藉口, 下周三四抽新股的資金釋放, 有利大市

近日港股由淡友主導, 未知由高位嘔了二千點淡友食胡未, 未來兩天非常關鍵, 如周一二未能重上28500, 就要插穿28000來擴大周波幅, 如收28500之上, 代表大市跌勢喘定, 如能重上28800/29000並企穩3天, 代表好友已奪回主導權, 要看能否回補昨日(28/1)的下跌裂口29191~29194, 20天線在29400附近, 形成巨大阻力區, 要有強烈利好消息才能突破

昨晚道指上升, 收30603, 今日恒指下跌, 收28283, 兩者差距擴大至2320點, 如果想收窄兩者差距, 下周一恒指就要反彈, 今日港股續瀉, 但昨日急升的VHSI恒指恐慌指數卻大跌2.17%, 持重倉的梁燈神大手走貨及唱淡, 相反指標係利好訊號

由12月尾約26000反彈至高位30191, 累計上升四千多點, 如今恒指由高位已插了約二千點, 符合雙頂回落會急挫的慣性走勢, 由於已回吐近一半升幅, 利淡消息已消化, 沽壓亦已釋放, 現水平才造淡買跌就太遲了, 要小心大鱷挾淡, 淡友回補空倉就會觸發大市急彈, 因為過去幾日連跌勢頭過急, 大媽或會護盤, 大媽正積極掃QQ來托市,

回顧去年的連跌記錄, 最長都係連跌4天, 恒指四連跌例彈, 即係下周一有望反彈, 本周恒指跌市日數超標, 收跌周3跌2升才合理, 結果係4跌1升, 跌過龍, 所以下周不會只升1天這麼少, 好友會反擊, 自從踏入2021年, 每逢周一恒指例升

今日收市U盤成交急增至$170億, 係平日同一時段的雙倍, 拖累該時段跌多76點, 如果係富時或其他指數調動要沽出制裁股, 下周一就會作出修正, 踢番上去

聽聞本周金融市場反艇係受拆倉潮所拖累, 今次港股係跟住中美股市落山, 如外圍未見底, 港股亦未見底, 如中美股市觸底回升, 港股就脫險, 2月下旬有得炒大媽假期後回歸, 恒指季檢誰是新貴, 炒3月兩會, 所以大鱷大媽會趁低吸納部署下一波升浪

~~~~~~~~~~~~~~~~~~~~~~~~~~~~~~

2月好淡角力大撼大

今日恒指收28283, 但亦不應對後市太悲觀, 以大鱷的一貫風格, 2月會再上29000來擴大月波幅, 至於幾時重上就要睇道指, 因為道指與恒指有特定差距, 港股何時回穩就要睇上証, 因為中港股市係同步尋底頂,

今日恒指高見28972, 大鱷冇推上29000可能係留俾2月才踢上去, 因為2月做的高位可擴大新一個月的月波幅, 而1月頂部是30191, 今日就算推上29000亦無法擴大1月波幅, 所以上到28972就掉頭, 大鱷只係留力, 並不代表29000一去冇回頭, 等養肥熊熊, 又或者有突發利好消息就會再殺上去29000

由於港股累積沽空大, 如後市未能挾死淡友, 仍有可能隊穿28000來向下擴大月波幅, 28259~28972會爆邊, 要看上衝到上哪個水平, 只要推得愈高, 就可減低破底的危機

北水於9~17/2才會暫停, 即係未來6個交易日仍有北水繼續流入港股(大媽通常係一路沽貨一路掃入其他股份), 大媽日日掃QQ都幫到手, 1月係好淡通殺, 我估2月都係, 以大鱷的習性, 當牛牛好友死得七七八八, 大跌市淡友熊熊贏到心雄, 不斷湧入, 大鱷就會反手殺番上去, 挾屎淡友, 同一道理, 就好似今次升浪, 當好友牛牛贏到心雄, 大鱷就突然反手插二千點屠牛

印象中當大市氣氛差, 走勢弱, 跌了一段時間, 淡友愈來愈重倉, 大鱷就會失驚無神爆升挾淡, 回顧1月份, 牛氣沖天, 但竟然臨尾香, 反映大鱷唔想炒單邊市, 想好淡通殺, 牛熊都要死, 港股風高浪急, 飛天遁地是常態, 無論造好造淡, 都要懂得收割

恒指由高位已大幅回吐近二千點, 大鱷/大媽/基金想高位派貨的話, 就不應一路推大市落山,  推番上去炒上落市, 好過炒單邊向下, 嚇到股民唔敢入市

最新回應

水滴石穿
水滴石穿 2021/03/06
@soho*...

中國應不會放水,放水等於替美國買單

最困難時機已過,最近高層強調的一直是防範金融風險泡沫

GDP不是保6,各國際金融組織預測中國增長8-9。6是一個保守目標,不需要放水也可以實現。

試下學下
試下學下 2021/03/06

降準🧐🧐🧐好似好耐無做過,翻查下先,但上證張圖未破哂平均線,政策做市好似等大插插先

不過是大成數,公布左保6。跟住就快美國又議息,吾再加大放水都會視為一收水訊號,過去多年慣性都係西收東放,反之亦言

疫情開始美金狂印,丫爺就收水抽緊,而家倒轉姐

美股犀利又大反彈🐊🐊🐊,過夜真係玩到你謝

兩會開始跌,甘下星期開完係咪升呢🤔🤔🤔

soho*
soho* 2021/03/06

熊QQ時機已過, 日前我唱淡$723時就得, 如今插到落大位$680, 大媽會出手護盤

我想牛阿爸, 熊小米, 等我周末再諗下先

今日有股份已經跟住兩會言論來炒上

soho*
soho* 2021/03/05

揀定心儀股份, 等下個星期出現震盪就落雨購物