16/2 消耗式急升有暗湧

港股燒煙花, 消耗式急升, 高處不勝寒

16/2 周二開年恒指收30746, 升573點, 連升6天

恒指連升6天, 只要升埋明天, 就平了去年最長升市記錄, 後日(周四)內地復市造好居多, 不過港股已偷步上升, 小心反高潮, 可能係阿爺呼籲就地過年, 內地休市, 睇港股升勢, 潛港北水似乎在農曆假期繼續熱炒港股

港股會繼續跟隨美股續創新高, 支持位30300~30500, 不過如上破31000出現見頂訊號就減磅, 因為以一般月波幅計最盡見31300, 淡友於31400/31800/32200駐重兵攔路, 短線如升穿31000再買上風險大過回報，估計大市再踢上去, 亦不會全面上升, 短炒我寧可減磅/造淡來對沖持倉/沽出嚴重超買或技術指標出現利淡訊號股份, 將超高市盈率的新經濟股換入落後股, 銀行股炒復蘇/債息升, 有望追落後, 亦有避險作用

牛熊分布: 9611牛 VS 2954熊, 向上阻力30800~31000

熊熊排到上31600, 約有2600張, 以大位來說熊唔算肥, 目前恒指已連升6日, 天象示警, 果然係六升連誅, 熊熊淡友陣亡

去年最長係6~7連升, 如果照跟, 明日(周三)或後日(周四雨水.大媽回歸)就會回吐, 透支了升幅的下場就會嘔, 連升時間愈長, 沽壓就愈大, 1月份首三周急升, 第四周就暴跌, 小心歷史會重演

港股技術指標反映港股上升動力不強, 但元帥早已說過只要挾淡, 逼淡友回補空倉, 推動港股突破阻力位, 買盤就會追入, 大鱷懶理技術指標, 玩夾硬升, 趙完鬆, 今日港股成交高達$2198億, 為8/2以來最大成交, 大成交沖頂冇好下場

~~~~~~~~~~~~~~~~~~~~~~~~~~~~~~~~~~~~~~~~~

點解恒指係北水關閉之時竟然突破雙頂?

內地休市, 對於大鱷來說, 冇左A股制肘反而可為所欲為, 因為內地股民不愛炒金融A股, 平時內銀內險油企A股跌, 就會拖低相關H股, 但過去呢幾日冇A股阻頭阻勢, 大鱷就乘機炒高內銀內險油企H股

今日內銀內險油企H股急升, 推動港股破頂而上, 我懷疑有潛港北水炒作, 因為表叔大媽就地過年不外遊, 內地休市, 不如炒港股過日辰

舊經濟股爆上

早已提醒大家落後的舊經濟股會接力推高大市, 本港疫情紓緩, 經濟有望重啟, 有藉口踢高舊經濟股, QQ美團逆市下跌都無礙港股升勢, 今日爆上係由舊經濟股推動, 升得實凈過單靠高PE的科技股, 預示後市會升穿30793創新高

按照慣性走勢, 好友主導大市, 就會再該月下旬創月內新高, 時間係非常重要的一環, 一直說買上就係因為從時間上來看, 不會這麼快見頂, 周三四五(17~19/2)係創新高的時間窗口, 今日高位30793不會是大頂, 仍會有新高

美期破頂而上, 推動港股午後升幅擴大, 港股雖然有唔少向好訊號, 但後市隱憂在升勢過急, 恒指連升日數太長, 技術指標跟唔上升勢, 美國十年期債息去到1.25%水平, 愈升愈有, 如上企1.5%利淡股市

個股熊死了多少就唔知, 估計今日只得約1300張恒熊陣亡, 以爆升逾600點突破小雙頂來說未免太少了, 熊熊淡友唔夠肥的話, 就會削弱殺上去31300的誘因