10~14/9 尋底屠牛之旅

10/9 周五恆指26206, 升490點

上升是為了下跌鋪路

《南華早報》今日的澄清審批新的網絡遊戲報道 + 中美元首通話 + 上証突破3700 = 港股報復式反彈

昨日港股暴跌, 今日大幅反彈, 皆因本周係收升周, 由好友主導, 所以好友力撐大市, 不過下星期係收跌周, 由淡友主導, 就會大插, 期指未平倉凈數大減, 可能係好友推高大市逃命, 回顧8月上旬港股升得好地地, 跟住就暴跌, 8月下旬反艇倒跌, 小心今個月係翻版, 有分析指8~9月美股多數會作出大調整, 結果8月大步檻過, 由於美股升過龍, 看來9月美股難逃一劫

恒指連升3周, 按照慣性走勢, 下周恆指會收跌, 會再失26000/25800, 要插穿本周低位25624才能擴大周及月波幅, 港股累積龐大升幅, 月中係回吐的時間窗口, 向下好友防線25624/25500, 再落就係25037, 向上阻力重重, 26500.26822淡友會攔路

後市如上証雙頂回落, 淡友就會借勢推低港股, 只要下周一港股收跌, 就係淡友出手訊號, 市場仍擔心周末有利淡手遊/平台消息拖累QQ, 所以QQ收升但收陰燭, 代表港股下危機未除, 小心港股會碌落山做第三隻腳,

多得阿爺, 自從恒指於2月中見大頂以來, 周線兩連升例跌, 但今次竟然打破慣性走勢, 出現連升3周, 有內地股市彈高做後盾, 好友本周有胡食, 可能係因為人仔強, 推高A股, 間接推高港股, 過去一周港股仍處於相對高位, 可能係因為上証愈升愈有, 突破一眾阻力位, A股升就扯住H股上山, 淡友乘機於高位累積淡倉, 等上証見頂或失守3700, 淡友就會出手殺跌

試想想, 阿爺不斷推出監管政策+大媽減持港股, 恒指理應再下試25000, 但如今仍在26000穿梭, 好明顯係人仔強推高上証, 所以窒礙了港股下跌步伐, 換句話說, 當人仔轉弱/上証見頂回落, 港股就會落地獄

以前當人民幣走強, 內銀內房及美元債務重的中概股都會受惠, 推動股價造好, 而近來多隻內銀又的確突破橫行區頂部, 內房彈唔起可能係因為阿爺打壓內地樓市+恒大.華夏幸福等多家房企出事

近來港股跑輸上証, 極為反常, 我估加港股印花稅或會令大媽減少炒港股, 寧願加碼炒A股, 另外美資受白宮政策制肘, 亦不得不沽出中概股, 就好似美國女股神7~8月就沽清中概股, 近來只係買番少少來投機短炒

港股底頂下移, 創月內新低, 繼續尋底屠牛之旅

13/9 周一恆指25813, 跌392點,

QQ.港股同步尋底

按照慣性走勢, 周一恒指收跌, 該周都會收跌, 收跌周是不會在周一見底, 所以後市仍會有新低, 即係會隊穿今日低位25570來擴大周及月波幅, 今日高低位25570~25887, 周波幅未達標, 未來幾日可能係上下兩邊爆來擴大波幅

好友防線由26000下移至25700, 今個月3次插穿都推番上去收, 再向下防線在25500.25300.25037, 不容有失, 一般來說, 如果插穿大位就會觸發止蝕斬倉盤, 令大市跌勢加劇, 所以今日略為插穿25600即彈, 好友於收市U盤踢番上25800關鍵大位收, 由最多跌635點後拗腰向上, 可能係引好友牛牛入局, 午後跟隨美期及上証收窄跌幅, 不過港匯進一步走弱, 利淡港股, 今日大鱷扮守得住25500, 好友湧入博反彈, 牛多熊少利下殺, 25500向下級級有肥牛

上証與港股即市走勢多數係同步, 午後上証大插打破3700低見3692, 當時恒指創新低25570, 其後同步掉頭向上, 換句話說, 後市當上証再插穿3700, 港股亦會同步碌落山, 今日上証低開高收, 單日轉向, 一直奇怪為何過去幾周上証接連突破多個阻力位並突破3700大位, 謎團終於解開, 有報道指內地私募基金潛港扮外資炒A股, 有無形之手炒起A股, 不過這些北水於上証升抵3700已開始沽貨獲利, 當上証雙頂回落, 港股就死得, 內地股市高處不勝寒, 我手上持有A股ETF已減磅

道指連跌5天, 今年見過兩次五連跌後都急彈, 美期急升, 反映今晚道指彈高機會大, 美元反彈, 人民幣連升3日已露疲態, 老外沽緊A股, 大媽沽港股走鬼散水, 上周五深大媽掃QQ, 港股彈高, 今日滬深大媽都沽QQ, 港股反艇, 好友力守QQ $471, 如插穿, 就會推港股落山

月初港匯強勢, 熱錢流入炒高中港股市, 港匯曾高見7.7700, 當港股於8/9見頂後, 港匯就逐步走弱, 熱錢獲利鬆人, 一如日前所說, 新科技股的莊家已散水, 近來熱炒爆升的資源商品股高位獲利沽壓大增, 福建爆發新冠疫情, 阿爺加碼監管措施, 消息面利淡

港股破位而下, 創月內新低, 繼續尋底屠牛之旅

14/9 周二恆指收25502, 大跌311點, 兩跌兩日

港股洗倉式大跌

上周預測本周港股收跌, 所以走貨做淡友, 今天才是14/9周二, 中港股市不會這麼快見底, 周三四五係創周低位的時間窗口, 預示明日中港股市及QQ都會跌穿今日低位, 要淡友食胡回補空倉, 才能穩住港股, 不過一如早前所說, 本周內地股市結算, 利淡

上証果然雙頂回落, 創新高見3723, 午後暴跌, 收3662, 大跌53點, 低開低收呈大陰燭, 恒大事件及內地商品期貨急插, 中鋁等熱炒的資源商品A股大跌, 拖累相關H股, 影響市場氣氛, 出現人踩人不問價沽貨的走鬼場面, 唔少股份都跌穿橫行區底部, 冇好友於低位護盤, 有災味,

QQ上証未見底, 港股亦未見底, 仍有下跌空間, QQ下一站$450/$440, 只要港股一破位, 斬倉止蝕盤就會令大市暴跌, 今日港股一插即彈, 收窄跌幅, 重上25500, 扮跌唔落, 係引好友入局, 今次跌浪係落去做第三隻腳(前底24748, 24581), 一如早前所預測, 估計今年低位仍未出現, 要插穿24581/24000來擴大年波幅

港股沽空急增又爆燈, 預示後市仍會有大插插, 周波幅及月波幅仍有下跌空間, 淡友主導大市, 下一個大位在25037, 係好友最後防線, 如失守就死得, 要留意明日再插多一棍QQ及港股能否收陽, 如仍收陰, 代表淡友仍主導大市

上星期五港匯仍弱, 但恒指仍能爆升490點, 皆因當天深大媽大手狂掃QQ, 所以除了睇實港匯, 亦要睇大媽手影, 要大媽大手掃貨, 港股才會有死貓彈

9月初熱錢流入, 港匯曾高見7.77, 所以當時將恒指炒高近二千點, 爆上26560, 人人望破頂, 不過其後港匯逐步轉弱, 今日仲弱, 曾見7.7804, 月初炒高港股後熱錢大鱷沽貨散水, 資金流走, 港股破頂好夢成空, 尋頂變成尋底, 今日連強股都反艇, 跌幅全面, 股民要睇住港匯走勢來炒港股, 目前港匯走弱, 利淡港股

內銀股

近來內銀H股反覆急升係因為內銀A股頻頻彈高, 今日內銀A股大插, H股就跟住碌落山, 係AH股同步, 又係同一句說話, 炒港股就要分析A股,

午後港股暴跌亦係俾上証拖累, 又係同步, 試兄早已提醒大家小心上証雙頂回落, 元帥亦說本周內地股市危, 會拖累港股創新低