親子講座(網上版) 上篇

2021/09/11 18:10:24 網誌分類: 親情
11 Sep

個仔讀幼稚園前,我開始聽過好多講座。直到疫症出現、限聚令實施等等,就冇再聽講座。

個仔既小學好好,之前舉辦過d網上講座,嚮屋企聽。今日第一次去學校聽直播講座。

講者係余德淳博士。雖然我冇聽過,但原來我媽以前嚮我中學果陣聽過佢講講座,仲話講得好好!

好期待呀!

原來余博士之前教過理工大學,直到健康出現左問題。佢係心理學既,工作又包括了解邊緣青年。原來邊青好多細個既時候都好乖,俾人規限得多嘛。仲有余博士又講到,就算有d學生名校出身,到讀大學會驕傲啦,唔學野啦,非名校生成績會嚮final year追上。

呢個講座都好多重點架:

[1] 父母要有耐性

每個人係唔同既,點會冇爭執? 小朋友要學習點同人相處。榜樣的力量好強大架! 余博士仲講左我好啱用既野,就係教師interview既時候,你有冇耐性係好重要。如果答問題太快,可能會顯示你欠缺耐性(大概係咁,如果我寫得誤導左,sorry),要適當地慢。太高效,太快轉話題,你個人會易忟。有耐性既人,冇咁易嬲,做事又冇咁粗心大意,易有成就、進步。

名句:「小成就可以抗憂! 」每日俾自己一個小成就啦。(咁即係..... 人生都更有意義?)

[2]有關嬲 (我聽既時候咁樣分類)

嬲有兩個極端既情況會發生,就係嬲同埋忍嬲。忍嬲會變抑鬱,會嚮大庭廣眾做出自己都控制唔到既野。

好多父母嬲,會打小朋友。打到皮粗肉硬。咁仲驚咩? 小朋友細個會驚你惡既。你嚮廳佢就乖,佢嚮房就瘋狂搞破壞。大個仲弊。

余博士話教過好多年書,教過5000幾人既老師,都仍然會搞唔掂依家d學生。家長只教過自己仔女,當然會有搞唔掂既時候。

名句: 「愛,不輕易發怒」

當有人打交,問:「咩事?」打交既人可能會解釋,忘記去打交。

父母想打仔,保持兩張凳既距離,打唔到可以唔想打啦。到冇咩野既時候,準備兩杯水,搭下膞頭,一齊飲水,展示關愛。一齊處理返情緒等等。

團體的力量: 小朋友宜參加思想正面既團體,例如教會,同不同年齡、性別既人相處,學習到誠實、愛心同包容。小朋友做事慢,揾兩個做事快既同學陪佢。小朋友做事急,揾兩個有耐性既同學俾佢(大概係咁,希望記錄時偏差唔大)。

[3]guidance - 引導、領導、指導

余博士講左兩種唔同既小朋友,分別似我個仔同姪仔:

我個仔係果d謹慎、細心、觀察力強、做事怕做錯類。我姪仔係果d魯莽、大膽、急、想測試他人反應類。

有提問問余博士,如果家姐成日屈細佬...... 我諗起我個仔成日講「表弟整爛晒d玩具」。我可以回應「你細個都係咁」。(true!)

3至4歲既小朋友,好奇,想推同學,好似做實驗咁喎。我諗起姪仔讀n班有d反斗野發生。余博士話,越鬧,小朋友就越想睇下咁做你係咪會鬧架? 如果你唔鬧佢就仲驚喎,會自己懲罰自己? 哇! 應該同小朋友講: 「諗緊其他方法.....」又可以玩角色扮演,等小朋友做老師,指出行為既問題同諗解決辦法(大概係咁)。

由於我搭緊車,就快落車,得閒先寫埋下篇。

回應 (0)
我要發表
user

最新回應

淺雪
淺雪 2021/09/19

可能是 2 人和顯示的文字是「中秋節就要到來 祝賀大家 老少團圓 齊聚家園 和和氣氣好人緣 温温馨馨幸福圓 中秋節快樂」的圖像

淺雪
淺雪 2021/09/17

有時我都同自己講,,錢之嘛..用左可以搵番..不要難為自己.

wongi
wongi 2021/09/16

哈哈,送上星星,照亮“錢路”。

ivina
ivina 2021/09/14
@淺雪...

唔鬧得,會自殘。

唔打得,會報警。

唔逼得,會對立、反抗。