年結粉飾櫥窗死貓彈

弱彈: 22665(底) + 600~800點 = 23250~23450

強彈: 22665(底) + 1000~1200點 = 23665~23865(今日高見23590)

港股虛火上升.受制於23600阻力位

上周恒指連升賀聖誕, 今日大除夕港股半日市, 彈高屠熊賀新年, 恒指連續兩日企10天線, 國指今日亦結束四連跌, 收升140點, 重上10天線, 收復過去四日失地並升突, 科指連升兩天, 差不多收復了過去幾日的所有失地, 可能係有偷步炒一月例旺的買盤進場(不過早前元帥預測一月不妙), 亦有可能係好友踢高食胡或逃命, 因為港股熊市未完, 明年首季港股會有新低,

回顧過去十年1月恒指有7次收升, 3次收跌, 反映基金經理長假期後回歸, 買賣盤會較活躍, 不過今次係熊市, 每月都會創新低, 今年1月想收升殊不容易, 利淡消息浪接浪, 空軍密密儲淡倉, 今日港股爆升就係大鱷見全城看淡, 所以玩偷襲挾淡, 不過空軍仍未放手, 港股下殺危機未除, 過去兩周恒指升市日數太多, 超標, 每周只係跌1天太少, 按照慣性走勢下周(3~7/1)跌市日數會增加

美元連日收96水平之下, 人民幣港匯齊齊走強, 今日大除夕只得半日市, 高低位23394~23590, 底頂上移, 下周一新年開新局等爆邊, 貼價23600有肥熊, 不過牛牛亦上移, 昨日本來熊多過牛, 但今日大舉屠熊後, 整體牛熊分布就變成牛多過熊, 今日大裂口高開唔係好事, 落山回補裂口機會大, 23200仍未企穩, 只要隊穿23000, 就要向22800,22665.22500.22000進發, 如能守住23000, 就代表好友想踢上23600~23800, 當見頂回落, 就要繼續熊市尋底之旅

今日恒指急升, 突破周一高位23319見23590, 向上擴大了周波幅至600點, 符合了短周會做細波幅, 不會做900~1200點一般周波幅, 亦符合了收升周多數在周三四五創周高位的慣性走勢, 按照慣性走勢, 本周恒指做細周波幅, 下星期就會做大周波幅, 新年開局會有大龍鳳, 死貓彈完就要落山, 按照慣性走勢, 今個星期港股周線收升, 下星期(3~7/1)周線就會收跌

美團QQ莊家老早已走光, 冇水喉護盤導致過去幾周股價反覆向下尋底, QQ上証見頂, 代表港股亦見頂, 又或者升到水尾, QQ $460~$470會見阻力, 如打回頭, 就要下試$440.$430.$412.2.$400....

早已說過大媽不在, 成交細, 大鱷更容易抽升殺跌, 可以 為所欲為, 結果呢幾日一如所料飛天遁地, 23000~23400上下都爆邊, 牛熊齊齊陣亡, 好淡通殺, 大鱷操控港股上落如入無人之境, 簡直係無法無天, 連跌震牛引熊, 好友死心, 當淡友熊熊入局, 就玩大裂口高開爆升屠熊, 殺完淡友就急回殺好友

~~~~~~~~~~~~~~~~~~~~~~~~~~~~~~~~~~~~~~~~~~~

挾淡秒殺肥熊即回

美股12月中反艇, 插到落34665才止跌回升, 由21/12起就跑上山, 道指連升6日爆到上36679, 粉飾櫥窗, 升幅驚人, 不過升得好假, 只係主力推升幾隻巨企, 昨晚美股小幅收跌, 但在美上市中概股就飛左出外太空, 升過龍了吧! 可能係因為累積沽空大, 鬼佬大鱷玩挾淡, 淡友回補空倉觸發股份爆升, 空軍亦擔心明年開局阿爺穩經濟救市, 所以年結前平空倉, 等明年開局再開淡倉

恒指跟隨ADR競價大幅高開441點後, 升幅進一步擴大至478點高見23590, 秒殺肥熊約1800張就鬆人, 收市僅升285點, 唔少股份以全日或近全日最低位收, 甚至倒跌收場呈大陰燭, 走勢差劣, 由24/12起, 無論恒指收升或跌, 都係收陰燭, 踢高溫水煮蛙式派貨,  亦有可能短炒好友食胡, 又或者大鱷根本想壓低今年收市位, 降低明年收升的難度, 今個月港股雖然收跌, 但老外掃A股, 大媽掃港股, 將一月例牌掃貨提前於12月出手, 踢高出貨, 因為明年一月係中港美三地股市高危期, 不過下周一(3/1)內地新年假期休市, 港股自由行

今日港股彈高, 似係大鱷挾淡屠熊, 以及基金粉飾櫥窗, 但卻是高開低走，收窄升幅呈陰燭，沽空仍高企, 假期後禍福難料, 全球疫情急促惡化, 勢必拖累經濟復蘇步伐, 兩位國泰無良空少全城播毒，本港新冠疫情出現社區爆發，通關出現變數，熊市反彈乾升不能盡信, 大鱷喜歡玩好淡通殺, 殺完淡友就會殺好友

上証升20點收3639, 連升兩天, 不過要小心長假期後4/1復市會見沽壓, 因為上証通常連升/跌每浸都係2~3天, 當內地股市回落, 就會拖低港股, 過去兩周上証一直受制於3650, 恒指亦同樣受制於23500, 後市當上証失守3600, 恒指就會插穿23000

總結今年港股表現, 恒指跌14.1%, 國指跌23.3%, 科指跌32.7%，熊霸天下, 要假設熊市未完, 港股無論點彈, 最終都要向下走, 關高人見12月尾恒指彈高又好友上身, 唱到上24500, 燈神唱好就要小心走相反, 要見22500

omicron爆發初期, 多國都企圖為疫情擴散降溫, 謊話連篇, 當時元帥已說不要看輕這個變種病毒, omicron遺禍深遠, 誓必禍及經濟, 睇近來全球疫情不斷惡化, 就知元帥所言非虛

重貼利淡因素重點:

港股沽空持續高企, 大淡友未食胡

騰訊繼減持京東集團(09618)後, 市場憂慮騰訊會繼續減持手上其他股份

估計港股熊市會跨年, 明年首季仍會有大震盪, 破位而下創新低, 因為熊市閒閒地癲10~12個月, 到明年2月中才夠12個月

加息陰霾對科企構成壓力, 資金換馬, 由科企轉投舊經濟股, 金融及公用股大受追捧, 避險味濃

有分析指明年美國債息會急升, 股匯債會大幅波動, 美股高處不勝寒

在美上市中概股除牌危機, 美資遵從白宮政策要沽出持有的中國股票

內房債務問題於9月2021~3月2022為高危期

在港上市企業2月中開始公布業績, 績前一個月不得回購股份, 加上年尾企業水緊, 12月尾及農曆新年前內地企業要撲水過年關, 港股少左條大水喉

美企1月份(好似月中)公布業績前一個月不得回購股份, 少左條大水喉撐美股, 美股大鱷主力推升幾隻權重股及消息股來托市,

14/1~4/2 水星逆行

1月尾聯儲局議息又講收水及加息, 股匯債會再起風雲

全球新冠疫情惡化, 拖累經濟復蘇步伐

<匯港通訊> 2021年五大跌幅藍籌股

股份 今日收市價(元) 今日股價變幅(%) 全年股價跌幅(%)
阿里健康(00241) 6.59 +4.60 -71.22
海底撈(06862) 17.6 +4.76 -70.52
阿里巴巴(09988) 118.9 +8.19 -48.88
金沙中國(01928) 18.16 +1.91 -46.67
小米集團(01810) 18.9 +1.40 -43.07

因健康理由, 2022年1/1起元帥暫停發表每日收市總結, 不過仍保留每月財經留言板