29~30/9 恆指 17000 嚴重超賣

30/9 周五恆指收17222, 升57點， 嚴重超賣

港股超賣終於反彈，但力度欠奉，皆因美股有災，熊霸天下累街坊, 9月全球股匯反艇，港股連跌四周後本周不但冇反彈，跌勢更進一步加劇，連跌五周，創今年最長跌浪, 連強勢股都倒下, 大市仍未有見底跡象

今年慣性走勢係每季必有一插, 要不是今日基金季結要粉飾櫥窗，月波幅季波幅已達標，連17000都守唔住，看來第四季要向16800.16500.16200.....進發

今日港股死唔去，就要多謝阿爺 接連出招撐人民幣，想救中港股市，首先要穩住人民幣

人民幣兌美元在岸價收報7.0931，大升1069點子,全靠今日作出報復性反彈, 收復部份失地, 不過本月累計仍下跌2.86%, 而第三季則累計下跌5.96%

阿爺於9月中起密密出招撐人民幣，可惜人仔仍無法止跌，阿爺今次出殺手鐧沽美元，終於令人民幣作出報復性反彈，美元急跌，人仔彈高高，係今日港股冇跟美股插水的原因之一， 擔心阿爺國慶送大禮， 空軍避險，拿拿林推低大市食胡

中秋後恆指每次反彈後翌日都會破底, 恆指亦未做過連升， 今日升，下周一就要跌，下星期10月開新局要打破呢兩個魔咒才有轉機， 否則仍是淡友繼續主導大市

今日港股沽空雖然略為縮減，不過累積沽空仍高企， 空軍可能想等 港股反彈再大手加沽

~~~~~~~~~~~~~~~~~

牛熊分布均衡

連日下殺大舉屠牛後，牛熊分佈已達致均衡，削弱大插誘因, 牛52％：48％熊, 大鱷壓低大市俾17600貼價小熊出世， 下周一17200熊出世, 肥牛在16500~17000有約3000張

港股急跌破底後急彈，恆指國指收升，惟科指受QQ美團拖累低收, 科指已連跌3日，今年3連跌多數反彈，有災最長係4-5連跌

QQ已連跌4日，通常4-5連跌就會反彈，QQ要向$250進發，QQ未見底， 港股亦未見底

下周十一黃金周國慶長假期內地休市, 港股自由行, 假期前後例牌大龍鳳

今年第三次水星逆行 9/9 ~ 2/10 結束

3~9/10 十一黃金周國慶長假期內地休市, 10/10周一復市

市傳阿爺要求內銀在今年內向陷入財困的房地產行業提供至少6,000億元人民幣融資，以解決流動性危機, 消息利好內房卻利淡內銀

~~~~~~~~~~~~~~~~~~~~~

下星期是收升周嗎?

一如近日收市總結所說 ，空軍趕在季結前食胡平空倉，所以呢幾日港股急跌創新低，今日唔少股份都由低位反彈， 淡友回補空倉

今日季結基金粉飾櫥窗， 基金經理 唔想港股大插亦唔想大升， 如果今日爆升，基金 因為減了磅，持倉或會跑輸大市

月尾6天升跌日數，2升：4跌， 慣性走勢好準

測試指標顯示今日港股會破底，好準

燈神梁sir指標： 星期三大跌609點那天，梁sir 沽清中線倉最後一注，佢由本周一起日日走貨， 燈神清倉港股就彈得

散戶指標：離場，17000唔敢再入市博反彈，港股就彈得

散戶唔炒股去睇色戒或離場唔睇市，死心指標

牛熊指標： 17000樓上肥牛已死得七七八八

按照慣性走勢, 恆指創該月新低, 該周或隨後一周反彈機會大

######################

29/9 周四恆指收17165, 跌85點, 嚴重超賣

期指結算 港股繼續洗倉創新低

本周基金埋季结，粉飾櫥窗/換碼，推高走貨，套現避險，連空軍都趕住係季結前推低股份來食胡埋數，所以港股高位一瞬即逝， 不過淡友回補空倉， 個別股份逆市上升，守住17000, 恆指已做了約8000點年波幅, 估計唔少淡友都食胡, 9月炒股災, 10月好友炒救市，淡友炒加息、核戰危機、通脹……

其實恆指 周波幅 月波幅 季波幅已全部達標，甚至已超標， 正路跌勢應可暫時喘定，今日 三大指數低見17046/5862/3439, 科指領跌，港股仍未有見底跡象，明日要畫月線季線, 希望好友出下力，明日守住17000收升

連日大屠殺肥牛後，超過一萬張牛的情況已消失，牛熊分佈失衡情況已解除，牛6379張：熊5037張，56％牛：44％熊，熊熊下移至17800水平, 當再進一步下移及養肥就殺得, 明日港股深潛機會下降， 基金季結粉飾櫥窗 有助穩住大局

過去半年港股一直有無形之手托住大市嚟派貨， 但9月份大部分托市盤都消失, 冇人維持秩序導致港股跌勢加劇，代表9月份港股早已進入尋大底的急跌時期, 指標股QQ 今日低位 $268.2, 周波幅未達標，比亞迪失守$200大位，預示港股破底危機未除

今日唔少股份都急升急跌， 昨晚夜期收大高水412點, 港股大幅高開319點後升幅略為擴大，隨即掉頭向下， 午後急挫破底，低見17046， 夜期收大高水412點通常翌日（29/9）會收升，最終收跌是很罕見， 應升不升需防跌， 結果倒跌收場，中美股市唔對路，連好友都退避

港股高開低收，單日轉向呈大陰燭，恆指月尾6天 暫時 1升4跌, 升跌比例通常係 2:4 或 3：3, 升市日數未達標，尚欠1日升市，明日許升不許跌，否則恆指就創下最少升市日數的月份

午後內地股市及美期急跌，美元由低位112.6977急彈重上113水平，Vhsi 恆生恐慌指數隨即由跌轉升， 幸好最終人民幣急升458點子，收7.2， 結束七年跌， 夜市美元急跌，市傳阿爺下令 內銀做好拋售美元的準備， 以緩和人民幣跌勢，阿爺繼續出招， 希望可穩住市場信心， 當資金流好轉， 淡友就會縮手，好友就有藉口反擊

20000.19500.19000.18500.18000.17500入貨博反彈的股民已彈盡糧絕成手蟹冇眼睇，今日插穿17200已經冇子彈，亦冇膽入貨，有股民清倉離場, 股民死心係利好訊號, 預示港股反彈在望

唔計特大及特細恆指月波幅，過去8個月有三次恆指做2100-2300點月波幅，有兩次做2600-2900點

頂19839 - 2600-2900點月波幅 = 16900-17200