12月份財經留言版

港股期指結算，底頂下移，沽盤湧現

29/12 周四恆指收19741, 跌157點

今日港股下試10天線即彈, 好友力守19500來結算， 近來急升的科企領跌，炒家及基金經理 粉飾櫥窗 ，紛紛沽貨鎖定利潤

騰訊有利好消息, 資金湧入掃貨，QQ有莊家撐走強，逆市急升， 不過QQ 連陽 日數已超標，小心明日收陰燭，技術上QQ 要回調

今日港股下跌，正好畀19750樓上熊仔出世，月尾恆指已跌了兩天，達標， 插完呢棍，Vhsi 恆指恐慌指數亦下跌，預示好友會撐埋明日基金年結以及黑期結算

睇港股日線似聚頂，今個星期港股周線雖然收升機會大，不過要小心下個星期，因為周線連升兩周後回調壓力甚大，今個星期有聖誕假期，恆指短周只得560點細波幅， 按照慣性走勢下星期就會炒大波幅

上證連跌兩日 ，老外上午大舉沽出A股，但尾市掃入A股， 又玩趁低吸納炒波幅, 美國十年期債息升勢回順，跌穿3.85%，美元下跌，人民幣及港匯略為反彈，超短線匯市回穩

聖誕長假期後復市， 港股衝高回落

港股高處不勝寒，恆指20000大關得而復失

28/12 周三恆指收19899, 升306點

港股期指結算前夕急升， 肥熊陣亡， 恆指擴大月波幅任務亦已完成 ，隨即 收窄升幅， Vhsi 恆指恐慌指數連升三日 ，今日更進一步急升3.31%，代表大市有暗湧

恆指高見20099, 剛好去到20100-20300阻力大位，不進則退，以周波幅計，後市就要跌穿今日低位19787來 擴大本周波幅，順道回補今日上升裂口 19686-19787

上證於港股聖誕假期冇咗老外沽盤偷雞升了兩天， 今日互聯互通復市，沽盤隨即湧現，內地股市重拾跌勢， 收3087，跌8點， 權重A股寧德時代臨尾香，失守400大關並創12月新低380.28，響起警號，內地股市形勢不妙勢必拖累港股

～～～～～～～

中美股市拉住港股後腿

中港疫情持續惡化，四川省推算約有64％人已染疫，人民幣下跌，影響股民炒股及消費意欲，其實港股於11-12月大幅反彈已偷步炒放寬防疫措施以及通關，12月中已出現濃濃的托沽味

中美股市走弱，港股又豈能一直獨自去偷歡？點都會畀中美股市拉住後腿，美國十年期債息上破3.85％明明不利科企，但大鱷卻夾硬推升， 唔排除空軍亦順勢推高來加沽， 港股沽空連日急增是後患，壓力始終要釋放

早前風水術數師已預告11月至7/12前港股財氣最旺，22/12冬至轉節氣後財氣大減，睇近來港股表現又幾似，港股近來有聚頂味，恆指今日升破前頂19926, 但卻走不遠，高見20099 (阻力20100）, 恆指破頂創月內新高，但科指及國指冇破頂，足以反映港股動力不繼

今日推升好明顯係挾淡屠熊及部署明日結算位， 以及預留回調空間，大鱷要咬住19500樓上結算

～～～～～～～

臨危托沽

港股雖然收陽收升，但唔少股份都衝高回落，收窄升幅，甚至倒跌，多隻熱炒股都有散水味，近來狂炒的教育股暴跌，京東阿里小米舜宇都逆市大跌，反映 20000 樓上沽壓甚大， 新年長假期在即，股民傾向減磅避險

今日港股成交增加可能係空軍回補空倉 以及沽盤湧現，並非看好後市的買盤，估計基金經理粉飾櫥窗亦沽貨鎖定利潤，公用股急升，資金泊入公用股避險 唔係好現象

QQ 高見$329.6, 創近4個月新高，以周波幅計，後市$320-330就要爆邊來擴大周波幅，高位沽壓雖然明顯增加，但 QQ 今日仍能收陽收升皆因大媽大手掃貨, 國家新聞出版署發布2022年進口網絡遊戲審批訊息，共44款遊戲獲批，當中包括騰訊旗下的《寶可夢大集結》

按照慣性走勢，港股月尾多數係好淡通殺，不會單邊升或跌，月尾6天目前係1跌3升，跌市日數尚未達標，等淡友出場殺跌

港股轉倉高峰期， 基金粉飾櫥窗部署上攻屠熊

23/12 周五恆指收19593, 跌86點

12月係好倉底，大市往往係急跌急彈，消化沽壓後又會再上攻, 短炒莊家周初食胡後，呢兩日又再湧入掃貨，可能係炒通關復常，想殺上20000來擴大恆指月波幅

一如日前所說， 好友想守住不斷上移的10及20天線，就要向上推進, 港股在月內高位反覆，成交縮，買盤弱，大鱷托住高位派貨，亦有可能是為了下周四（29/12）期指結算及基金埋年結，總的來說，美股熊反覆向下，內地股市即將反彈，港股牛反覆向上，恆指最大阻力在20100-20300

以月波幅計，下星期(12月尾)或明年1月初就要上破20000大關，目前貼價熊較肥，吸引力較大, 明年1月開新局，港股可能係飛天遁地，1月中或會變盤 ，要預早作出部署，5/1轉節氣小寒，當天QQ除淨美團，近來QQ沽空增加，可能係空軍博除淨後沽壓大增

近來只係短炒莊家食胡，主力控盤莊家仍坐定定等食大茶飯, 按照收升月的慣性走勢，月初推高、月中回吐、月尾再上, 港匯雖然反映有熱錢流走，但好友卻有 一月初通關憧憬做後盾，只要收19000之上，12月港股收升機會大增，以去年來說，12月中震完就會再上攻

回顧近來港股走勢， 牛味愈來愈濃，恆指底部上移二千多點, 低位見買盤承接, 見短頂後由高位往往回吐大約900-1600點即彈

14597 ----〉18414 ----〉16833 ----〉19737 ---〉18799 ----〉19926 ----〉18885

一直擔心12月中係港股回調時間窗口，所以短線倉已減磅炒波幅, 美國稅局由 1/1/2023 起, 向非美籍炒 PTP / ETF 的股民大幅徵收 10%預扣稅或會拖累美股, 12月底前就要狂掟美股

Al 炒股軟件顯示近日資金流入遜上周, 大鱷資金流入減少，散戶入市資金增加，即係大鱷踢上去派貨畀散戶，未派哂貨所以港股跌唔落, 12月基金經理粉飾櫥窗, 亦有誘因推高出貨來鎖定利潤

風水術數師說小雪、大雪的一個月, 即係 22/11至 21/12 港股有財氣, 所以急跌急彈, 不過 22/12 冬至轉節氣後要小心

股神畢菲特旗下巴郡，在12月8日以平均每股201.3432港元減持比亞迪，套現2.677億港元

近來港股走勢係急升、超買、回吐、急升……，周而復始， 如反彈卻未能破頂，就會跌穿短底

過去幾個月港股收市位

恆指（11月收18597, 10月收14687, 9月收17222, 8月收19954）

科指（11月收3798, 10月收2852, 9月收3450, 8月收4273）

國指（11月收6374, 10月收4938, 9月收5914, 8月收6865）

～～～～～～～～