KellyChu - 幸福好運指數飆3倍 橫瀾島驚現三彩虹 網民大讚好靚｜Executive日記
2023/07/01 03:22:47
網誌分類:
生活
天文台話，橫瀾島天氣相機今個星期三捉到主虹、副虹，同反射彩虹組成嘅三彩虹，仲上載相關相片，獲網民大讚：「罕見三彩虹好靚」、「好靚呀，多謝分享，讓香港市民看到繽紛璀璨的彩虹！」、「真係未見過」，更有人好奇發問：「有冇四彩虹？」亦有網民好浪漫咁話，彩虹通常寓意好運同幸福，一次過見3條，即係等於好運同幸福指數升3倍！
小妹細心一睇，發現三道彩虹嘅光暗、顏色排列各有唔同，到底係點樣形成嘅呢？天文台就解釋，太陽光由唔同顏色嘅光組成，如果大氣有水滴，光線就會被折射，形成彩虹；如果光線喺水滴反射兩次，就會產生「雙彩虹」；如果海面再反射出一道反射彩虹，咁樣就會出現三道彩虹嘅奇景，而第三條彩虹嘅顏色排列，係同第一條彩虹一樣㗎。
Kelly Chu
■天文台嘅橫瀾島天氣相機，近日就拍到罕見嘅三彩虹奇景。
回應
(0)
我要發表