KellyChu - 網民笑稱：牠留戀香港　呼籲落戶 鯨魚神隱一周再現身　 「張口朝天」 醫肚｜Executive日記

一條布氏鯨本月13日現身西貢海域一帶，但之後唔知點解「神隱」咗一個星期，好多出海想一睹「芳容」嘅市民都唔見蹤影。不過有船家就發現，布氏鯨原來仲未走，最近一連3日再喺西貢出沒，例如昨日就喺滘西洲海域浮出水面，擺出「張口朝天」嘅招牌動作，懶洋洋咁喺度食魚。網民大感興奮之餘，仲笑住話佢一定好留戀香港，選擇喺度定居了。
魚類豐富 吸引覓食

據網上影片可見，布氏鯨昨日再喺西貢滘西洲海域出沒，並喺水面擺出招牌動作，張口朝天幾十秒後，再閉合雙顎潛入水中，之後氣孔換氣噴出水花。發片嘅網民就話：「今日有師兄喺滘西洲見到，原來仲喺度」。好多網民見到，都大讚佢一定好留戀香港，仲講笑咁話佢一定喺度定居了。

其實之前就有魚類專家講過，最近正值本港休漁期，西貢嘅沙甸魚等魚類豐富，吸引布氏鯨入嚟「搵食」。小妹就估計，可能伙食太好，佢唔捨得走喇！
Kelly Chu