KellyChu - 邊做運動邊欣賞漁村日落美景 大埔三門仔海濱單車徑如詩如畫｜Executive日記

大家都知小妹好鍾意運動，有時周末會去踩下單車，出身汗放鬆下。昨日就驚喜發現，風景如畫嘅大埔三門仔，原來開通咗全新海濱單車徑，大家運動之餘，仲可以欣賞埋漁村浪漫嘅日落美景！

上水至大學站段分支

昨日開通嘅三門仔海濱單車徑，係新界單車徑網絡上水至大學站段嘅分支路段，全長約900米，沿三門仔路由汀角路交界處延伸。

單車徑四周有八仙嶺、船灣海同吐露港圍繞，海景山色優美，沿途仲要好浪漫，可以飽覽船灣避風塘景色。另外，單車徑盡頭嘅休息處設有洗手間、飲水機、有蓋座椅同單車泊位等，設備齊全，方便一家大細遊玩之後，坐低休息唞唞。

三門仔新村今日依然保留濃厚漁村風貌，避風塘上停泊一艘艘舢舨船，防波堤外搭建咗大大小小嘅魚排，盡顯漁村獨特風光。而夕陽西下嗰陣，滿天彩霞，金光灑落海面上，醉人美景浪漫氣氛，好適合情侶去拍下拖！

未去過嘅朋友，如果想知多啲，可以查下「香港出行易」一站式交通運輸流動應用程式，上面就有三門仔海濱單車徑嘅路線圖！

Kelly Chu