KellyChu - 大運會閉幕 歡聚惜別為亮點 盼展示絢麗多彩嘅成都｜Executive日記

國家隊同港隊喺成都大運會取得歷屆最佳成績，運動會昨晚亦喺成都露天音樂公園舉行閉幕禮，係世界大型體育賽事嘅開、閉幕禮走出場館、走入公園嘅一次突破。創作團隊就話，閉幕禮突出歡聚同惜別兩個主題，向世界展示絢麗多彩嘅成都。

大運會閉幕式昨晚8點喺成都露天音樂公園舉行，以「夢想.點亮未來」為主題，全長約70分鐘，除咗固定儀式，文藝演出約26分鐘，以大型歌舞劇形式進行，有約600名演員參加。創作團隊話，閉幕禮突出歡聚同惜別兩個主題，透過場地設置、視覺呈現等多種方式，向世界展示絢麗多彩嘅成都。而閉幕式嘅舞台，就以手機為設計主元素。

總導演甲丁就解釋，閉幕禮係一場青年人嘅歡聚，亦係今屆大運會最後道別嘅地方，夢想點亮未來係呢場歡聚同告別要傳達嘅主旨，希望以文藝表演同多項儀式，展現青春孕育嘅無限希望。

今次中國贏得103金、40銀同35銅，獎牌總數178面，成為大運會史上第2個喺1屆賽事金牌過百嘅國家，亦超越美國，成為大運會歷來奪金最多嘅國家。港隊贏得4金1銀7銅，排16位，超越2017年台北大運會嘅2金2銅，創出歷屆最佳成績。

Kelly Chu