KellyChu - 警方招募節目大派貼士 有志投考記得去取經喇｜Executive日記

依家各行各業都喺度搶人才，警方亦唔例外，除咗之前調整入職條件廣納人才，仲推出警隊招募節目《邁向新警界》。節目一連10集，每集3分鐘介紹投考警隊嘅有用資訊，包括投考貼士、學堂訓練、學長計劃同福利等。有志投考警隊嘅朋友記得收睇！

警務工作充滿挑戰，到底投靠警隊要準備啲咩？《邁向新警界》就會介紹投考貼士，並深入警察學院27星期嘅密集式訓練，等大家睇下警方係點樣招聘同為新學員提供訓練嘅。而為咗廣納人才，警隊早前亦調整咗入職條件，包括取消投考者最低身高及體重要求，同其他紀律部隊睇齊；取消投考者唔可以戴眼鏡或隱形眼鏡進行視覺敏銳度測試嘅要求等。

另外，招聘亦增設「警員中英文筆試」，包括中文運用和英文運用兩份試卷，以中學文憑試第2級為基準等。新標準自然有新要求，有志投靠嘅朋友記得睇節目取經喇！

Kelly Chu