KellyChu - 哥哥紀念展迎第30萬名參觀者 下月冥壽免費播經典電影｜Executive日記

為紀念一代巨星張國榮逝世20周年，香港文化博物館3月起舉辦「繼續寵愛．張國榮紀念展」，大受市民歡迎，昨日就迎嚟第30萬名參觀者，官方特意為呢一家四口送上別出心裁嘅紀念品（見圖），包括附有3位客席策展人張叔平、夏永康和陳淑芬簽名嘅展覽海報、香港電影資料館「芳華再續」專題放映活動免費電影門票、張國榮20周年復古玫瑰紀念章，及「瞧潮香港60+」禮物包，以紀念呢個特別時刻。

另外，9月12日係哥哥67歲冥壽，原定星期二休館嘅香港文化博物館亦作出特別開放安排，當日一樓劇院會免費放映兩套張國榮主演嘅經典電影，分別係上午11點放映嘅《戀戰沖繩》，同下午3點放映嘅《東邪西毒》。觀眾可以喺活動開始前15分鐘排隊入場，各位「哥迷」記得mark實日子喇！

Kelly Chu