KellyChu - 消防處：吸取經驗調整訓練策略 港搜救犬赴土耳其救援功不可沒｜Executive日記

消防處依家有6隻搜救犬，都係領犬員嘅最佳拍檔。而大家熟悉嘅Umi同Twix，唔單止cute，仲非常之神勇，今年2月遠赴土耳其地震災區救援，同領犬員陳柱匡和蔣天朗合作無間，表現出色（見圖）。消防處就話，吸取咗今次寶貴嘅海外搜救經驗，搜救犬隊會調整訓練策略，例如強化干擾訓練，喺搜救練習加入播放動物、重型機器等聲音，等狗狗執行任務嗰陣可以更加專注。

另外，消防處搜救犬隊7月亦去咗雲南昆明搜救犬基地交流，了解到內地會專門培訓針對唔同任務嘅搜救犬，搜救犬嘅品種亦好多元。處方覺得此行獲益良多，好多地方值得借鏡學習。所以喺未來嘅發展，搜救犬隊期望從唔同渠道增加搜救犬數量，例如引入更多唔同品種嘅搜救犬、發展專門針對瓦礫搜索或山野嘅搜救犬等，亦希望同唔同紀律部隊繁殖更多工作犬，從小開始培育同訓練，發掘切合香港嘅搜索模式！

Kelly Chu