KellyChu - 「港島無人機足球大賽」開鑼 一哥盼善用創新技術服務市民｜Executive日記

萬衆期待嘅「港島無人機足球大賽」昨日舉行，到場主禮嘅警務處處長蕭澤頤就話，自己都係一個足球迷，冇諗過波可以用無人機去踢。佢又話，其實警方一直致力透過創新技術服務市民，例如水警就用無人機執行搜救任務，希望青少年多了解警隊工作，甚至日後加入政府，一齊服務市民。

港島總區防止罪案辦公室昨午舉行「港島無人機足球大賽暨總區抖音帳號開展禮」，蕭澤頤致辭嗰陣就透露，自己都係一個足球迷，但冇諗過原來波可以用無人機去踢。而紀律部隊亦一直致力透過創新科技，為市民提供更卓越、更快捷嘅服務。

佢舉例話，水警總區嘅同事昨日就喺現場擺設攤位，講解警察點運用無人機，喺偏僻島嶼同海面協助搜索、救援工作。而消防處代表亦喺現場介紹，點用無人機，喺大型火災或事故現場作高空視察，協助即場進行風險評估，制定滅火或救援策略。

一哥希望，各青少年朋友對警方工作有更多了解，透過活動有更多啟發，甚至長大後加入政府行列，一同保障市民嘅生命財產安全。

昨日活動好豐富，各位大小朋友除咗可以親身體驗刺激嘅「無人機足球比賽」，亦可以到警隊擺設嘅攤位玩遊戲。另外，大會亦請到香港區競速無人機冠軍機手何永志等人，到場表演無人機飛行。

Kelly Chu