KellyChu - 取自總部大樓門牌號303 作者ICAC職員 廉署漫畫小子Boy 303藏深意 | Executive日記

廉政公署嘅漫畫小子「Boy 303」，昨日初次登場，之後會唔定期喺社交平台同大家見面，介紹廉署嘅最新動態。但點解漫畫小子叫做「Boy 303」呢？據Kelly八卦到，呢個名背後好有深意，因為「303」就係廉政公署總部大樓嘅門牌號，現時大樓就位於北角渣華道303號；更有意思係，創作「Boy303」嘅畫家，其實都係廉署嘅職員；而佢嘅已故父親，亦係一名漫畫家！

　　漫畫小子「Boy 303」初次登場嘅漫畫，名為《303漫畫大作戰——國際排名篇》，介紹咗香港喺IMD世界競爭力年報嘅最新排名。漫畫入面，「Boy 303」遇見咗「神仙」，介紹佢睇全新嘅IMD世界競爭力年報；「Boy 303」搶答話，香港喺全球67個經濟體中，排名提升2位到全球第5。

　　不過「神仙」就提醒佢，唔好忘記「行賄和貪污不存在」呢個重要指標。原來，香港喺呢個指標入面，已經由上年全球第10，躍升到全球第4，而且仲係亞太區第1，係1995年至今最高排名𠻹，所以值得大家自豪，也要努力維持㗎。

KellyChu