KellyChu - 出征奧運前　感謝大家無條件支持 何詩蓓：香港人可以做好犀利的事 | Executive日記

萬眾期待嘅2024巴黎奧運今個月26號即將開幕，港隊女飛魚何詩蓓接受英文報章訪問，承諾會喺巴黎奧運取得佳績，讓香港人能夠感到自豪。一向充滿正能量嘅佢更勉勵指，香港可能只係一座小城市，但香港人可以做到好犀利嘅事情，並且唔應該設限，可以不斷取得突破。

　　詩蓓勇於追求自我突破，同時表示自己喺冇壓力嘅情況下，先能夠表現得最好，所以佢會確保自己喺奧運比賽期間係開心同埋享受一切，游出佳績便是令佢開心嘅事情，登上頒獎台則視之為額外嘅獎勵。

　　詩蓓話，香港人對佢嘅支持就係最大動力，對於大家一直喺背後無條件支持，感到感恩和感謝。而教練經常同佢講，「佢哋唔會喺比賽前頒獎畀你，只會喺比賽後頒獎畀你」，所以巴黎之前做咗啲咩並唔重要，奧運會上可以保持冷靜，以及表現得最好，就係贏家。

　　經歷過東京奧運之後，詩蓓話自己收穫經驗，知道點樣可以更好地應賽，好好掌控整個比賽過程，比游得快係更加重要，希望最後係完美落地。

KellyChu