煩惱自尋 3

話說黄SIR初初退休, 終日無所事事, 於是走去學粵曲粵劇, 五舊水一星期返兩晚, 有基本功學, 又有戲劇班, 歌唱班, 抵到爛！

誰知一做學生, 就遇到個又頑固, 又嚴謹嘅歌唱老師, 興趣變成了冇趣！玩樂变成了被玩！剩係一嘢打板, 已被佢打殘佐！立刻打退堂鼓！不玩也罷！

有時都唔知好嬲定好笑, 遇到D自以為是的人, 懶有原則, 諸多要求, 又冇睇客觀環境, 叫個亞伯去攀登藝術頂峯？佢冇嘢嘛？跟佢玩唔死就奇啦！走唔切, 就正一煩惱自尋也ｏ

後來又有人介紹黄SIR去一業餘劇團學基本功, 本來一百文堂, 玩玩無妨！但主事人又係奇忠於藝術果隻, 乜都執到正, 又唔准咁, 又唔准咁, 又成鬼日驚佢D藝術被人地偷咗！ 咁死煩, 你都咪鬼搞亞叔矣！玩咗幾次, 立即散水！無嗱嗱多咗個老細, 仲唔係出粮俾你果隻, 跟佢學嘢, 仲惨過你欠鬼咗佢！真係攞苦泥辛, 不玩也罷！

有時遇到D唔開竅D朋友, 玩樂变成負担, 本來可以輕輕鬆鬆, 悠悠閒閒, 結果搞到忙得要命, 緊張兮兮, 何苦來哉！

所以黄SIR一怒之下, 戲也𣎴做, SHOW也不出, 就係費鬼事煩咁觧也ｏ

做人可以輕輕鬆鬆, 就千祈要惜福, 唔好過份, 一個唔該, 就會煩惱自尋嘞！明白冇？