玩樂之唔同班

當年黃SIR學詠春時, 剛剛在日本有西洋拳王奇利大戰柔道高手豬木ｏ結果豬木一直瞓地, 拳王都冇佢符！

有人問黃SIR的詠春師傅, 詠春同奇利有冇得揮？師傅話冇得揮！（大家大吃一驚！以為佢話詠春唔夠人打也！）

D同學再問點解, 師傅話: 人地食牛扒, 我地食飯, 所以冇得打！食物唔同也！唔信你同我打, 大家食飯先有得打！

師傅咁講, 冇人敢駁！再駁就要同佢打！所以以後黄SIR就明白, 玩乜都要同班至有得玩, 唔同班就冇得玩！

正如黄SIR見D唱口, 明明係業餘水準, 偏偏揾來曾慧, 郭鳳女, 黄偉坤, 梁漢威,阮兆輝, 同佢玩演出！

好多時, 結果就慘不忍睹！老倌都拖到冧晒！

有時係舞池見D亞太, 六七張嘢, 揾個年輕力壯小伙子, 大跳勁舞！黃SIR真係睇到跳出眼火, 一拗腰就絕對牙烟！好易腰骨都斷鬼埋也！

所以做人要貴自知, 要玩, 要揾番D同班至得！

同班同級至有得玩也！