撫今追昔晉成街 2

晉成街當年經常有D街頭賣藝人到訪, 其中同黄SIR唱粵曲有D淵源, 就是唱龍舟了ｏ通常賣藝者拿住一枝有龍舟在頂, 有鼓及查的神奇樂器！在商店門口唱！咚啄！咚啄！然後唱龍舟歌, 都幾有特色嫁！

至於唱盲妹, 也間中有得聽, 多數係南音, 人稱師娘就是此類！

至於玩雜技賣藝人, 帶住隻馬騮, 多數係外江佬！所謂NOW鬆（老兄）, NOW鬆（老兄）唔食葱, 就是這班外江佬！

又有賣武藝人, 多數表演氣硬功, 心口碎大石之類ｏ此班人通常赤起上身, 胸前偉大, 同D健美先生有得揮也！你見過以往吴剛兄的表演, 成身油就似矣！

賣武時, 師傅講一句, 徒弟又跟住講一句, 搞笑！

例如: 師傳話: 伙計, 慢打鑼！……噹, 噹, 噹（鑼声）, …..徒弟就話: 打鑼！

打得鑼多鑼吵耳……噹, 噹, 噹（鑼声）, …...唔吵耳！

打得更多夜又長……噹, 噹, 噹（鑼声）, …..點算長！

我地今日泥唔係賣药……噹, 噹, 噹（鑼声）, ….. 係賣药！

今日一定唔呃人……噹, 噹, 噹（鑼声）, …...專.呃人！

跟住師傅作狀追打徒弟仔, 大家嘻哈大笑一餐！就去買药俾錢！有D人就丟D錢出去捧塲, 十分合作！是一個很好的娛樂節目！

有時有蛇王乜玩蛇！即塲劏蛇攞胆食！好堅！D飯鏟頭蛇, 弄蛇人拍吓佢個頭就立刻搞嬲佢, 蛇頭即變飯鏟狀, 吐出蛇舌！非常恐怖！當年弄蛇帶住D什麼過山烏, 五步釘！黄SIR D生物知識乃由街頭開始！