味之憶之家常餸菜

在黄sir兒時（五六十年代！）,  家中有两個傭人（唔駛俾人工, 佢地自已識揾錢, 二婆自己有烟檔牌, 玲姐好似有仔有新抱, 佢地睇住我老豆大, 直情當正係自己人ｏ 後來二婆死,都不肯返自已屋企ｏ 聽講佢個仔死咗, 個新抱就唔妥佢, 佢就當我地係家人, 冇人工都唔走ｏ）两人好似都係順德人, 煮餸工夫一流, 很平凡的材料, 已經十分美味ｏ所以黃SIR從少就習慣食D好滋味嘅食物！

一味炒菜心, 已是功力表現, 先燒紅隻鑊, 用油和蒜頭起鑊, 將D洗好, 摘好的菜心, 先放桱, 後放葉, 炒熟, 好似仲加蓋煮一陣, 加D生抽上碟ｏ真係美味非常, D菜好鮮甜, 有菜味ｏ（可能D菜心都靚過而家Dｏ整唔番ｏ）

另外一味釀鯪魚, 先將魚肉啄好, 加入豬肉, 蝦米之類, 再啄好, 釀番入鯪魚皮ｏ成條再煎香, 切成一片片上碟, 加上特色獻汁, 真係美味ｏ

至於蜆肉炒咸酸菜, 又係開胃餸, 咕嚕肉, 酸酸甜甜, 都好好味ｏ（而家D酒樓,一早炸定, 上碟都硬晒, D粉包肉入口一D口感都冇, 失敗！）

一味梅香咸魚啄半肥瘦豬肉, 剩係D肥油撈飯, 已可大啖两三碗矣ｏ

再簡單D, 蝦醬蒸五花腩, 腐乳蒸五花腩, 甚至蝦米蒸水蛋, 都令人懷念不己！

碰啱佢地輸咗字花（原始塲外投注, 非法外圍ｏ）仲有黃牙白（家家有一串掛在騎樓）煮腊肉（又係實有）, 抽皮（用豬油整）, 再煎件咸魚, 加两條腊腸焗飯, 真係好過出街食也ｏ

以前雖然食物冇而家咁豐富, 但我覺得口福, 卻好過而家好多, 究竟我地是進步了, 還是退步了呢？