味之憶之做節餸菜
2009/12/02 00:47:28 網誌分類: 飲食
五六十年代的日子, 黄sir家唔係餐餐大魚大肉, 要過節(如春節, 瑞午節, 中秋節之類)才會有魚有肉食,有靚湯飲o
過節黄sir家通常會有鮑片食, 係墨西哥果隻車輪鮑(而家賣到四五百文一罐, 一不留神就買到假貨, 剩係得張招紙係真, 真慘o) 車輪鮑用𧐢油簡簡單單整吓, 已經十分好味, 當然要用生菜做底啦o
黄sir家過節仲一定有, 茄汁大蝦碌, 黄sir唔食頭, 專食中間部份和蝦尾, D壳都好好味, 落手揸住食, 好有快感也o
大𠜎鷄(真係好大隻, 成三四斤重都有)用湯淥熟斬件就食得o鷄脾通常成隻食,分倒一隻就快活過神仙了o通常靚仔乖就有(我梗有啦!)有時煲牛白腩蓮耦湯, 好似有加D髮菜, 𧐢士, 十分和味, D牛白腩點余均益果隻辣醬就至正o(我而家都係只食呢隻辣醬嫁o)
有時煲豬肉湯(個陣人人識唱, 眼光光, 飲咗豬肉湯o)最鍾意就食D淋嘅半肥瘦豬肉, 點生抽已好好食, 至於有粉腸仲正, 點D醬在口中嚼, 很有咬頭o有D再窮D的小朋友教我, (我未試過)用條線綁住條粉腸, 嚼完一吞就拉番出泥, 點醬再食, 可以食好耐也o﹝吞咗就冇囉!﹞
近年我都好少一大棚人, 食呢種家庭式的做節餸菜了o
唉!去酒樓, 又點食倒D正嘢吖!
其實蓮藕有两種食法!老的要煲!生的要拋!嘻嘻!
果陣時冇得食至燥!蓮藕可能煲豬肉好d掛!牛白腩煲乜都好食啦!
食經同懷舊两碼子事!
牛白腩好少配蓮耦來煲湯的,你會唔會記錯左呢?(因為牛腩都已經燥,再加蓮耦,飲完真係生暗瘡架.)