味之憶之食不厭精

以住D人冇乜嘢食, 乜都食落肚, 但又唔係就咁食, 加工又加工, 加工都精彩絕倫ｏ

聽說以往可以買d鷄呀, 乳鴿呀, 用芝麻喂之, 令其肉質改变, 更加好食！

又例如整抽皮, 先選用一級抽皮,用濃鮮鷄湯煨味, 又用豬油製作,﹝我見有人剩買抽皮, 而抽肉小販另外平賣！﹞十分多工夫去整！

新會D柑又係咁, D皮仲值錢過D肉！再珍藏數十年成為好味的陳皮才食！正啩？

至於釀鯪魚又係功夫多到死, 只見工人成個下畫準備, 先將D肉攞出加上蝦米,豬肉之類ｏ（我只係旁觀, 唔識做！）啄成魚餅, 然後釀番落D魚皮殼處, 成條魚還原, 再煎到香噴噴, 加一個獻汁, 做番D裝飾在碟旁（葱之類）真係諗起都流晒口水ｏ

唉！而家出街食D原裝鍚紙包裝釀鯪魚, 味道完全唔係果回事, 加個鉄板上, 又話上菜！仲渣過我細時D家常菜！

仲有啄豬肉餅, 只見工人用两把刀背, 的的得得, 啄成個鐘才攞去蒸（加梅香威魚仲正）！特別好味也！

黄SIR好似好耐冇食過一種叫鴨腳包的食物了, 以前D燒臘檔有得賣, 整一隻入戲院一路食一路睇戲, 真一流也！

唔知幾時冇咗呢種食物呢？吓？

以前d人比較好心機去整d好嘢食！而家食嘢只係閗快閗平吧了！