懷往事之往昔娛樂 平民夜總會

講完食嘢, 不如又試吓講往昔娛樂啦！

五十年代未有電視, 麗的呼声只是播音而已ｏ當年最受歡迎的節目是夜半奇談, 開始時佈幕員的聲音弄到氣氛十分恐怖ｏ 夜……半……奇…….談……小朋友又怕又要聽, 係鬼古, 有時要用張被蓋住先聽ｏ

 到有電視時（六十年代）, 黃sir就去涼茶鋪看電視, 通常一晚會飲到一肚水, 老板例牌約半小時, 就要你添飲, 否則趕客, 冇人情講ｏ

 至於有時袋中有銀（一两文）會同街中的小朋友, 去上環的所謂平民夜總會ｏ有D類似而家廟街, 又係有平嘢賣, 衣服, 雜貨之類ｏ我地多數幫襯食物, 露天大牌檔, 東風螺一定幫襯, 用一枝鉄枝撩D肉出泥, 點D甜醬或辣醬食, 很惹味ｏ炒蜆都正, 尤魚很淋, 粥粉麵飯都有, 西瓜也有, 椰汁,蔗汁也有ｏ鹽焗鷄睥也很好味, 有D鹵味檔有炸豬大腸, 而家都有得食ｏ本來要準備留低一毫子坐電車回家, 也因太貪食ｏ 用埋, 通常要行路番屋企ｏ

 至於其他娛樂就免費, 例如聽唱歌啦, 果陣我未識唱粵曲, 聽都嫌煩, 見倒都唔聽ｏ

有時會睇吓人買武, 即係伙計…..慢打鑼….徒弟就應….打鑼…..打得鑼多鑼吵耳….徒弟就應…..吵耳……果隻…..玩得两玩ｏ檔主就賣药…….我地唔係賣假药…….徒弟就應…..係賣假药……檔主話我地唔會呃人……. 徒弟就應….. 呃人……檔主作狀摑徒弟仔, 好好笑ｏ成日重覆, 我而家都識做ｏ

 有時會有老藝人（通常係外江佬）玩馬騮, 隻馬騮真係識做好多嘢ｏ甚至識踩一輛特製的單車, 又識穿衣服扮孫悟空（根本唔駛扮, 孫悟空本身就係馬騮ｏ）近年巳經少見了ｏ

 有時又有人弄蛇, 什麽過樹榕, 飯鏟頭, 青竹蛇, 過山烏, 七步釘ｏ（即俾佢咬咗ｏ行七步就瓜柴！）一一介紹ｏ直情係活生生嘅生物課, 甚至有即塲攞胆, 用酒服下（當然要俾錢ｏ） 

有時又有人玩茅山術﹝即係魔術﹞ｏ有套五鬼運財, 眼見佢用一紙人, 作法之後, 真的運來紅衫魚（一百元）一張, 十分神奇ｏ當時好想學, 學咗揾錢就話都冇咁易啦ｏ

觀賞完, 已屬夜深, 步行回家, 這就是我童年的娛樂節目了ｏ