懷往事之往昔娛樂, 睇公餘塲

以前睇電影, 有時有候, 两點半, 五點半, 七點半, 九點半, 好有規律ｏ唔似而家睇戲叠半去到, 剛剛開咗（開叠三叠四又有, 唔三唔四又有）去親都開咗, 唔怪得之市道低落吖ｏ

以前睇戲, 剩係煨尤魚, 咬蔗都過癮啦ｏ仲有咸酸嘢, 椰肉, 酸介菜, 白果, 鹽焗蛋, 粟子, 甘草欖, 夫妻和順欖, 連潮州糖夾餅, 花生糖, 厚夾餅, 都可以買入塲食ｏ唔似而家D戲院, 唔係小食部D食物, 不准帶入, 小氣到死ｏ

有次我去燒臘檔, 整隻鴨腳包入戲院食, 真係一樂也ｏ

黄SIR最鍾意睇公餘塲（五點半）, 票價比正塲平一半ｏ多數做西片, 最適合我（可以學埋英文, 我而家講英文, 都有小小西部牛仔音, 就係個時同尊榮學嘅ｏ）公餘塲日日戲碼不同, 好多牛仔片, D牛仔追殺紅番就最好睇嘞（成班靚仔拍晒手掌）ｏ大咗至知, 牛仔（美國佬入侵者！）至係壞人, 紅番（原居民！）先至係好人, 而家冇晒癮了ｏ

圓桌武士片又好睇ｏ最過癮就係两個騎士,分两行對住, 揸枝長茅互冲, 一嘢分勝負ｏ當時我諗, 俾我整支長多尺零嘅茅就嬴硬啦, 乜D鬼佬咁鬼儍？D友套戰甲又係笨鈍到死, 又重又盛, D刀D劍冇乜招式ｏ最妙就係流星鎚, 我返屋企用繩綁住個菠籮練, 好鬼難練, 差D扑濕自已ｏ

有次睇套戰爭片, 魂斷藍橋ｏ諗住飛機大炮, 打到橋都斷埋ｏ誰知係文藝大悶片ｏ後來才知女主角, 慧雲李係荷李活第一大美人ｏ（同我個女個英文名一樣, 都算有D緣份ｏ）

後來我再大D, 就鍾意睇, 蘭度布山卡（三級片著名演員！嘻嘻！）了ｏ