懷往事之 太平戲院

黄SIR小時玩樂成長之處附近, 有間太平戲院, 太平戲院在黄SIR回憶中, 真是充滿了歡樂ｏ

首先是它的公餘塲（五點半場）又平又抵睇, 做的是二輪的西片ｏ而正塲放映時間分別是二時半, 七時半, 九時半, 有規有矩ｏ唔似而家D戲院, 去到多數開鬼咗塲, 一唔係又要等成粒鐘至有得睇, 都唔知D時間有冇規律, 又唔係搭正, 又唔係搭三, 搭半, 搭九, 總之去到就吹漲！整整吓, 都冇心機去睇矣！

太平戲院有成千七個座位, 高山劇場都係得千零個之馬ｏ以前做親粵劇都爆, 可見老倌的叫座力ｏ我也曾同甜甜在太平戲院看過粵劇, 美麗的戲服, 依然長留在腦海中ｏ

太平戲院的座位安排是暗斜的, 如果你一聽見背後有人殊殊声, 你唔縮腳就會領嘢, 因為小朋友要小便, 大朋友又要睇戲, 咪叫小朋友就地解決囉！

戲院門口很多小食賣, 睇戲最過癮莫如由頭食到尾, 冇人會干涉你！唔似而家飲啖水, 個帶位小姐都話你犯規！

太平戲院逢星期日有早塲, 三樓只收一毫子, 又可以两個小朋友一張飛或一個大人帶一個小朋友入座ｏ黄SIR當年是小朋友, 有三儍睇, 又有幾套卡通片, 次次睇完都唔捨得走, 希望仲可以放映多一套, 直至開晒燈至肯走ｏ

而公餘塲就日日有, 每月出一張咭, 載明每日做乜嘢二輪西片ｏ我D英文就係咁學番泥, 尊榮以前係我心目中之大英雄, 牛仔片以佢最有型ｏ

貓王第一套LOVE ME TENDER（愛我温柔）也是我喜愛電影之一, 有一段時期我都梳到D頭髮成個騎樓咁ｏ後來到披頭士時, 又留到D頭髮鬼死咁長, 果陣我巳經入了理工做講師了, 搞到個系主任有一日頂唔順, 要提醒我去飛髮！

另一個我喜愛的明星是柯德莉夏萍, 真係到而家我都覺得佢好靚！我細佬就好鍾意一個叫史提夫里夫士, 係一個大隻佬！

後來我又鍾意奇里夫李察, 即英國貓王, 佢有首歌叫PUT ON YOUR DANCING SHOES, 到而家我都識唱, 有位叫白潘的歌手D歌都好好聽, 全部都係係公餘場睇番泥嘅ｏ醒啩！

跟住黃sir又學人唱HIT SONG,  學英文, 都幾有效嫁！而家唔知有冇人咁學英文呢？ 吓？

戲院真係嘅有娛樂功能, 又有教育功能也！