懷往事 之 工厰歲月

黄sir第一份工作, 就是在荔枝角香港紗厰內的安培泛達(AMPEX)電腦公司, 做助理工程師, 當年入職人工一千零五十元正, 但如果黄sir肯做老師（教中學）就有一千七百五十元, 我唔知點解, 胡裡胡塗揀了入工厰！有一段時期, 我很後悔不去教書, 賺多D錢！

在工厰做, 又要加班, 又要打咭, 真係辛苦到死！（結果做了年半, 都係走返中大做了年半助教, 收番一千七百五十元一個月, 順便進修吓！主要在馬料水可扒吓艇仔！十分寫意！ 此乃後話！）

當年安培泛達做的是電腦磁環記憶系統, 要在磁環內穿上三四條幼幼的銅線, 很費人力, 所以由美國搬來香港做ｏ當年電子厰有厰車, 有飯堂, 冷氣工塲, 福利好好嫁ｏ而且人力唔夠, 介紹一個女工做滿三個月, 介紹人可得相當於女工一個月的人工獎金, 又周時舉辨舞會, 周日有旅行, 做女工都幾好嫁！反而做工程師就辛苦好多了（成鬼日OT！做到個人散晒！）ｏ

安培泛達在工業界也培養了不少人材, 例如後來做到行政局首席的李鵬飛先生啦, 上市公司偉易達的黃子欣先生啦, 上市公司依利安達的蘇章盛先生啦, 工業界很多工程人才, 都出自這所電子工程師的少林寺ｏ時至今日, 依然有好多曾在安培泛達做過的人在工業界任職ｏ黄sir也有很多同事, 朋友搞工業發了達！

我在職時, 正是工厰年代的黃金歲月, 很多人靠工厰生活, 也有好多人賺了錢, 發了達ｏ除了電子業, 製衣業, 假髮業, 塑膠業, 各類製品業都好好景也, 真係唔憂冇工做的年代也ｏ

到了後來大陸開放, 工業北移, 又是另一景象了ｏ（那時我已經在理工學院教緊書矣！）