咁樣做生意都得 4

還記得有一段時期, 大肆宣傳的一文鷄嗎？ 嘩！一文食一隻鷄！真係抵到爛也！同D大陸零團費真係有得揮！一睇已知光棍佬教仔 （超伯教仔都一樣啦１）便宜莫貪也！

後來被人揭發, 原來鷄是一文, 不過D羌茸就要俾五十文喎（唔要唔得！）

而家食嘢, 都冇乜边間好食, 間間都炒晒D高人工嘅厨師, 用埋D執碼仔煮, 點唔死吖, 通常玩得两玩, 就改為火煱店, 厨房剩係執碼就掂, 跟住就執埋, 老細走佬！員工見報！政府賠錢！

有間雲吞麵鋪, 都幾出名, 午市時閒, 四人卡位要用盡, 無可厚非！寸金尺土, 揾食艱難, 黄sir都諒解ｏ

但有次同太太非繁忙時閒去, 招待個肥婆分明玩我地, 要两人排排坐（不准對面坐！）大佬！你人多就迫住就你, 冇所謂啦！而家冇客都咁玩法！唯有即刻走人, 冇幫襯！

有次去間越南餐廳（在北角, 執咗咯！）又係非繁忙時段去, 成間嘢吉嘅！居然唔准揀位坐, 一定要坐正門口當風做生招牌果張枱先！唔准揀！

咁鬼寸, 唯有走人！去第二間食冇咁嬲！

周不時遇倒D伙計, 唔知係咪要同老板倒米, 係咁玩嘢！真係不勝枚舉, 唔怪得大快活, 大家樂咁好生意！冇晒呢D煩嘢！

真係想食得舒舒服服, 都唔係咁簡單也！