一年容易又中秋 8

黄SIR小時玩樂成長之處, 就在石塘咀太平戲院（已拆！）附近, 太平戲院在黄SIR回憶中, 真是充滿了歡樂的地方ｏ

首先是它的公餘塲（五點半場）又平又抵睇, 做的是二輪的西片ｏ而正塲放映時間分別是二時半, 七時半, 九時半, 有規有矩ｏ唔似而家D戲院, 去到多數開鬼咗塲, 一唔係又要等成粒鐘至有得睇, 都唔知D時間有冇規律, 又唔係搭正, 又唔係搭三, 搭半, 搭九, 總之去到就俾佢吹漲！整整吓, 都冇心機去睇矣！

原來太平戲院有成千七個座位, 高山劇場都係得千零個之馬ｏ 以前做親粵劇都爆, 可見D老倌的叫座力ｏ我也曾同甜甜在太平戲院看過粵劇, 美麗的戲服, 粵劇的大鑼大查, 依然長留在腦海中ｏ

太平戲院的座位安排是暗斜的, 如果你一聽見背後有人殊殊声, 你唔縮腳就會領嘢, 因為小朋友要小便, 大朋友又要睇戲, 咪叫小朋友就地解決囉！

戲院內有幾行的最邊位有張鉄几, 可能是俾邊位的觀眾擺嘢, 但小朋友就用泥坐！黄sir細時試過睇到忘形, 向後一挨！就仆到直！（韓國影帝！）

戲院門口很多小食賣, 睇戲最過癮莫如由頭食到尾, 冇人會干涉你！唔似而家飲啖水, 個帶位小姐都話你犯規！（在高山劇塲！多鬼餘！）

太平戲院的確在黄SIR成長歲月, 佔了很重要的一頁ｏ