一年容易又中秋 9

太平戲院逢星期日有早塲, 三樓只收一毫子, 又可以两個小朋友一張飛或一個大人帶一個小朋友入座ｏ黄SIR當年是小朋友, 有三儍片睇, 又有幾套卡通片, 次次睇完都唔捨得走, 希望仲可以放映多一套, 直至開晒燈至肯走ｏ

而公餘塲就日日有, 每月出一張咭, 載明每日做乜嘢二輪西片ｏ有段日子, 我差不多日日睇！我D英文就係咁學番泥, 尊榮以前係我心目中之大英雄, 牛仔片以佢最有型ｏ

貓王第一套LOVE ME TENDER（愛我温柔）也是我喜愛電影之一, 有一段時期我都梳到D頭髮成個騎樓咁ｏ後來到披頭士時, 又留到D頭髮鬼死咁長, 果陣我巳經入了理工做講師了, 搞到個系主任有一日頂唔順, 要提醒我去飛髮！

另一個我喜愛的明星是柯德莉夏萍, 真係到而家我都覺得佢好靚！我細佬就好鍾意一個叫史提夫里夫士, 係一個大隻佬！好彩佢冇变佐做基佬！

後來我又鍾意奇里夫李察, 即英國貓王, 佢有首歌叫PUT ON YOUR DANCING SHOES, 到而家我都識唱, 有位叫白潘的歌手D歌都好好聽, 全部都係係公餘場睇番泥嘅ｏ醒啩！

跟住學人唱HIT SONG,  學英文, 都幾有效嫁！而家唔知有冇人咁學英文呢吓？

果陣冇乜人唱粵曲咁老土也！反而新馬仔鄧寄塵同黄飛鴻黄SIR就一定捧塲！睇黄飛鴻一開塲, 聽倒隻將軍令就已經好興奮！想起都開心！

戲院真係嘅有娛樂功能, 又有教育功能也！