生活的智慧 6

世事洞明皆學問, 人情練達即文章

有時有D人不必要地率直, 得失人而不自知, 人地通常都不會直斥其非（人地有修養嘛！）但心裡可能就會話, 乜佢咁鬼冇家教嫁！

黄SIR細時, 長輩教落, 逢人就要減歲, 遇物就要添錢ｏ 意思即係見倒人,例牌減佢十歲八歲, 等人開心下, 明明見佢個衰樣, 都成個阿伯咁（一如黃SIR）, 你只能估佢三張幾, 頂晒龍都𣎴過四張吧！講的人又過癮（日行一善！）受的人又開心, 何樂而不為呢？ 我見D人, 估超伯最多七十零, 笑到佢見牙唔見眼, 就是這個道理！

至於遇物添錢就係, 明明知人D嘢, 都唔係乜鬼名貴嘢, 一樣要估高D, 人地叫你估吓套衫買咗幾多錢？你就一定要估大五至十倍, 等人覺得自已冇買錯貨！夠晒眼光ｏ 呢D就叫世故嘞！

好似黄SIR D靚師妹成鬼日唱完粵曲, 問黄SIR佢唱成點？黄SIR就梗話呢隻歌, 郭鳳女都唔夠你好呀！（首歌白雪仙原唱嘅！郭鳳女都可能唔識唱！）一唔係就話, 簡直冇得彈呀？（你唔見個琵琶追腔, 追到停晒手, 冇乜彈到咩？）嘻嘻！

D人出SHOW, 遇倒黃SIR, 黃SIR包有讚冇彈, 唱得好, 自然大讚特讚,  唱衰咗, 淨係個樣, 扮相, 服飾 都大把嘢讚啦, 何况仲有舞台, 音樂, 燈光, 冷氣, 字幕, 座位, 掌聲, 大把嘢讚啦ｏ

人情世故做到足, 咁樣同人相處, 先至和洽D也！

呢d咁溉智慧都冇, 點出泥行呀？嘻嘻！