黄金歲月 78

以前晉成街有個上海仔, 住係街尾, 呢位小朋友, 頗有音樂天份, 但衰就衰在好學唔學, 學吹小號！一早就吹起床號！嘈醒哂成條晉成街！結果當然人人喊打啦！

提起玩樂器, 不能不提黃sir两個兄長, 两人皆承傳了超伯的音樂天份, 吹奏口琴, 真係出神入化, 又可震音, 又可两個口琴一齊吹！真利害！超伯直情後來跟埋梁日昭口琴大師學！聽講攞好多獎添！

黃sir二兄仲兼修秦琴（街上買白欖果種）洞簫！小提琴之類！搞到樓上禾文蟲（皇家警察！）個細佬要求何姑娘 （吾母）叫吾兄放過佢！（俾個時段佢讀書喎！）

街中亦有人識玩二胡！此類樂器特別哀怨！配合一曲地水南音, 真係什麽秋月懷人feel 全部出晒泥！

以前學樂器, 多數自已興趣！黄sir在小學都學過牧童笛！不過似乎冇セ人肯聽黃sir支笛！結果從未識奏過一首完整樂曲！

反而二兄的小提琴, 初時似足劏鷄！後來居然….好似…..似乎拉倒首曲啩？佩服！佩服！

想不到黄sir退休後, 竟漸漸浮現音樂的天份！不在樂器, 竟在唱粵曲！

哎吔吔！此事奇奇 奇………你話咁樣算不算奇………