PACO名人會
PACO名人會
PACO名人會

紅館集體回憶騷 跟杜麗莎互唱經典作 譚詠麟:希望掃走港人怨氣!

2012/05/14 10:17:36 網誌分類: 生活
14 May

        殿堂歌手譚詠麟與杜麗莎(Teresa)攜手舉行演唱會,簡直是我們之福!他們縱橫樂壇數十年,首首金曲百聽不厭,如今鐵定於七月二十至二十三日假紅館舉行《譚詠麟杜麗莎TimeAfterTime演唱會》,與歌迷們重唱多首耳熟能詳的金曲,二人異口同聲表示演唱會集「SmellsGood,TastesGood,LooksGood&SoundsGood」於一身,很期待這場絕頂演唱會。

        主持:黃柏高統籌:林永匡協力:袁東亮、

        龍婉琪

        不說不知道,譚詠麟與杜麗莎從未合作,今次破天荒合作,冥冥中都是天意。

        阿倫:「能夠合作開演唱會,我覺得係天意,記得上年大家在JoeyV悼念演唱會合作後,都覺得有機會的話,不如再一齊合作,初初我以為Teresa出於禮貌所以咁講,誰知佢真係同國忠(藝能負責人張國忠,WallaceCheung)傾過,國忠認為我哋喺舞台上所衍生嘅火花好難得,而且合唱時更令人有毛管戙嘅感覺,巧合地紅館有期,種種因素之下便造就今次演唱會。」

        互唱經典金曲

        Teresa:「本身我唔鍾意《Feeling》呢首歌,因為小時候練歌晚晚都唱,已經唱到無咩感情,殊不知上年同Alan喺JoeyV嘅Concert合唱時,Alan一開聲,我竟然覺得呢首歌係為我哋而設,係一首為屬於我哋歌,我好Surprise《Feeling》呢首歌竟然令我如此感動,所以當Wallace話好想我同Alan合作時,我就即刻話Yes﹗」

        首首金曲皆唱到街知巷聞,要從中挑選絕不容易,據知二人選曲將以重溫昔日回憶,以及瓦解社會怨氣為大前提。

        阿倫:「其實我同Teresa可算係樂壇的男、女Library,Teresa6歲已經唱歌,見盡樂壇潮流與變化,而我亦相當清楚香港樂壇嘅演變,所以我哋去年一坐低傾,已將影響樂壇、帶起潮流嘅金曲放晒出嚟,一方面希望挑選Recall大家回憶嘅歌曲,另一方面想將正面信息帶畀大家,希望利用我哋嘅音樂以及感染力,令大家暫時放低悲傷,因為現今社會怨氣實在太重,太多投訴嘅聲音。」

        Teresa:「今次演唱會啲歌好好聽,我哋會選唱好多金曲,當中好多本身係Solo嘅歌曲,即使從未改編成Duet(對唱)部份,都會被我哋改編,成件事變得好有新鮮感,變成屬於我哋嘅歌。當中,我哋亦會選唱彼此嘅歌,好似我會唱佢嘅《愛的根源》,佢會唱我嘅《假如》。」

        頂級班底撐場

        一場演唱會,除了需要歌手的熱誠外,幕後班底絕不能輕視。這一次,阿倫與Teresa異口同聲表示找了頂級的朋友來幫手,相信是次演唱會定必為大家帶來驚喜,聽出耳油。

        阿倫:「為咗大家夾,有默契同好好溝通,Band隊方面都係我嘅班底,同番RichardYuen佢哋合作,而結他手就搵番JoeyTang,和音成班都係用上頂尖級人馬﹗當中我哋已挑選咗《TimeAfterTime》等等嘅歌。

        Teresa:「當Alan話唱《TimeAfterTime》時,我覺得係一個挑戰,呢首歌咁經典,究竟點唱?好好彩,我哋搵到JohnnyYim重新編曲,當時我提議尾音部份編長少少,唔知效果得唔得,但結果Itiswork﹗Alan演繹時,唱得好Smooth,好有感情同節奏。」

        玩轉發燒碟

        演唱會精采,還同期送上發燒碟,首首金曲重新改編,當中還找來Rock味極重的《無情的情書》來改編,我非常期待成果。

        阿倫:「是次發燒碟一共挑選咗6隻英文歌、4隻廣東歌、2隻國語歌,當中我揀了《無情的情書》,而Teresa就揀《至少還有你》。其實我都擔心改編後,會失去作品原來的感覺,但好開心JohnnyYim改完後,味道與感覺唔單止仍在,我仲相信會符合到發燒友嘅要求﹗」

        Teresa:「Alan揀Beatles嘅《BabyIt''sYou》來改編,當時我上網Search,只係搵到女版,沒有合唱版,所以我完全唔知道究竟合唱版係用咩感覺去演繹,但當我哋一開口,竟然有意想不到嘅效果,我相信呢個係我哋無形間嘅默契,對音樂嘅要求。」

        

        黃柏高

        
 
 
■譚詠麟將與杜麗莎於七月二十至二十三日,假紅館攜手舉行演唱會。
■譚詠麟將與杜麗莎於七月二十至二十三日,假紅館攜手舉行演唱會。
■阿倫指能和Teresa合作開演唱會,簡直就是天意。
■阿倫指能和Teresa合作開演唱會,簡直就是天意。
 
■阿倫和Teresa昨日齊出席演唱會的記者會。
回應 (0)
我要發表
user