師奶的話題

昨日同班靚師妹上深圳操曲, 本來拖住隻豬締（黃腫腳）死吓死吓, 真係捨命陪君子ｏ一個唔該, 隻腳医唔番, 從此輪椅出入, 真係唔得佢死矣！

但諗諗吓, 我在電視上見香港D傷健人仕（傷咗仲好過健康？）坐輪椅打劍, 好似都攞倒傷健奥運金牌, 都唔衰得晒也ｏ我又見有人表演過輪椅舞, 成班坐輪椅的朋友, 在舞台上如穿花蝴蝶, 一樣快活過神仙也ｏ想到咁, 最壞情况（WORSE CASE）都不過如此, 又冇乜所謂噃！

何况我咁小事, 走去骨科睇, 慢吓手, D護理人員叫我去睇小兒科, 咪好鬼冇面ｏ睇跌打又怕D跌打佬無良, DUMN症（即拖長泥做, 以前細細個見慣D江湖佬發大泥搞ｏ好番扑斷再駁都有, 所以有包医呢尾嘢, 包医即先俾一數目（如五百一千不等）包医到好為止, 以示唔呃人！唔DUMN症！

講講吓唔記得想話琴日食晚飯時, 成班師奶講陪月, 有個同學走咗去做陪月, 有好多生意, 做唔切咁滯！原來政府有課程教, 上課都有錢派！香港人畿鬼幸福, 都唔憂餓死啦！做陪月, 嘩！人地產婦補身,又豬腳薑, 又 魚湯（谷奶用） 你又補埋一份ｏB仔開奶, 你又飲先, 試真D濃度同慹度, 慢吓手B仔喂人奶, 咪仲補？

睇住D師妹講到眉飛色舞, 旁若無人,  簡直忘記佐我呢個大男人！哈！呢個話題, 真係冇得搭咀噃ｏ失驚無神, 有個師妹殺句埋泥., 黄SIR果陣你太太喂人奶定牛奶嫁？吓？冇乜印象噃！

我細個時, 都好鍾意睇條街D師奶喂人奶嫁？（我好細個果陣, D大嬸真係好大方, 隨街打開件大襟衫喂奶, 見慣不怪啦！）吓？見D師妹即刻收晒聲, 唔講嘞ｏ（睇人喂奶, 又唔係睇你！駛唔駛咁呀？）

（哈！下次你地如果, 講更年期ｏ我都要諗諗點應付至得矣！）