人際呢...

睇到篇野話D女仔如果小時候害羞, 有鼓勵佢唔好咁害羞既話, 某D大個之後唔會抑鬱...

但我唔係果「某D」, 所以有時會抑鬱, 仲會躁狂添。

人際呢樣野... 我剛剛想到:

(1) 由於屋企有哥哥, 小時候只鐘意同自己D哥哥玩, 所以遇到比自己大既男仔, 好容易當成哥哥 (所以會傾到計), 尤其當佢地都好似哥哥咁照顧我既時候, e.g., 遇到燒餅/ 燒餅的大佬/ 一些男同事既時候

(2) 由於細個時選擇唔同d女仔玩, 因為覺得d女仔悶, 又冇姐妹, 形成一種不男不女既性格

(3) 遇到女同學、女同事, 比較少共同話題 (婚後好好多, 可以講婚姻生活同仔女, 雖然我未有仔女, 但我想有; 咁就唔會流於講明星、娛樂、是非、化妝品呢d膚淺野)

(4) 其實細個時唔係冇試圖同女仔玩, 而係當我睇「美少女戰士」時, 二哥會笑我, 所以有時唔敢睇; 而跳橡巾繩、玩呼拉圈我都好水皮, 同d女仔爭太遠, 都成唔到「圈內人」

(5) 讀城大既時候有睇韓劇, 所以同d女同學開始有共同話題, 多返d女仔朋友, 但出黎返工之後, 辦公室當然有政治, 難有新朋友囉

(6) 我等自己有b, 咁就可以問d女同事陀b心得... 又其實依家都幾好, 有兩個女同事有小朋友既, 我都會同佢地傾下計, 問佢地點揍b, 而婚後真係冇咁需要避開同事之間既緋聞, 因為擺明我有個老公, 我同老公愛到難捨難離, 一定唔會有婚外情, 放心同男同事講野

如果第日有b, 由於決定唔到性別, 又決定唔到第一個係男仔定女仔, 我計劃:

無論第一個係男定女, 都令佢feel到周圍有「兄弟姐妹」:

(1) 要識到其他人既仔, 要大過自己個b, 咁佢feel到有哥哥, 學會尊敬其他小朋友

(2) 要識到其他人既女, 要大過自己個b, 咁佢feel到有姐姐, 學會同d姐姐溝通, 呢樣好重要, 因為香港女多男少, 港女好多都係做人家姐既, 要嚮讀書時同職場上建立人脈, 從同呢d姐姐相處開始, 而且最緊要係maintain個relationship, 睇d姐姐待人處事從小到大既變化, 而探測到呢d「大家姐」既思路, 萬一第日同事或上司係呢d「大家姐」, 都冇咁驚, 而且溝通到

(3) 要識到其他人既仔, 要細過自己個b, 等佢學會關心、照顧細個d既人, 培養責任心, 學會幫助別人

(4) 要識到其他人既女, 要細過自己個b, 等佢學會愛錫他人、學會以柔和既語氣同人相處、學會理解他人感受

如果自己個b唔想同人相處, 就要再想辦法 (帶佢去社區中心玩, 俾d有志於慈善既社福界人士用愛心引導佢), 但我相信自己個b唔可以成日同我一齊, 因為我孤僻成咁, 佢應該學習其他人, 唔可以學我。

係咪可以咁架?...